شىمالىي كورېيە ئامېرىكا، ياپونىيە ۋە جەنۇبىي كورېيەنى كېڭىيىۋاتقان ھەربىي ھەمكارلىق ئارقىلىق رايوندا جىددىيچىلىكنى ئاشۇرۇش بىلەن ئەيىبلەپ، تېخىمۇ كۈچلۈك ئاگاھلاندۇرۇش بىلەن ئىنكاس قايتۇرۇشقا ۋەدە بەردى.
شىمالىي كورېيە سەيشەنبە كۈنى ئامېرىكا، ياپونىيە ۋە جەنۇبىي كورېيەنى كېڭىيىۋاتقان ھەربىي ھەمكارلىق ئارقىلىق ئاسىيا-تىنچ ئوكياندا «يېڭى بىر بىخەتەرلىك كىرىزىسى» پەيدا قىلغانلىقى بىلەن ئەيىبلەپ، تېخىمۇ كۈچلۈك ئاگاھلاندۇرۇش تەدبىرلىرى بىلەن ئىنكاس قايتۇرىدىغانلىقىنى ئۇقتۇردى.
دۆلەتكە تەۋە كورېيە مەركىزىي ئاگېنتلىقى (KCNA) دا ئېلان قىلىنغان بىر ئوبزوردا، بىر ھەربىي ئوبزورچى، ئۈچ دۆلەتنىڭ يېقىنقى مەزگىلدە ئامېرىكا يېتەكچىلىكىدىكى تېنچ ئوكيان قىرغىقى ھەربىي مانېۋىرلىرىمۇ ئورۇن ئالغان كەڭ كۆلەملىك ھەربىي مانېۋىرلار ئارقىلىق ئورتاق ئۇرۇش ئىقتىدارلىرىنى ئاشۇرغانلىقىنى بىلدۈردى.
شىمالىي كورېيە 30 مىڭدىن ئارتۇق خادىم، 30 دىن ئارتۇق ئۇرۇش پاراخوتى، 5 سۇ ئاستى پاراخوتى ۋە تەخمىنەن 190 ھاۋا ئاپپاراتى قاتناشقان بۇ يىللىق تېنچ ئوكيان قىرغىقى مانېۋىرىنى بىر «تاجاۋۇزچىلىق» ھەرىكىتى دەپ تەسۋىرلەپ، ۋاشىنگتوننى، توكيو ۋە سېئۇلنىڭ قوللىشى ئارقىلىق رايوندا ھەربىي ھۆكۈمرانلىق ئورنىتىشقا ئۇرۇنۇش بىلەن ئەيىبلىدى.
ئوبزورچى يەنە، ئامېرىكا بىلەن جەنۇبىي كورېيەنىڭ يېقىندا ئېلىپ بارغان ھاۋا ۋە ئارقا سەپ مانېۋىرلىرىنى، ئامېرىكانىڭ ياپونىيەدىكى قوماندانلىق ئورۇنلىرىنى كۈچەيتىش پىلانلىرىنى ۋە تەرەققىي قىلغان ئامېرىكا باشقۇرۇلىدىغان بومبا سىستېمىلىرىنى ئورۇنلاشتۇرۇشنى تەنقىد قىلىپ، شىمالىي كورېيەنىڭ «بۇ يېڭى سەۋىيەدىكى تەھدىتكە، يېڭى بىر سەۋىيەدىكى ئاگاھلاندۇرۇش بىلەن» ئىنكاس قايتۇرىدىغانلىقىنى ئەسكەرتتى.
تور ھۇجۇمى ئەيىبلەشلىرى رەت قىلىندى
يەنە بىر تەرەپتىن، شىمالىي كورېيە تاشقى ئىشلار مىنىستىرلىقى، پيوڭياڭنىڭ تور تەھدىتى پەيدا قىلغانلىقىغا دائىر ئامېرىكا يېتەكچىلىكىدە ئوتتۇرىغا قويۇلغان ئاخىرقى ئەيىبلەشلەرنى رەت قىلىپ، بۇلارنى «ئاساسسىز» ۋە سىياسىي مەقسەتلىك دەپ باھالىدى.
مىنىستىرلىق باياناتچىسى ئامېرىكانى تور قوماندانلىقلىرى، ئورتاق مانېۋىرلار ۋە سۈنئىي ئىقتىدار تەشەببۇسلىرى ئارقىلىق تور بوشلۇقىنى ھەربىيلەشتۈرۈش بىلەن ئەيىبلىدى ھەمدە دىگىتال ئىقتىداردىكى جىددىيچىلىكنى ئاشۇرۇشقا مەسئۇل تەرەپنىڭ پيوڭياڭ ئەمەس، ۋاشىنگتون ئىكەنلىكىنى ئىلگىرى سۈردى.
