ئىسرائىلىيە ئارمىيەسىگە تەۋە ئۇرۇش ئايروپىلانلىرى سۈرىيەنىڭ شىمالىدىكى ئىدلىب ۋىلايىتىنىڭ شەرقىگە جايلاشقان، تاشلاندۇق ئەبۇ زۇھۇر ھەربىي ئايرودۇرۇمىنى بومباردىمان قىلدى.
يەرلىك مەنبەلەرنىڭ بىلدۈرۈشىچە، ھۇجۇم شۇ جاي ۋاقتى سائەت 03:00 ئەتراپىدا ئېلىپ بېرىلغان بولۇپ، ئايرودۇرۇم جەمئىي تۆت قېتىم بومباردىمان قىلىنغان. ھازىرچە ھۇجۇمدا ئادەم ئۆلۈش ياكى يارىلىنىش ئەھۋالىنىڭ كۆرۈلۈپ كۆرۈلمىگەنلىكى ھەققىدە ئېنىق مەلۇمات بېرىلمىدى، سۈرىيە دائىرىلىرىمۇ ۋەقەگە قارىتا تېخىچە بايانات ئېلان قىلمىدى.
بەششار ئەسەد ھاكىمىيىتى ئاغدۇرۇلۇشتىن ئىلگىرى، ئىسرائىلىيە ئاساسلىقى سۈرىيەدىكى ئىران كۈچلىرى ۋە ھىزبۇللاھنىڭ بازىلىرىنى نىشانلاپ كەلگەن ئىدى، ھاكىمىيەت ئاغدۇرۇلغاندىن كېيىن ھۇجۇم دائىرىسىنى پۈتۈن سۈرىيە مىقياسىدىكى ئىستراتېگىيەلىك نۇقتىلارغا، بولۇپمۇ قورال ۋە باشقۇرۇلىدىغان بومبا ئىسكىلاتلىرىغا كېڭەيتتى.
