تاجىكىستان پىرېزىدېنتلىق مەھكىمىسى ئاخبارات بۆلۈمى دۈشەنبە كۈنى يېقىنقى بىر ھەپتە ئىچىدە قوشنا دۆلەت ئافغانىستاندىن قىلىنغان ئىككى قېتىملىق ھۇجۇمدا بەش كىشىنىڭ ئۆلگەنلىكىنى ۋە بەش كىشىنىڭ يارىلانغانلىقىنى بىلدۈردى.
تەخمىنەن 11 مىليون نوپۇسقا ئىگە، تاغلىق كونا سوۋېت جۇمھۇرىيىتى بولغان تاجىكىستاننىڭ ئافغانىستاندىكى تالىبان ئەمەلدارلىرى بىلەن بولغان مۇناسىۋىتى كۈنسېرى جىددىيلەشمەكتە.
يىراق چېگرا لىنىيەسىدە ھەرىكەت قىلىۋاتقان زەھەرلىك چېكىملىك ئەتكەسچىلىرى ۋە قانۇنسىز ئالتۇن كانچىلىرى توغرىسىدا بۇرۇنمۇ ئاگاھلاندۇرۇش بەرگەن تاجىكىستان ئەمەلدارلىرى، ئۆتكەن ھەپتە ئافغانىستاندىن قىلىنغانلىقى بىلدۈرۈلگەن بىر ئۇچقۇچىسىز ھاۋا ئاپپاراتى ھۇجۇمىدا خىتاينىڭ ئۈچ پۇقراسىنىڭ ئۆلگەنلىكىنى ئېلان قىلدى.
تاجىكىستان پىرېزىدېنتى ئىمامئەلى راھماننىڭ ئاخبارات بۆلۈمى، پىرېزىدېنتنىڭ ھەم ۋەزىيەتنى ھەمدە چېگرا بىخەتەرلىكىنى كۈچەيتىش ئىمكانىيەتلىرىنى مۇزاكىرە قىلىش ئۈچۈن بىخەتەرلىك ئورگانلىرىنىڭ باشلىقلىرى بىلەن ئۇچراشقانلىقىنى بىلدۈردى.
ئاخبارات بۆلۈمى راھماننىڭ «ئافغانىستان پۇقرالىرىنىڭ قانۇنسىز ۋە قۇتراتقۇلۇق ھەرىكەتلىرىنى قاتتىق ئەيىبلەيدىغانلىقىنى ۋە مەسىلىنىڭ ھەل قىلىنىشى ھەمدە ئوخشاش ۋەقەلەرنىڭ تەكرارلىنىشىنىڭ ئالدىنى ئېلىش ئۈچۈن ئۈنۈملۈك تەدبىرلەرنىڭ ئېلىنىشى توغرىسىدا بۇيرۇق چۈشۈرگەنلىكى»نى قەيت قىلدى.
تالىبان تاجىكىستاننىڭ بۇ باياناتى ھەققىدە ھېچقانداق ئىنكاس قايتۇرمىدى.
