پاكىستان باش مىنىستىرى شاھباز شېرىف پەيشەنبە كۈنى ئېلان قىلغان باياناتىدا، ئوتتۇرا شەرقتىكى ئۇرۇشنى ئاخىرلاشتۇرۇش ئۈچۈن ئامېرىكا بىلەن ئىران ئوتتۇرىسىدا ئىمزالانغان كېلىشىم لايىھەسىنىڭ، تېھراننىڭ ھورمۇز بوغۇزىنى «دەرھال» قايتا ئاچىدىغانلىقى ۋە ئىران پورتلىرىغا قارىتىلغان ئامېرىكا قامالىنىڭ «دەرھال» ئاخىرلىشىدىغانلىقىدىن دېرەك بېرىدىغانلىقىنى بىلدۈردى.
شېرىف ئاممىۋى ئورتاقلىشىش تور بېتى X سەھىپىسىدە ئېلان قىلغان باياناتىدا: «تارىخىي <ئىسلامئاباد كېلىشىم لايىھەسى> دەرھال يولغا قويۇلىدۇ ۋە بىرىنچى قەدەم سۈپىتىدە ئىران ئىسلام جۇمھۇرىيىتى ھورمۇز بوغۇزىنى دەرھال قايتا ئاچىدۇ، ئامېرىكا قوشما ئىشتاتلىرىمۇ دېڭىز قامالىنى دەرھال بىكار قىلىدۇ» دېدى.
شېرىف يەنە قاتارنىڭ قوللىشى بىلەن پاكىستاننىڭ جۈمە كۈنى شىۋېيتسارىيەدە بۇ بۇرۇلۇش نۇقتىسىنى «خاتىرىلەش ۋە تېخنىكىلىق سەۋىيەدە سۆھبەتلەرنى باشلاش» ئۈچۈن بىر مۇراسىم ئۆتكۈزىدىغانلىقىنى جەزملەشتۈرۈش بىلەن بىرگە، مەزكۇر كېلىشىم لايىھەسىنىڭ ۋاشىنگتون بىلەن تېھران ئوتتۇرىسىدا ئېلېكترونلۇق شەكىلدە ئىمزالانغانلىقىنى جاكارلىدى.
شىۋېيتسارىيە مۇراسىمى پىلانلاندى
پاكىستان باش مىنىستىرى دىپلوماتىيەنى قەتئىي قوللىغانلىقى ئۈچۈن ئامېرىكا پىرېزىدېنتى دونالد ترامپقا چىن دىلىدىن رەھمەت ئېيتتى؛ شۇنداقلا ئىراننىڭ دىنىي رەھبىرى مۇجتەبا ھۈسەيىنى خامەنېي ۋە پىرېزىدېنت مەسئۇد پەزەشكىيانغا كۆرسەتكەن پاراسەت ۋە دۆلەت ئەربابلىق سالاپىتى ئۈچۈن چوڭقۇر ھۆرمىتىنى بىلدۈردى.
شېرىف؛ تۈركىيە، سەئۇدى ئەرەبىستان ۋە مىسىرنىڭ بۇ مۇساپىدىكى ئورنىنىڭ ئىنتايىن مۇھىملىقىنى، شۇنداقلا قاتارنىڭمۇ بۇ جەريانغا ئىجادىي رول بىلەن قاتناشقانلىقىنى ئالاھىدە تەكىتلىدى.
