رۇسىيە دۆلەت مۇداپىئە مىنىستىرلىقى، ئۇكرائىنانىڭ خېرسون رايونىغا قاراشلىق ئولېشكى شەھىرىدىكى ئىنسانپەرۋەرلىك ياردەم ھەرىكىتى سەۋەبىدىن خېرسون يۆنىلىشىدە ۋاقىتلىق ئۇرۇش توختىتىشنىڭ باشلانغانلىقىنى بىلدۈردى.
مىنىستىرلىقنىڭ ئېلان قىلغان باياناتىدا، ئولېشكى شەھىرىدىكى ۋەزىيەت ھەققىدە توختالدى.
باياناتتا: «رۇسىيە قوراللىق كۈچلىرى، خېرسون رايونىدىكى ئولېشكى ئولتۇراق رايونىدا تەييارلىنىۋاتقان ئىنسانپەرۋەرلىك ياردەم ھەرىكىتى دائىرىسىدە، خېرسون يۆنىلىشى بويىچە موسكۋا ۋاقتى سائەت 04:00 تىن باشلاپ ئۇرۇش توختىتىشنى كۈچكە ئىگە قىلدى» دېيىلدى.
رۇسىيە باش ئىشتاب باشلىقى ۋالېرىي گېراسېموۋ ئۆتكەن ھەپتە بەرگەن باياناتىدا، خېرسون رايونىدىكى ئولېشكى شەھىرىدە ئېلىپ بېرىلىدىغان ئىنسانپەرۋەرلىك ياردەم ھەرىكىتى مۇناسىۋىتى بىلەن، 27-ئۆكتەبىردىن باشلاپ خېرسون يۆنىلىشىدە ۋاقىتلىق ئۇرۇش توختىتىلىدىغانلىقىنى ئۇقتۇرغان ئىدى.
رۇسىيە دۆلەت مۇداپىئە مىنىستىرلىقى يەنە تۈنۈگۈن ئولېشكى شەھىرى يۆنىلىشىدىكى مىنا تازىلاش خىزمەتلىرىنى داۋاملاشتۇرۇۋاتقانلىقىنى ئېلان قىلغان ئىدى.
