بۇ ھەقتىكى خەۋەرلەر، غەززە سەھىيە مىنىستىرلىقى ۋە بىرلەشكەن دۆلەتلەر تەشكىلاتىنىڭ 10 – ئۆكتەبىردە كۈچكە ئىگە بولغان ئۇرۇش توختىتىش كېلىشىمىگە قارىماي، قىرغىنچىلىقلارنىڭ داۋاملىشىۋاتقانلىقى، 340 تىن ئارتۇق پەلەستىنلىكنىڭ ھاياتىدىن ئايرىلغانلىقى، تەخمىنەن 900 كىشىنىڭ يارىلانغانلىقى توغرىسىدا ئاگاھلاندۇرۇش بېرىشىدىن كېيىن ئوتتۇرىغا چىقتى.
ئىسرائىلىيە ئارمىيەسى ئۇرۇش توختىتىش كېلىشىمىگە خىلاپلىق قىلىش قىلمىشلىرىنى كۆپەيتىپ، غەززەدە ئۆزىنىڭ كونتروللۇقىدىكى رايونلاردا ئۆيلەرنى چېقىپ تاشلىدى، پەلەستىنلىكلەرنى توپقا تۇتتى.
ئانادولۇ ئاگېنتلىقىغا مەلۇمات بەرگەن گۇۋاھچىلار، ئىسرائىلىيە ئارمىيەسىنىڭ غەززە شەھىرىنىڭ شىمالىغا جايلاشقان ھەربىي رايوندىكى شۇجائىييە مەھەللىسىدە بىرنەچچە تۇرالغۇنى پارتلىتىۋەتكەنلىكىنى ئېيتتى.
جەنۇبتا بولسا گۇۋاھچىلار، ئىسرائىلىيە زەمبىرەكلىرىنىڭ سېرىق لىنىيەنىڭ سىرتىدىكى خان يۇنۇسنىڭ شەرقىي قىسىملىرىغىمۇ چۈشكەنلىكىنى بىلدۈردى.
ماددىي زىياننىڭ كۆلىمى ھەققىدە قوشۇمچە مەلۇماتقا ئېرىشىش مۇمكىن بولمىدى.
غەززە خەلق مۇداپىئە ئىدارىسىنىڭ بىلدۈرۈشىچە، دۈشەنبە كۈنى كەچتە غەززە شەھىرىنىڭ ناسىر مەھەللىسىدىكى بىر ئۆينىڭ ئىچىدە ئىسرائىلىيەگە تەۋە بىر پارتلاتقۇچنىڭ پارتلىشى نەتىجىسىدە ئىككى پەلەستىنلىك ھاياتىدىن ئايرىلغان، بىرنەچچە كىشى يارىلانغان.
پەلەستىننىڭ بىرلەشكەن دۆلەتلەر تەشكىلاتىدا تۇرۇشلۇق ۋەكىلى رىياد مەنسۇر دۈشەنبە كۈنى خەۋپسىزلىك كېڭىشىدە بەرگەن باياناتىدا، ئۇرۇش توختىتىش 10 – ئۆكتەبىردە كۈچكە ئىگە بولغاندىن بۇيان، ئىسرائىلىيە ئارمىيەسىنىڭ غەززەدە ھەر كۈنى ئىككى پەلەستىنلىك بالىنى ئۆلتۈرگەنلىكىنى، يارىلانغانلار ۋە ئۆلگەنلەر سانىنىڭ 1000 غا يەتكەنلىكىنى ئېيتتى.
غەززە سەھىيە مىنىستىرلىقىنىڭ بىلدۈرۈشىچە، ئۇرۇش توختىتىش باشلانغاندىن بۇيان ئىسرائىلىيە ئارمىيەسىنىڭ ھۇجۇملىرى نەتىجىسىدە كەم دېگەندە 342 پەلەستىنلىك ھاياتىدىن ئايرىلغان، تەخمىنەن 900 كىشى يارىلانغان.
2023 – يىلى ئۆكتەبىردىن بۇيان ئىسرائىلىيە ئارمىيەسى غەززەدە كۆپىنچىسى ئاياللار ۋە بالىلاردىن تەشكىل تاپقان تەخمىنەن 70 مىڭ كىشىنى ئۆلتۈردى، رايوننىڭ كۆپ قىسمىنى خارابىلىككە ئايلاندۇرۇۋەتكەن ئىككى يىللىق ئىرقىي قىرغىنچىلىق ئۇرۇشىدا 170 مىڭ 900 دىن ئارتۇق كىشىنى يارىلاندۇردى.
