تاراتقۇلارنىڭ خەۋىرىگە قارىغاندا، ئامېرىكا قوشما ئىشتاتلىرى ئاۋام پالاتاسى دۈشەنبە كۈنى بارلىق پالاتا خادىملىرىغا ئۇقتۇرۇش تارقىتىپ، ھۆكۈمەت تەرىپىدىن تارقىتىلغان ئۈسكۈنىلەردە مېتا شىركىتىنىڭ ۋاتسئەپ ئۇچۇرلىشىش سۇپىسىنى ئىشلىتىشنى چەكلىگەن.

ئاۋام پالاتاسىنىڭ باش مەمۇرىي ئىشلار ئىشخانىسى ئەۋەتكەن ئۇقتۇرۇشتا: «تور بىخەتەرلىك ئىشخانىسى، ۋاتسئەپنىڭ ئىشلەتكۈچى سانلىق مەلۇماتلىرىنى قوغداشتا ئاشكارىلىقنىڭ كەمچىل بولۇشى، ساقلانغان سانلىق مەلۇماتلارنىڭ شىفىرلانماسلىقى ۋە ئىشلىتىشكە مۇناسىۋەتلىك يوشۇرۇن بىخەتەرلىك خەۋپى سەۋەبلىك ئىشلەتكۈچىلەر ئۈچۈن كۈچلۈك خەۋپ بار، دەپ قارىدى» دېگەن ئىبارىلەر ئورۇن ئالغان.

پالاتانىڭ ئۇقتۇرۇشىدا يەنە خىزمەتچى خادىملارنىڭ ئامازون شىركىتىنىڭ  Wickr، ئالما شىركىتىنىڭ iMessage  ۋە  FaceTime ، مىكروسوفت شىركىتىنىڭ Teams سۇپىسى ۋە سىگنال (Signal) قاتارلىق باشقا ئۇچۇرلىشىش ئەپلىرىنى ئىشلىتىشى تەۋسىيە قىلىنغان.

مېتا شىركىتىنىڭ باياناتچىسى بايانات ئېلان قىلىپ، شىركەتنىڭ بۇ قارارغا «ئەڭ كۈچلۈك شەكىلدە» قارشى تۇرىدىغانلىقىنى بىلدۈرۈش بىلەن بىرگە، ۋاتسئەپ سۇپىسىنىڭ پالاتا ئۇقتۇرۇشىدا تەستىقلانغان باشقا ئەپلەرگە قارىغاندا تېخىمۇ يۇقىرى بىخەتەرلىك سەۋىيەسى بىلەن تەمىنلەيدىغانلىقىنى ئوتتۇرىغا قويدى.

يانۋار ئېيىدا، بىر ۋاتسئەپ ئەمەلدارى ئىسرائىلىيەلىك جاسۇسلۇق يۇمشاق دېتال شىركىتى Paragon Solutions  نىڭ مۇخبىرلار ۋە پۇقرالار جەمئىيىتى ئەزالىرىنىمۇ ئۆز ئىچىگە ئالغان نۇرغۇنلىغان ۋاتسئەپ ئىشلەتكۈچىلىرىنى نازارەت ئوبيېكتى قىلغانلىقىنى ئېيتقان ئىدى.

2022-يىلى پالاتا بىخەتەرلىك مەسىلىسى سەۋەبىدىن بارلىق خىزمەتچى خادىملارنىڭ تىكتوك (TikTok)  ئىجتىمائىي تاراتقۇ سۇپىسىنى ئىشلىتىشىنى چەكلىگەن ئىدى.