بەش قېتىم «ئالتۇن توپ» مۇكاپاتىغا ئېرىشكەن 41 ياشلىق پورتۇگالىيەلىك چولپان كرىستىيانو رونالدو، جورجىنا رودرىگۇز بىلەن توي قىلغاندىن كېيىن «Vogue» ژۇرنىلىغا بەرگەن باياناتىدا: «بۇ بەلكىم پۇتبول كەسپىي ھاياتىمنىڭ ئاخىرقى يىلى بولۇشى مۇمكىن. مەن ئارقامدا قالتىس بىر مىراس قالدۇرۇشنى خالايمەن» دېدى.
كەلگۈسىنى تولۇق پىلانلاپ بولغانلىقىنى ئېيتقان رونالدو، ئائىلىسى بىلەن تېخىمۇ كۆپ ۋاقىت ئۆتكۈزۈشنى تاقەتسىزلىك بىلەن كۈتۈۋاتقانلىقىنى بىلدۈردى.
ئۇ پۇتبولدىن كېيىن پەيدا بولىدىغان بوش ۋاقىتنى باشقا پائالىيەتلەر بىلەن تولدۇرىدىغانلىقىنى ئېيتىپ، ساياھەت قىلىش، ئۆزى ياخشى كۆرىدىغان پادېل توپىنى ئويناش ۋە 25 يىللىق پىداكارلىقتىن كېيىن قولغا كەلتۈرگەن مۇۋەپپەقىيەتلىرىدىن ھۇزۇرلىنىشنى خالايدىغانلىقىنى بىلدۈردى.
1000 توپ كىرگۈزۈش نىشانى
بۇ ياز پورتۇگالىيە دۆلەت كوماندىسى بىلەن كەسپىي ھاياتىدىكى ئالتىنچى دۇنيا لوڭقىسىغا قاتنىشىپ، توپ كىرگۈزۈش ئارقىلىق يېڭى رېكورت ياراتقان رونالدو، ھازىرغىچە كۇلۇب ۋە دۆلەت كوماندىسىدىكى كەسپىي ھاياتىدا جەمئىي 976 توپ كىرگۈزدى.
مانچېستېر بىرلەشمە كوماندىسى، رېئال مادرىد ۋە يۇۋېنتۇس قاتارلىق داڭلىق كۇلۇبلاردا توپ تەپكەن رونالدو، كەسپىي ھاياتىدا 1000 توپلۇق ئۆتكەلدىن ئۆتۈشنى نىشان قىلماقتا.
سەئۇدى ئەرەبىستاننىڭ «ئەننەسر» كوماندىسى بىلەن بولغان توختامىنىڭ ئاخىرقى يىلىغا قەدەم قويغان رونالدونىڭ بۇ مۇسابىقە پەسلىدىكى ئىپادىسى، ئۇنىڭ بۇ تارىخىي نىشانغا يېتەلەيدىغان-يېتەلمەيدىغانلىقىنى بەلگىلەيدۇ.
