تۈركىيە جۇمھۇر رەئىسى رەجەپ تاييىپ ئەردوغان ئامېرىكا پىرېزىدېنتى دونالد ترامپ بىلەن ئۆتكۈزگەن تېلېفون سۆھبىتىنىڭ «ناھايىتى ئۈنۈملۈك، كەڭ دائىرىلىك ۋە سەمىمىي» بولغانلىقىنى بىلدۈردى.

ئەردوغان سۆھبەتتىن كېيىن X ئىجتىمائىي تاراتقۇ سۇپىسىدا ئېلان قىلغان باياناتىدا: «بۈگۈن ئامېرىكا قوشما ئىشتاتلىرى پىرېزىدېنتى، قەدىرلىك دوستۇم ھۆرمەتلىك دونالد ترامپ بىلەن ئۆتكۈزگەن تېلېفون سۆھبىتىمىز ناھايىتى ئۈنۈملۈك، كەڭ دائىرىلىك ۋە سەمىمىي بولدى» دېدى.

«يېقىن كەلگۈسىدە دوستۇم ترامپ بىلەن كۆرۈشۈشنى ئۈمىد قىلىمەن» دېگەن ئەردوغان، بۇ سۆھبەتنىڭ «ھەر ئىككى دۆلەت ئۈچۈن خەيرىلىك نەتىجىلەرنى ئېلىپ كېلىشى»نى تىلىدى.

ئەردوغان ئىككى دۆلەت ئوتتۇرىسىدىكى مۇناسىۋەتلەرنى، بولۇپمۇ مۇداپىئە سانائىتى ۋە سودا ساھەلىرىدە كۈچلەندۈرۈش ھەققىدىكى ئۆزئارا ئىرادىنىڭ قايتا تەكىتلىگەنلىكلىرىنى بىلدۈردى.

ئىككى رەھبەر تۈركىيە-ئامېرىكا ئىككى تەرەپ مۇناسىۋىتى، شۇنداقلا رايون خاراكتېرلىك ۋە خەلقئارالىق ئۆزگىرىشلەرنى ئۆز ئىچىگە ئالغان ھەر خىل مەسىلىلەرنى مۇزاكىرە قىلدى.

ئەردوغان غەززەدىكى ئىنسانپەرۋەرلىك كىرىزىسىنى تىلغا ئېلىپ، ۋەزىيەتنىڭ جىددىيلىكىنى ۋە ئۇ يەرگە ئۈزلۈكسىز ئىنسانپەرۋەرلىك ياردىمى يەتكۈزۈشنىڭ زۆرۈرلۈكىنى تەكىتلىدى.

ئۇزاق مۇددەتلىك تىنچلىقنى ئىشقا ئاشۇرۇش يولىدا ھەمكارلىقنى كۈچەيتىش

ئەردوغان سۆھبەت جەريانىدا، ترامپنىڭ توقۇنۇشلارنى ئاخىرلاشتۇرۇش مەيدانىنى قوللايدىغانلىقىنى بىلدۈرۈپ، ئىران بىلەن سۆھبەتنىڭ قايتا باشلىنىشىغا ۋە رۇسىيە-ئۇكرائىنا ئۇرۇشىنى ئاخىرلاشتۇرۇشقا دائىر تىرىشچانلىقلارنى مەمنۇنىيەت بىلەن قارشى ئالىدىغانلىقىنى ئىپادىلىدى.

ئەردوغان يەنە: «پىرېزىدېنت ترامپنىڭ دۇنيا مىقياسىدا داۋاملىشىۋاتقان توقۇنۇشلار ۋە ئۇرۇشلارنى ئاخىرلاشتۇرۇش يولىدىكى تىرىشچانلىقلىرىنى تەقدىرلەيدىغانلىقىمنى بىلدۈردۈم ھەمدە رايونىمىزدا تىنچلىق، مۇقىملىق ۋە بىخەتەرلىك ئورنىتىش ئۈچۈن تۈركىيەنىڭ كۈچلۈك قوللاشنى نامايان قىلىشقا تەييار ئىكەنلىكىنى تەكىتلىدىم» دېگەنلەرنى سۆزلىرىگە ئىلاۋە قىلدى.

تۈركىيە جۇمھۇر رەئىسى يەنە: «قەدىرلىك دوستۇمنى ئەڭ يېقىن كۈنلەردە تۈركىيەدە كۈتۈۋېلىشتىن ئالاھىدە مەمنۇنىيەت ھېس قىلىدىغانلىقىمنى يەتكۈزدۈم، ئۇمۇ بىزنى ئامېرىكاغا تەكلىپ قىلدى» دېدى.

ئەردوغان تۈركىيەنىڭ سۈرىيەنىڭ زېمىن پۈتۈنلۈكىنى قوغداش ۋە بۇ دۆلەتتە مۇقىملىقنى ئىشقا ئاشۇرۇش ھەققىدىكى قەتئىي ئىرادىسىنى قايتا تەكىتلەپ، ئامېرىكانىڭ سۈرىيەگە يۈرگۈزگەن جازا تەدبىرلىرىنى يېنىكلىتىش تىرىشچانلىقىنىڭ رايون ۋە دۇنيا تىنچلىقىغا تۆھپە قوشىدىغانلىقىنى بىلدۈردى.

باياناتتا يەنە جۇمھۇر رەئىس ئەردوغاننىڭ ترامپنى تۈركىيەدە زىيارەتتە بولۇشقا تەكلىپ قىلغانلىقىمۇ قەيت قىلىندى.

ترامپمۇ ئەردوغان بىلەن بولغان سۆھبىتىنى «ناھايىتى ياخشى ۋە ئۈنۈملۈك» دەپ تەرىپلەپ، رۇسىيە بىلەن ئۇكرائىنا ئوتتۇرىسىدىكى ئۇرۇشنى ئاخىرلاشتۇرۇش ئۈچۈن تۈركىيە جۇمھۇر رەئىسى بىلەن ھەمكارلىشىشنى تەقەززالىق بىلەن كۈتىدىغانلىقىنى بىلدۈردى.

ئامېرىكا پىرېزىدېنتى يەنە ئەردوغاننىڭ «ۋاشىنگتونغا كېلىدىغانلىقى»نى ئېلان قىلدى.