ئامېرىكا دېڭىز ئارمىيەسى ئىككى قېتىملىق ۋەقەنىڭ سەۋەبلىرىنىڭ تەكشۈرۈلۈۋاتقانلىقىنى ئېيتتى.

تىنچ ئوكيان فىلوتى يەكشەنبە كۈنى چۈشتىن كېيىن، «USS Nimitz» ناملىق ئاۋىياماتكاغا تەۋە بىر ئۇرۇش ئايروپىلانى ۋە بىر تىك ئۇچارنىڭ جەنۇبىي خىتاي دېڭىزىدا 30 مىنۇت ئىچىدە ئارقا – ئارقىدىن چۈشۈپ كەتكەنلىكىنى جاكارلىدى.

فىلوت تەرىپىدىن ئېلان قىلغان باياناتتا قەيت قىلىنىشىچە، «MH-60R Sea Hawk» تىپلىق تىك ئۇچارىدىكى ئۈچ خىزمەتچى قۇتۇلدۇرۇلغان، « F/A-18F Super Hornet »  تىپلىق ئۇرۇش ئايروپىلانىدىكى ئىككى ئۇچقۇچى ئاتلىما ئورۇندۇقنى ئىشلىتىش ئارقىلىق بىخەتەر قۇتۇلدۇرۇلغان بولۇپ، بەش خىزمەتچى خادىمنىڭ سالامەتلىك ئەھۋالى ياخشى ئىكەن.

باياناتتا ئەسكەرتىلىشىچە، ئىككى قېتىملىق ۋەقەنىڭ سەۋەبلىرى تەكشۈرۈلمەكتە ئىكەن.

«USS Nimitz» ناملىق ئاۋىياماتكا ياز بويى يەمەندىكى ھۇسىيلارنىڭ سودا پاراخوتلىرىغا قىلغان ھۇجۇملىرىغا قارشى ئامېرىكانىڭ پوزىتسىيەسى دائىرىسىدە ئوتتۇرا شەرق رايونىدا ۋەزىپە ئۆتىگەندىن كېيىن، ۋاشىنگتون ئىشتاتىدىكى دېڭىز ئارمىيە بازىسى كىتساپتىكى ئاساسلىق پورتىغا قايتىۋاتاتتى.

بۇ، ئاۋىياماتكانىڭ مۇلازىمەتتىن قالدۇرۇلۇشتىن ئىلگىرىكى ئەڭ ئاخىرقى ۋەزىپىسى ئىدى.

«USS Harry S Truma» ناملىق يەنە بىر ئاۋىياماتكامۇ ئالدىنقى ئايلاردا ئوتتۇرا شەرق رايونىدا ۋەزىپە ئۆتەش جەريانىدا بىرنەچچە قېتىم تاسادىپىي ئەھۋالغا دۇچ كەلگەنىدى.

 دېكابىر ئېيىدا، «USS Gettysburg» ناملىق باشقۇرۇلىدىغان بومبا پاراخوتى خاتا ھالدا ترۇمان ئاۋىياماتكاسىنىڭ «F/A-18» تىپلىق باشقا بىر ئۇرۇش ئايروپىلانىنى ئېتىپ چۈشۈرگەن، ئاپرېل ئېيىدا بولسا، باشقا بىر «F/A-18» تىپلىق ئۇرۇش ئايروپىلانى ترۇمان ئاۋىياماتكاسىنىڭ ئايروپىلان توختىتىش ئامبىرىدىن چۈشۈپ، قىزىل دېڭىزغا چۈشۈپ كەتكەنىدى.

ماي ئېيىدا، قىزىل دېڭىزدىكى ئاۋىياماتكاغا قونغان «F/A-18» تىپلىق بىر ئۇرۇش ئايروپىلانى، قونغان ئايروپىلانلارنى توختىتىش ئۈچۈن ئىشلىتىلىدىغان پولات سىملارنى تۇتۇۋالالمىغانلىقتىن دېڭىزغا چۈشۈپ كەتكەن، ئىككى ئۇچقۇچى ئاتلىما ئورۇندۇقنى ئىشلىتىش ئارقىلىقلا قۇتۇلۇپ قالغانىدى.

بۇ ۋەقەلەرنىڭ ھېچقايسىدا ئادەم ئۆلۈش ئەھۋالى كۆرۈلمىگەن بولۇپ، ۋەقەلەرنىڭ تەكشۈرۈلۈش نەتىجىسى تېخىچە ئېلان قىلىنمىدى.