ئەرمېنىيە باش مىنىستىرى نىكول پاشىنيان مۇخبىرلارنى كۈتۈۋېلىش يىغىنى ئۆتكۈزۈپ، ئەرمېنىيەنىڭ گۈمرۈ شەھىرىگە جايلاشقان رۇسىيەنىڭ 102-ھەربىي بازىسى توغرىسىدا توختالدى.
پاشىنيان مەزكۇر بازا مەسىلىسىنى ئەرمېنىيەنىڭ ئەمەس، بەلكى رۇسىيەنىڭ مۇنازىرىگە ئاچقانلىقىنى ئەسكەرتىپ: «بۇ ھەربىي بازا ئەرمېنىيەنىڭ خەۋپسىزلىكى ئۈچۈن ناھايىتى زور ئەھمىيەتكە ئىگە ئەمەس» دېدى.
پاشىنيان رۇسىيە ھەربىي بازىسىنىڭ ئەرمېنىيەنىڭ خەۋپسىزلىكىگە ھېچقانداق تۆھپە قوشمىغانلىقىغا دىققەت تارتىپ، ئېلان قىلغان باياناتىدا مۇنداق دېدى:
«رۇسىيە بىزنىڭ دوست دۆلىتىمىز، ئەمما بىزنىڭ رۇسىيە ھەربىي بازىسىغا ئېھتىياجىمىز يوق. ئەگەر ئۇلار چىقىپ كېتىشنى خالىسا، مەرھەمەت، ئەتە يىغىشتۇرۇپ چىقىپ كەتسۇن. لېكىن قېلىشنى خالىسا، ئەرمېنىيە ئۈچۈن زۆرۈر بولمىغان بىر بازىنىڭ قېلىش شەرتلىرىنى سۆھبەتلىشىشكە تەييارمىز.»
ئەرمېنىيەنىڭ گۈمرۈ شەھىرىدىكى 102-رۇس ھەربىي بازىسى رۇسىيەنىڭ جەنۇبىي كاۋكاز رايونىدىكى ئاساسلىق ھەربىي كۈچلىرىنىڭ بىرى سۈپىتىدە تونۇلغان بولۇپ، 1995-يىلى ئىمزالانغان كېلىشىمگە ئاساسەن ۋەزىپە ئۆتەۋاتىدۇ. مەزكۇر بازىدا قۇرۇقلۇق ئارمىيە قىسىملىرىدىن باشقا يەنە ھاۋا مۇداپىئە قوراللىرى ۋە ئۇرۇش ئايروپىلانلىرىمۇ بار.
رۇسىيە پىرېزىدېنتى ۋلادىمىر پۇتىن ئالدىنقى ھەپتىلەردە مەزكۇر بازا ھەققىدە توختىلىپ: «ئەگەر ئەرمېنىيە بۇ ئۇل ئەسلىھەگە ئېھتىياجى يوقلۇقىنى قارار قىلسا، بىز ئەتە بولسىمۇ بۇ يەردىن ئايرىلىمىز» دېگەن ئىدى.
