ترامپ ھېچقاچان شى جىنپىڭ بىلەن كۆرۈشۈشنى تەلەپ قىلمىغانلىقىنى، پەقەت تەكلىپ قىلىنغان تەقدىردىلا ئاندىن خىتاينى زىيارەت قىلىدىغانلىقىنى ئېيتتى.
ئامېرىكا پىرېزىدېنتى دونالد ترامپ دۈشەنبە كۈنى ئېلان قىلغان باياناتىدا، خىتاي دۆلەت رەئىسى شى جىنپىڭ بىلەن كۆرۈشۈش پىلانىنىڭ يوقلۇقىنى، خىتايغا بېرىش «ئېھتىماللىقى» نىڭ بارلىقىنى، ئەمما بۇنىڭ پەقەت شى جىنپىڭنىڭ تەكلىپى بىلەنلا ئەمەلگە ئاشىدىغانلىقىنى ئېيتتى.
ترامپ ئاممىۋى ئورتاقلىشىش تور بېتى Truth Social سەھىپىسىدە ئېلان قىلغان باياناتىدا مۇنداق دېدى:
«يالغان خەۋەر تاراتقۇلىرى مېنىڭ خىتاي دۆلەت رەئىسى شى جىنپىڭ بىلەن بىر كۆرۈشۈش پىلانىمنىڭ بارلىقىنى يېزىپتۇ. بۇ توغرا ئەمەس، مېنىڭ بۇنداق پىلانىم يوق. مەن خىتايغا زىيارەتكە بېرىشىم مۇمكىن، ئەمما بۇ پەقەت شى جىنپىڭنىڭ تەكلىپى بىلەنلا بولىدۇ، بۇ تەكلىپ ئاللىقاچان قىلىنىپ بولدى. بولمىسا، قىزىقمايمەن! بۇ ئىشقا كۆڭۈل بۆلگىنىڭلارغا رەھمەت.»
ئامېرىكا مالىيە مىنىستىرى سكوت بېسسېنت بىلەن خىتاي مۇئاۋىن باش مىنىستىرى خې لىفېڭ رىياسەتچىلىك قىلىۋاتقان ئۈچىنچى باسقۇچلۇق ئامېرىكا-خىتاي سودا سۆھبىتى چارشەنبە كۈنىگىچە شىۋېتسىيەنىڭ پايتەختى ستوكھولمدا داۋاملىشىدۇ.
تاموژنا بېجى مەسىلىسىدە ئۇرۇش توختىتىش
«South China Morning Post» گېزىتىنىڭ خەۋىرىگە قارىغاندا، بېيجىڭ بىلەن ۋاشىنگتوننىڭ دۈشەنبە كۈنى ستوكھولمدا باشلانغان سودا سۆھبىتىدە تاموژنا بېجى مەسىلىسىدە ئۇرۇش توختىتىشنىڭ مۇددىتىنى يەنە ئۈچ ئاي ئۇزارتىشى مۆلچەرلەنمەكتە.
ئامېرىكا پىرېزىدېنتى دونالد ترامپ يەكشەنبە كۈنى ئېلان قىلغان باياناتىدا، ھۆكۈمىتىنىڭ خىتاي بىلەن سودا كېلىشىمى ھاسىل قىلىشقا يېقىنلاشقانلىقىنى ئېيتتى، ئەمما تەپسىلاتىنى ئاشكارىلىمىدى.
ترامپ شوتلاندىيەدە ياۋروپا ئىتتىپاقى كومىتېتىنىڭ رەئىسى ئۇرسۇلا ۋون دېر لېيېن بىلەن ئېلىپ بارغان ئۇچرىشىشىدىن بۇرۇن مۇخبىرلارغا: «بىز خىتاي بىلەن بىر كېلىشىم ھاسىل قىلىشقا ناھايىتى يېقىنلاشتۇق. ئەمەلىيەتتە، بىز مەلۇم مەنىدىكى بىر كېلىشىمنى ھاسىل قىلدۇق، ئەمما ئىشلارنىڭ قانداق بولىدىغانلىقىنى كۆرۈپ باقايلى» دېدى.
