باكۇ ھەيدەر ئەلىيېۋ خەلقئارا ئايرودۇرۇمىدا، قازاقىستاننىڭ ئاقتاۋ شەھىرى ئەتراپىدا چۈشۈپ كەتكەن ئايروپىلان ۋەقەسى توغرىسىدا ئاخبارات ئېلان قىلىش يىغىنى ئۆتكۈزۈلدى.

يىغىندا، باكۇ-گروزنى ھاۋا بوشلۇقىدا كېتىۋاتقان يولۇچىلار ئايروپىلانىنىڭ قۇش توپىغا سوقۇلۇپ كەتكەنلىكى، ئايروپىلاننىڭ چۈشۈپ كېتىشتىن بۇرۇن تۇمان سەۋەبىدىن رۇسىيەنىڭ داغىستان رايونىدىكى ماخاچقەلئە شەھىرىگە يۈزلەندۈرۈلگەنلىكى قەيت قىلىندى.

ئەزەربەيجان ھاۋا يوللىرى شىركىتىنىڭ باياناتچىسى فەرىد ھۈسەينوۋ، ئايروپىلاندا 5 خادىم ۋە 62 يولۇچى بولۇپ جەمئىي 67 كىشىنىڭ بارلىقىنى بىلدۈردى.

ھۈسەينوۋ يولۇچىلارنىڭ 37 سىنىڭ ئەزەربەيجان، 16 سىنىڭ رۇسىيە، 6 سىنىڭ قازاقىستان، 3 ىنىڭ قىرغىزىستان پۇقراسى ئىكەنلىكىنى ئەسكەرتتى.

يەنە بىر تەرەپتىن، ئەزەربەيجان باش تەپتىش مەھكىمىسىنىڭ مەسئۇلى كەنان زەينالوۋ، دەسلەپكى تەكشۈرۈشلەرگە كۆرە ۋەقەدە 32 كىشىنىڭ قۇتقۇزۇۋېلىنغانلىقى ۋە داۋالىنىۋاتقانلىقىنى ئېيتتى.

ئەزەربەيجان پىرېزىدېنت مەھكىمىسى تەرىپىدىن ئېلان قىلىنغان باياناتتا، پىرېزىدېنت ئىلھام ئەلىيېۋنىڭ ئايروپىلان ۋەقەسىدە كۆپ ساندىكى كىشىلەرنىڭ ھاياتىدىن ئايرىلىشى ۋە يارىلىنىشى سەۋەبىدىن، 26-دېكابىر (بۈگۈن) بىر كۈنلۈك دۆلەتلىك ماتەم ئېلان قىلىش قارارى چىقارغانلىقى، ھەمدە رۇسىيە زىيارىتىنى بىكار قىلغانلىقى بىلدۈرۈلدى.

ئەلىيېۋنىڭ مۇستەقىل دۆلەتلەر بىرلەشمە گەۋدىسى دۆلەت باشلىقلىرى غەيرىي رەسمىي يىغىنىغا قاتنىشىش ئۈچۈن رۇسىيەنىڭ سايت پېتېرسبۇرگ شەھىرىدە زىيارەتتە بولۇشى پىلانلانغانىدى.