ئۇكرائىنا رۇسىيەنىڭ شەنبە (2026-يىلى 7-مارت) كۈنى سەھەردە قىلغان ھۇجۇملىرىدا ئاز دېگەندە ئالتە كىشىنىڭ  جېنىدىن ئايرىلغانلىقىنى ئېلان قىلدى.

رۇسىيەنىڭ خاركىۋ رايونىدىكى بىر ئولتۇراق بىناغا قىلغان ھۇجۇمىدا، خارابىلىكلەردىن بەش كىشىنىڭ جەسىتى تېپىلغان؛ يەنە بىر كىشى دنىپرو (Dnipro) رايونىدا جېنىدىن ئايرىلغان.

خاركىۋ شەھەر باشلىقى ئىگور تېلېخوۋ (Igor Terekhov) بۇنىڭدىن ئىلگىرى قۇتقۇزۇش خادىملىرىنىڭ خاركىۋنىڭ كىيېۋسكىي (Kyivskyi) رايونىدىكى بىر ئولتۇراق بىنادىن ئۈچ كىشىنىڭ جەسىتىنى تاپقانلىقىنى ئېيتقان ئىدى.

خاركىۋ رايونلۇق ھەربىي ئىشلار مەسئۇلى ئولېگ سىنېگۇبوۋ (Oleg Synegubov) نىڭ تېلېگرام (Telegram) دا ئېلان قىلغان ئۇچۇرىغا ئاساسلانغاندا، ھۇجۇمدا 6 ياش ۋە 11 ياشلىق ئىككى ئوغۇل بالا ۋە 17 ياشلىق بىر قىزنى ئۆز ئىچىگە ئالغان 10 كىشى يارىلانغان.

ئۇ قۇتقۇزۇش خادىملىرىنىڭ ھۇجۇمدا «پۈتۈنلەي ۋەيران بولغان» بەش قەۋەتلىك بىنانىڭ خارابىلىكى ئاستىدا قاپسېلىپ قالغان بولۇشى مۇمكىن دەپ ئەندىشە قىلىنىۋاتقان بىر بالىنى ئۆز ئىچىگە ئالغان 10 غا يېقىن كىشىنى ئىزدەۋاتقانلىقىنى بىلدۈردى.

ناتو ئەزاسى پولشا رۇسىيەنىڭ بۇ ھۇجۇمىغا تاقابىل تۇرۇش ئۈچۈن ھەربىي ئايروپىلانلىرىنى ھەرىكەتكە كەلتۈرگەنلىكىنى ئېلان قىلدى.

پولشا قوراللىق قىسىملىرىنىڭ ھەربىي ھەرىكەت قوماندانلىق مەركىزى ئېكس (X) بېتىدە: «رۇسىيەنىڭ ئۇكرائىنا تېررىتورىيەسىگە قىلغان باشقۇرۇلىدىغان بومبا ھۇجۇمى سەۋەبىدىن، ھەربىي ئايروپىلانلار ھاۋا تەۋەلىكىمىزدە ۋەزىپە ئىجرا قىلىشنى باشلىدى» دەپ يازدى.

ئۇكرائىنا مەملىكەت مىقياسىدا ھاۋا ھۇجۇمى ئاگاھلاندۇرۇشى ئېلان قىلدى.

خاركىۋ رايونىنىڭ چۇخۇيىۋ (Chuhuiv) شەھىرىدە، شەھەر باشلىقى گالىنا مىنايېۋا (Galyna Minaeva) بىر ئۆيگە قىلىنغان «دۈشمەننىڭ ئۇچقۇ ھۇجۇمى» دا ئىككى كىشىنىڭ يارىلانغانلىقىنى ئېيتتى.

مۇناسىۋەتلىك ئۇچۇرلارTRT World - Russian drones hit Odessa and Kharkiv, killing at least three amid peace push