رۇسىيە بىلەن ئافغانىستان، موسكۋا رايونىدا ئۆتكۈزۈلگەن خەلقئارا بىخەتەرلىك مۇنبىرى جەريانىدا ھەربىي-تېخنىكىلىق ھەمكارلىق كېلىشىمى ئىمزالىدى.
كېلىشىم، چارشەنبە كۈنى كەچتە رۇسىيە بىخەتەرلىك كېڭىشىنىڭ كاتىپى سېرگېي شويگۇ بىلەن ئافغانىستان مۇداپىئە مىنىستىرى مۇھەممەد ياقۇب تەرىپىدىن ئىمزالاندى.
ياقۇب: «رۇسىيە بىلەن بولغان ئالاقە بىز ئۈچۈن مۇھىم. ئافغانىستان ۋە رۇسىيەنىڭ تارىخىي مۇناسىۋەتلىرى بار ۋە بىز بۇ يۆنىلىشتە ئىلگىرىلەشنى داۋاملاشتۇرۇشنى خالايمىز. ئىككى تەرەپلىك مۇناسىۋەتلەرنى كېڭەيتتۇق» دېدى.
شويگۇ بولسا، غەرب دۆلەتلىرىنىڭ ئافغانىستاننىڭ توڭلىتىپ قويۇلغان مال-مۈلۈكلىرىنى قويۇپ بېرىشى ۋە دۆلەتتىكى 20 يىللىق ھەربىي مەۋجۇتلۇقتىن كېيىن شەھەرەلەرنى قايتىدىن قۇرۇپ چىقىش مەسئۇلىيىتىنى ئۈستىگە ئېلىشى كېرەكلىكىنى ئېيتتى.
شويگۇ: «غەرب دۆلەتلىرىنىڭ توسۇپ قويۇلغان ئافغانىستان مال-مۈلۈكلىرىنى قويۇپ بېرىشى، ئافغانىستاندىكى 20 يىللىق مەۋجۇتلۇقلىرىغا ئالاقىدار مەسئۇلىيەتلىرىنى تولۇق قوبۇل قىلىشى ۋە دۆلەتنىڭ توقۇنۇشتىن كېيىنكى قايتىدىن قۇرۇلۇش يۈكىنى ئۈستىگە ئېلىشى كېرەكلىكىگە ئىشىنىمىز» دېگەن سۆزلەرنى ئىشلەتتى.
كېلىشىم، موسكۋا بىلەن تالىبان ھۆكۈمىتى ئوتتۇرىسىدىكى ئالاقىلار ئاشقان بىر مەزگىلدە تۈزۈلدى.
شويگۇ، مۇشۇ ئاينىڭ بېشىدا قىرغىزىستاننىڭ پايتەختى بىشكەكتە ئۆتكۈزۈلگەن شاڭخەي ھەمكارلىق تەشكىلاتى بىخەتەرلىك كېڭىشى كاتىپلىرى يىغىنىدا، رۇسىيەنىڭ تالىبان بىلەن دىيالوگ ئورناتقانلىقىنى ۋە گۇرۇپپا بىلەن «تولۇق سالاھىيەتلىك بىر شېرىكلىك» نى تەرەققىي قىلدۇرۇۋاتقانلىقىنى ئېيتقان ئىدى.
