فىرانسىيەدە ئاساسىي قانۇن كېڭىشى تەرىپىدىن تەستىقلانغان ۋە «داۋالاش ئامالى بولمىغان ئېغىر كېسەلگە گىرىپتار بولغان قۇرامىغا يەتكەن بىمارلار» نى ئۆز ئىچىگە ئالغان «ئۆلۈمگە ياردەم بېرىش» قانۇنى يولغا قويۇلدى. فىرانسىيە پارلامېنتىدا ئىيۇل ئېيىدا قوبۇل قىلىنغان ۋە ئارقىدىن ئاساسىي قانۇن كېڭىشى تەرىپىدىن بەزى ئەسكەرتىشلەر بىلەن تەستىقلانغان مەزكۇر قانۇن رەسمىي گېزىتتە ئېلان قىلىندى.
ئەسلىگە كېلىشى مۇمكىن بولمىغان قۇرامىغا يەتكەن بىمارلار ئۈچۈن چىقىرىلغان بۇ قانۇن، ئۆتەنازىيە (ئۆزىنى ئۆلتۈرۈۋېلىشقا قولايلىق يارىتىش) نىڭ ئورنىغا «ئۆلۈمگە ياردەم بېرىش» دەپ ئاتالماقتا. ئاساسىي قانۇن كېڭىشى 14-ئاۋغۇستتا تەستىقلىغان بۇ قانۇندا بەزى نۇقتىلارنىڭ ئايدىڭلاشتۇرۇلۇشىنى تەلەپ قىلغان ئىدى.
مەزكۇر قانۇن داۋالاش ئامالى بولمىغان ئېغىر كېسەللىكلەرگە گىرىپتار بولغان 18 ياشتىن يۇقىرى فىرانسىيە پۇقرالىرىنى ۋە ئۇزۇن مۇددەت فىرانسىيەدە ئولتۇراقلاشقان بىمارلارنى ئۆز ئىچىگە ئالىدۇ. داۋالاش ياردىمى ئارقىلىق ھاياتىنى ئاخىرلاشتۇرۇش ھەرىكىتىنىڭ، دوختۇرغا ئىلتىماس قىلغاندىن كېيىن بىمارنىڭ ئۆزى تەرىپىدىن ئەمەلگە ئاشۇرۇلۇشىنى كۆزدە تۇتقان قانۇن، كىشىلەرنىڭ كېسەللىك سەۋەبىدىن ئېغىر ئازاب چىكىشى ۋە ئۆز ئەركىن ئىرادىسى بىلەن قارار بېرىشىنى شەرت قىلىدۇ. بۇ قانۇن ئارقىلىق بىمارنىڭ بۇنى فىزىكىلىق جەھەتتىن قىلىشقا قۇربى يەتمىگەن تەقدىردە، بىر دوختۇر ياكى سېستىرادىن ياردەم ئېلىشىغا يول ئېچىلىدۇ.
