فرانسىيەنىڭ مېئۇرت-ئې-موسېل ۋىلايىتىدە Mirage 2000D تىپلىق بىر ئۇرۇش ئايروپىلانىنىڭ چۈشۈپ كەتكەنلىكى ۋە بىر كىشىنىڭ ھاياتىدىن ئايرىلغانلىقى ئۇقتۇرۇلدى.
فرانسىيە دۆلەت مۇداپىئە مىنىستىرلىقى تەرىپىدىن ئېلان قىلىنغان باياناتتا، تۈنۈگۈن شۇ يەرنىڭ چاقتى سائەت 22:40 تا دۆلەتنىڭ شەرقىي شىمالىدىكى مېئۇرت-ئې-موسېل ۋىلايىتىگە قاراشلىق روگېۋىل شەھىرىدە، فرانسىيە ھاۋا ۋە ئالەم ئارمىيەسىگە تەۋە Mirage 2000D تىپلىق ئۇرۇش ئايروپىلانىنىڭ چۈشۈپ كەتكەنلىكى بىلدۈرۈلدى.
باياناتتا، ئايروپىلاننىڭ نانسى-ئوچېي 133 ھاۋا ئارمىيە بازىسىغا ئورۇنلاشتۇرۇلغان كۈرەشچى ئايروپىلانلار ئەترىتى تەركىبىدە ئىكەنلىكى ۋە ۋەزىپىدىن قايتىش سەپىرىدە قازاغا ئۇچرىغانلىقى قەيت قىلىندى.
ئايروپىلاندا بىرى ئۇچقۇچى، يەنە بىرى قورال سىستېمىلىرى ئوفىتسېرى بولۇپ جەمئىي 2 كىشىنىڭ بارلىقىغا دائىر ئۇچۇر ھەمبەھرىلەنگەن باياناتتا يەنە، ئىزدەش-قۇتقۇزۇش خىزمەتلىرىدىن كېيىن بىر كىشىنىڭ جەسىتىنىڭ تېپىلغانلىقى ۋە كىملىكىنى ئېنىقلاش خىزمەتلىرىنىڭ داۋاملىشىۋاتقانلىقى ئۇقتۇرۇلدى.
باياناتتا يەنە، ۋەقەنىڭ سەۋەبىگە ئالاقىدار ئەدلىيە ۋە خەۋپسىزلىك تەكشۈرۈشلىرىنىڭ ئېلىپ بېرىلىۋاتقانلىقى بىلدۈرۈلدى.
