ئىسرائىلىيە ساقچىلىرى مۇسۇلمانلارنىڭ رايونغا كىرىشىگە توسقۇنلۇق قىلماقتا.

ئىسرائىلىيە ساقچىلىرىنىڭ ئاشقۇن گۇرۇپپىلار ئادەم سانىنىڭ 150 كە يېتىشىگە رۇخسەت قىلىشىغا ئەگىشىپ، مەسجىدى ئەقساغا بېسىپ كىرگەن ئىسرائىلىيەلىكلەرنىڭ سانىنىڭ 1300 دىن ئاشقانلىقى، شۇنداقلا ئىسرائىلىيەلىكلەرنىڭ ئەقساغا كېلىشنى ئىزچىل داۋاملاشتۇرۇۋاتقانلىقى قەيت قىلىندى.

ئىسرائىلىيە ساقچىلىرىنىڭ مەسجىدى ئەقسانىڭ دەرۋازىلىرىدا ۋە قەدىمكى شەھەر (قۇددۇس كونا شەھەر رايونى) ئەتراپىدا بىخەتەرلىك تەدبىرلىرىنى كۈچەيتكەنلىكى ھەمدە مۇسۇلمانلارنىڭ ئىبادەت قىلىش ئۈچۈن مەسجىدى ئەقساغا كىرىشىگە توسقۇنلۇق قىلىۋاتقانلىقى مەلۇم قىلىندى.

بامدات نامىزى مەزگىلىدە ئىنتايىن ئاز ساندىكى مۇسۇلماننىڭلا ئەقساغا كىرەلىگەنلىكى تىلغا ئېلىنغان باياناتتا، ئىسرائىلىيە ساقچىلىرىنىڭ مۇسۇلمانلارنى ئۇرۇپ زوراۋانلىق قىلغانلىقى قەيت قىلىندى.

مەسجىدى ئەقسانىڭ ھويلىلىرىغا نۇرغۇن ئىسرائىلىيە ئەسكىرىنىڭ ئورۇنلاشتۇرۇلغانلىقى بىلدۈرۈلدى.

ئاشقۇن ئىسرائىلىيەلىكلەرنىڭ مەسجىدى ئەقسانىڭ ھويلىسىدا دىنىي مۇراسىملارنى ئۆتكۈزگەنلىكىگە ئىشارەت قىلىنغان مەزكۇر باياناتتا، مەسچىتكە بېسىپ كىرگەن ئاشقۇن گۇرۇپپىلارنىڭ ئادەم سانىنى 5 مىڭغا يەتكۈزۈش نىشانى بىلەن باشقىلارنىمۇ ئەقساغا بېسىپ كىرىشكە چاقىرىق قىلغانلىقى قەيت قىلىندى.

بۇ بېسىپ كىرىش ھەرىكىتىگە باش مىنىستىر بېنيامىن نېتانياھۇنىڭ پارتىيەسى «لىكۇد»[1]نىڭ پارلامېنت ئەزاسى ئامىت ھالېۋى (Amit Halevi) نىڭمۇ قاتناشقانلىقى قەيت قىلىندى.

پەلەستىن زېمىنلىرىنى زومىگەرلىك بىلەن تارتىۋالغان ئىسرائىلىيەلىك گۇرۇپپىلار، يەھۇدىيلارنىڭ دىنىي خاتىرە كۈنى بولغان «تىشا باۋ» [2] مۇناسىۋىتى بىلەن ئەقساغا كەڭ كۆلەمدە باستۇرۇپ كىرىشكە چاقىرىق قىلغانىدى.

ئىزاھاتلار:

[1] لىكۇد (Likud): ئىسرائىلىيەدىكى ئوڭچىل مۇتەئەسسىپ سىياسىي پارتىيە بولۇپ، بېنيامىن نېتانياھۇ رەھبەرلىكىدىكى ھۆكۈمەت بېشىدىكى ئاساسلىق پارتىيەدۇر.

[2] تىشا بئاۋ (Tisha B'Av): يەھۇدىيلارنىڭ تارىخىدىكى بىرىنچى ۋە ئىككىنچى ئىبادەتخانىنىڭ ۋەيران قىلىنىشى قاتارلىق پاجىئەلەرنى خاتىرىلەيدىغان ماتەم ۋە روزا تۇتۇش كۈنى.