تۈركىيە ئىتالىيەدىن يولغا چىقىپ غەززەگە قاراپ كېتىۋاتقان ياردەم فىلوتىغا گىرېتسىيە ئوچۇق دېڭىز تەۋەلىكىدە ئىسرائىلىيە تەرىپىدىن قانۇنسىز رەۋىشتە ھۇجۇم قىلىنىشىنى «دېڭىز قاراقچىلىقى ھەرىكىتى» دەپ سۈپەتلىدى.
تۈركىيە تاشقى ئىشلار مىنىستىرلىقى تەرىپىدىن بۇ ھەقتە ئېلان قىلىنغان باياناتتا مۇنداق دېيىلدى:
«ئىسرائىلىيە غەززەدىكى مەزلۇملار دۇچ كېلىۋاتقان ئىنسانىي پاجىئەگە دىققەت تارتىشقا تىرىشىۋاتقان خەلقئارا سۇمۇد فىلوتىغا ھۇجۇم قىلىش ئارقىلىق، ئىنسانىي قىممەت قاراشلارنى ۋە خەلقئارا قانۇننى نىشان قىلدى.
دەرۋەقە، ئىسرائىلىيەنىڭ بۇ تاجاۋۇزچىلىقى يەنە خەلقئارا سۇ تەۋەلىكىدىكى ئەركىن قاتناش ھوقۇقىنى دەپسەندە قىلغانلىق ھېسابلىنىدۇ.
ئىسرائىلىيەنىڭ بۇ قانۇننى كۆزگە ئىلمىغان قىلمىشىغا قارشى خەلقئارا جەمئىيەتنى ئورتاق پوزىتسىيە تۇتۇشقا چاقىرىمىز.
فىلوتتىكى پۇقرالىرىمىزنىڭ ۋە باشقا يولۇچىلارنىڭ ئەھۋالى توغرىسىدا مۇناسىۋەتلىك باشقا دۆلەتلەر بىلەن بىرلىكتە زۆرۈر بولغان بارلىق تىرىشچانلىقلار كۆرسىتىلمەكتە.»
ئىسرائىلىيەنىڭ ھۇجۇمىغا ئۇچرىغان فىلوت تەرىپىدىن پەيشەنبە كۈنى ئەتىگەندە ئېلان قىلىنغان باياناتتا، ئىسرائىلىيە دېڭىز ئارمىيەسىنىڭ پاراخوتلارنىڭ موتورلىرىنى كاردىن چىقارغانلىقى ۋە يول باشلاش سىستېمىلىرىنى ۋەيران قىلغانلىقى، بۇ سەۋەبتىن يۈزلەرچە كىشىنىڭ قاپسىلىپ قالغانلىقى بىلدۈرۈلدى.
خەلقئارا سۇمۇد فىلوتىنىڭ تەشكىللەش بۆلۈمى، گىرېتسىيەنىڭ كىرىت ئارىلىغا يېقىن خەلقئارا سۇ تەۋەلىكىدە ئىسرائىلىيە ئارمىيەسى پاراخوتلىرىنىڭ غەززەگە ياردەم پاراخوت ئەترىتىنى قورشاۋ ئاستىغا ئالغانلىقىنى، ئالاقىنى ئۈزۈپ تاشلىغانلىقىنى، بۇنىڭ نەتىجىسىدە 11 پاراخوت بىلەن ئالاقىنىڭ ئۈزۈلۈپ قالغانلىقىنى ئاشكارىلىدى.
400 دىن ئارتۇق پۇقرا ئولتۇرغان فىلوت غەززەگە ئىنسانىي دېڭىز كارىدورى ئېچىشنى ۋە قورشاۋ ئاستىدىكى رايونغا ياردەم يەتكۈزۈشنى نىشان قىلغان ئىدى. غەززە 2007-يىلىدىن بۇيان ئىسرائىلىيەنىڭ قورشاۋى ئاستىدا تۇرماقتا.
ئىسرائىلىيەنىڭ غەززە قورشاۋىنى بۇزۇپ تاشلاشنى ۋە بۇ يەرگە ئىنسانىي ياردەم توشۇشنى مەقسەت قىلغان خەلقئارا سۇمۇد فىلوتىنىڭ «2026-يىللىق باھار ئەترىتى»، ئىتالىيەنىڭ سىسىلىيە ئارىلىدىكى ئەڭ ئاخىرقى تەييارلىقلىرىنى تاماملاپ، 26-ئاپرېل كۈنى ئاقدېڭىزغا قاراپ يولغا چىققان ئىدى.
2023-يىلى ئۆكتەبىردە باشلانغان ئىسرائىلىيەنىڭ غەززەگە قوزغىغان ئىرقىي قىرغىنچىلىق ئۇرۇشى رايوننىڭ ۋەزىتىنى تېخىمۇ ئېغىرلاشتۇرۇۋەتتى؛ جۈملىدىن، كەم دېگەندە 72 مىڭ 600 پەلەستىنلىكنىڭ ھاياتىدىن ئايرىلىشىغا، 172 مىڭ 400 دىن ئارتۇق پەلەستىنلىكنىڭ يارىلىنىشىغا ۋە پۇقراۋى ئۇل ئەسلىھەلەرنىڭ تەخمىنەن %90 ىگە تەسىر كۆرسەتكەن كەڭ كۆلەملىك ۋەيرانچىلىققا سەۋەب بولدى.
2025-يىلى ئۆكتەبىردىن بۇيان يولغا قويۇلۇۋاتقان ئۇرۇش توختىتىش كېلىشىمىگە قارىماي، ئىسرائىلىيە غەززەگە قاراتقان ھۇجۇملىرىنى داۋاملاشتۇردى ۋە قورشاۋ ئاستىدىكى رايونغا ئىنسانىي ياردەملەرنىڭ كىرىشىنى چەكلىدى.
