تەخمىنەن 2 مىليون مۇسۇلمان ھاجى، سەيشەنبە كۈنى سەئۇدى ئەرەبىستاننىڭ غەربىدىكى ئاراپات رايونىغا يۈزلەندى.
سەئۇدى ئەرەبىستان رەسمىي خەۋەر ئاگېنتلىقىنىڭ (SPA) يەتكۈزۈشىچە، ئاممىنى تەستىقلانغان پىلانلار بويىچە باشقۇرۇش ئۈچۈن لىنىيەلەر ۋە پىيادىلەر يوللىرى بويىچە ئورۇنلاشتۇرۇلغان بىخەتەرلىك كۈچلىرى تەرىپىدىن ي ھاجىلار كارۋانلىرى يېقىندىن كۆزىتىپ تۇرۇلغان.
ئاگېنتلىق، ھاجىلارنىڭ مىنادىن ئاراپاتقا ئۆتۈش جەريانىدا قاتناشنىڭ ئوڭۇشلۇق ئىلگىرىلىگەنلىكىنى خەۋەر قىلدى.
ھاجىلار ئاراپاتتا پېشىن ۋە ئەسر نامازلىرىنى نەمىرە مەسچىتىدە جەم قىلىپ (بىرلەشتۈرۈپ) ۋە قىسقارتىپ ئوقۇيدۇ.
قۇياش پاتقان چاغدا مۇزدەلىپەگە بارىدۇ ۋە بۇ يەردە شام ۋە خۇپتەن نامازلىرىنى ئوقۇغاندىن كېيىن، ئەتىسى تاڭ ئاتقۇچە كېچىنى شۇ يەردە ئۆتكۈزىدۇ.
ھەج ئىبادىتى، ھاجىلارنىڭ دۈشەنبە كۈنى سەئۇدى ئەرەبىستاننىڭ غەربىدىكى مىناغا يېتىپ بېرىشى بىلەن، ئىبادەتنى قولايلاشتۇرۇشقا قارىتىلغان ئەتراپلىق مۇلازىمەتلەر ۋە بىخەتەرلىك تەدبىرلىرى ئاستىدا رەسمىي باشلانغان ئىدى.
تۆت كۈنلۈك ھەج مۇساپىسى؛ سەيشەنبە كۈنىدىكى ئاراپاتتا تۇرۇش، مۇزدەلىپەدە تۈنەش، سىمۋوللۇق شەيتانغا تاش ئېتىش ۋە مەككىدىكى مەسجىدى ھەرامدا كەئبىنى ۋىدا تاۋاپ قىلىشنى ئۆز ئىچىگە ئالىدۇ.
ھەج، ئىسلام ئېتىقادىنىڭ تۈپ ئۇقۇملىرىنى سىمۋول قىلىدىغان ھەمدە ھەزرىتى ئىبراھىم ۋە ئۇنىڭ ئائىلىسىنىڭ سىناقلىرىنى ئەكىس ئەتتۈرۈشنى مەقسەت قىلغان بىر يۈرۈش ئىبادەتلەردىن تەركىب تاپىدۇ.
سەئۇدى ئەرەبىستان مەسئۇللىرى، 2026-يىللىق ھەج مەۋسۇمى ئۈچۈن ھاجىلارنىڭ ھەرىكىتىنى باشقۇرۇش ۋە مۇقەددەس جايلارغا رۇخسەتسىز كىرىشلەرنىڭ ئالدىنى ئېلىش مەقسىتىدە، كۆزىتىش تېخنىكىلىرى ۋە ئاممىنى نازارەت قىلىش سىستېمىلىرىنى ئۆز ئىچىگە ئالغان تەشكىللەش ۋە بىخەتەرلىك تەدبىرلىرىنى كېڭەيتتى.
