تۈركىيە جۇمھۇرىيىتى جۇمھۇر رەئىسى رەجەپ تاييىپ ئەردوغان سەيشەنبە كۈنى نېتانياھۇنى ئۆتكەن ھەپتە قاتاردا «ھاماس» سۆھبەت ئۆمىكىگە قىلىنغان ھۇجۇم سەۋەبىدىن قاتتىق تەنقىد قىلىپ: «نېتانياھۇ گىتلېر بىلەن ئىدېئولوگىيە جەھەتتە تۇغقانغا ئوخشايدۇ» دېدى.
دوھادا يۈز بەرگەن ئىسرائىلىيە ھاۋا ھۇجۇمىدىن كېيىن ئۆتكۈزۈلگەن ئەرەب-ئىسلام دۆلەتلىرى باشلىقلار جىددىي يىغىنىغا قاتناشقاندىن كېيىن سۆز قىلغان ئەردوغان: «گىتلېر ئۆزى قولغا كەلتۈرگەن ئىلگىرىلەشلەرنىڭ تەسىرىدە ئۆزىنى كۈتۈپ تۇرغان مەغلۇبىيەتنى كۆرەلمىگەندەك، نېتانياھۇمۇ ئوخشاش ئاقىۋەتكە دۇچار بولىدۇ» دېدى.
ئەردوغان «ھاماس» سۆھبەت ئۆمىكىگە قىلىنغان ھۇجۇمنى «خەلقئارا سىستېما ۋە قانۇنغا قىلىنغان ئوپئوچۇق بىر مەيدان ئېلىشىش» دەپ ئاتاپ: «ئىسرائىلىيەنى ئىدارە قىلىۋاتقانلار ئۆزلىرىنىڭ رادىكال چۈشەنچىلىرىنى فاشىست ئىدېئولوگىيەسىگە ئايلاندۇرغان بىر قاتىللىق گۇرۇھىدىن باشقا نەرسە ئەمەس» دېدى.
جۇمھۇر رەئىس غەرب دۆلەتلىرىنىڭ پەلەستىننى ئېتىراپ قىلىش مەسىلىسى ھەققىدىمۇ توختىلىپ، بۇنىڭ ئىسرائىلىيەگە بولغان بېسىمنى ئاشۇرىدىغانلىقىنى ئېيتتى ھەمدە بۇ مەسىلىنى بىرلەشكەن دۆلەتلەر تەشكىلاتىدا قايتىدىن كۈنتەرتىپكە كەلتۈرىدىغانلىقىغا ۋەدە بەردى.
ئەردوغان يېقىنلاپ كېلىۋاتقان ب د ت ئومۇمىي كېڭىشى يىغىنىدا «ئىنسانىيەت سېپىنىڭ تېخىمۇ كەڭ قوللاشقا ئېرىشىدىغانلىقى»غا بولغان ئۈمىدىنى ئىپادىلىدى.
لىۋىيەنى قوللاش
ئەردوغان ئاخىرىدا تۈركىيەنىڭ لىۋىيەدىكى دىپلوماتىيەسى ئۈستىدىمۇ توختىلىپ، بۇ دۆلەتنىڭ ئىگىلىك ھوقۇقى ۋە بىرلىكىنى قوغداشنىڭ مۇھىملىقىنى تەكىتلىدى. ئۇ: «بىز لىۋىيەنىڭ ئىگىلىك ھوقۇقى، زېمىن پۈتۈنلۈكى ۋە سىياسىي بىرلىكىنى قوغداشتا قەتئىي ئىرادىگە ئىگىمىز، بارلىق ھەرىكەتلىرىمىز مۇشۇ نىشانلارغا ئاساسەن شەكىللەنمەكتە» دېدى.
ئەردوغان تۈركىيەنىڭ باشتىن-ئاخىر قانۇنلۇق ترابلۇس ھۆكۈمىتىنى قوللاپ كەلگەنلىكىنى، يېقىنقى مەزگىللەردە بولسا لىۋىيەنىڭ شەرقى بىلەن دىپلوماتىك يوللارنى ئېچىشقا تىرىشىۋاتقانلىقىنى بىلدۈرۈپ: «بۇ كۆپ قاتلاملىق دىپلوماتىك تىرىشچانلىقلىرىمىز تۈركىيەنىڭ رايونلۇق ئىستراتېگىيەلىك تەسەۋۋۇرىنىڭ، تىنچلىققا ئېرىشىشتىكى مەقسىتىنىڭ نامايەندىسىدۇر» دېگەنلەرنى قەيت قىلدى.
بۇنىڭدىن باشقا، جۇمھۇر رەئىس بىنغازى ھۆكۈمىتىنىڭ ئەنقەرە بىلەن ترابلۇس ئوتتۇرىسىدا ئىمزالانغان دېڭىز تەۋەلىكى كېلىشىمىنى تەستىقلىشىنىڭ «خەلقئارا قانۇن نۇقتىسىدىن زور بىر غەلىبە» بولىدىغانلىقىنى ئىپادىلىدى.
