گېرمانىيە باش مىنىستىرى فىرىدرىخ مېرز سۈرىيە پىرېزىدېنتى ئەھمەد شارا بىلەن ئىككى تەرەپ مۇناسىۋەتلىرى ۋە كۆچمەنلىك مەسىلىلىرىنى مۇزاكىرە قىلىش ئۈچۈن ئۇنى بېرلىنغا تەكلىپ قىلدى.
مېرز دۈشەنبە كۈنى كەچتە ئۆتكۈزگەن مۇخبىرلارنى كۈتۈۋېلىش يىغىنىدا، شارا بىلەن سۈرىيەنىڭ سىياسىي ئۆتكۈنچى باسقۇچى، بۇ دۆلەتنىڭ ئىقتىسادىنىڭ ئەسلىگە كېلىشى ۋە سۈرىيەلىك مۇساپىرلارنىڭ دۆلىتىگە قايتىشى مەسىلىلىرىنى مۇزاكىرە قىلىدىغانلىقىنى ئەسكەرتىپ مۇنداق دېدى:
«سۈرىيەدىكى ئىچكى ئۇرۇش ئاخىرلاشتى. بۇ دۆلەتنىڭ قايتا قۇرۇلۇشى ئۈچۈن بارلىق بايلىقلىرىغا، بولۇپمۇ سۈرىيەلىكلەرگە ئېھتىياجى بار. سۈرىيەلىك مۇساپىرلار دۆلىتىگە قايتىشقا باشلايدۇ.
جۈملىدىن، گېرمانىيەدىكى نۇرغۇن سۈرىيەلىكلەر چوقۇم ئۆز ئىختىيارلىقى بىلەن سۈرىيەگە قايتىدۇ. بىز ئۇلارنىڭ كۆپ قىسمىنىڭ قايتىشنى خالايدىغانلىقىنى بىلىمىز. بىز بۇنى ئىلگىرى سۈرىمىز ۋە دۆلەتنىڭ تېز سۈرئەتتە قايتا قۇرۇلۇشىغا ياردەم بېرىمىز.»
جىنايەت سادىر قىلغان سۈرىيە پۇقرالىرىنى چېگرادىن قوغلاپ چىقىرىش ۋە قانۇنلۇق سالاھىيىتى ياكى ئولتۇراقلىشىش ئىجازىتى يوقلارنى دۆلەتتىن چىقىرىش مەسىلىلىرىگە جاۋاب بەرگەن مېرز، ھۆكۈمىتىنىڭ بۇ مەسىلىدە قاتتىق پوزىتسىيە تۇتىدىغانلىقىنى تەكىتلەپ مۇنداق دېدى:
«سۈرىيەدىكى ئىچكى ئۇرۇش ئاخىرلاشتى. سۈرىيەلىك مۇساپىرلارنىڭ گېرمانىيەدە سىياسىي پاناھلىق ھوقۇقىغا ئېرىشىشى ئۈچۈن ئەمدى ھېچقانداق سەۋەبمۇ يوق. شۇڭا بىز ئۇلارنى دۆلىتىگە قايتۇرۇشنى باشلىيالايمىز. لېكىن، گېرمانىيەدىكى مۇساپىرلارنىڭ كۆپ قىسمى ئۆز ئىختىيارلىقى بىلەن دۆلىتىگە قايتىپ قايتا قۇرۇش باسقۇچىغا قاتنىشىدۇ، دەپ ئويلايمەن.
بۇ كىشىلەر بولمىسا سۈرىيەنىڭ قايتا قۇرۇلۇشى مۇمكىن ئەمەس. گېرمانىيەدە قېلىشنى رەت قىلغانلار بولسا، ئەلۋەتتە يېقىن كەلگۈسىدە چېگرادىن قوغلاپ چىقىرىلىشى مۇمكىن.»
گېرمانىيە ھازىر 700 مىڭدىن ئارتۇق سۈرىيەلىك مۇساپىرغا ساھىبخانىلىق قىلماقتا. رەسمىي سانلىق مەلۇماتلارغا قارىغاندا، مەڭگۈلۈك ئولتۇراقلىشىش ئىجازىتى بارلار ۋە قوش دۆلەت تەۋەلىكىگە ئىگە بولغانلارنى ئۆز ئىچىگە ئالغاندا گېرمانىيەدىكى سۈرىيەلىك مۇساپىرلارنىڭ سانى تەخمىنەن 1 مىليون 300 مىڭغا يېتىدىكەن.
