ئامېرىكا پىرېزىدېنتى دونالد ترامپنىڭ كولومبىيە دۆلەت رەئىسى گۇستاۋو پېترونى «زەھەرلىك چېكىملىك گۇرۇھىنىڭ باشلىقى» بولۇش بىلەن ئەيىبلىشى ۋە دۆلەتكە قىلىنىۋاتقان بارلىق ئىقتىسادىي ياردەملەرنى توختاتقانلىقىنى ئېلان قىلىشىدىن كېيىن كولومبىيە بىلەن ئامېرىكا ئوتتۇرىسىدا ئېغىر جىددىيچىلىك يۈز بەردى.
يەكشەنبە كۈنى «Truth Social Network» ئارقىلىق بىر قاتار يازمىلارنى ھەمبەھىرلىگەن ترامپ، پېترونى «قانۇنسىز زەھەرلىك چېكىملىك ساتقۇچى» ۋە «تۆۋەن باھالانغان، ئانچە ئالقىشقا ئېرىشەلمىگەن بىرى» دەپ سۈپەتلىدى. ئۇ يەنە كولومبىيەگە ئاجرىتىلغان مەبلەغنىڭ «ئۇزۇن مۇددەتلىك ئالدامچىلىقتىن باشقا نەرسە ئەمەسلىكى» نى ئىلگىرى سۈردى.
ترامپ: «بۈگۈندىن باشلاپ بۇ پۇللار ياكى باشقا ھەر قانداق تۆلەم ياكى ياردەم پۇلى كولومبىيەگە بېرىلمەيدۇ» دېدى ۋە پېتروغا ئاگاھلاندۇرۇش بېرىپ: «زەھەرلىك چېكىملىك ھەرىكەتلىرىنى توختاتقىنى ياخشى، بولمىسا ئامېرىكا قوشما ئىشتاتلىرى ئۇلارنى توختىتىدۇ ۋە بۇ ھەرگىزمۇ مۇلايىملىق بىلەن بولمايدۇ» دېگەن سۆزلەرنى ئىشلەتتى.
پىرېزىدېنت پېترو بولسا، يەكشەنبە كۈنى قىلغان سۆزىدە، ئامېرىكا پرېزىدېنتىنىڭ مەسلىھەتچىلىرى تەرىپىدىن «ئالدانغانلىقى» نى ئېيتتى. پېترو يەنە، كولومبىيەدىكى زەھەرلىك چېكىملىك ئەتكەسچىلىكى بىلەن سىياسىي كۈچ ئوتتۇرىسىدىكى ئىلگىرى سۈرۈلگەن مۇناسىۋەتلەرنى ئاشكارىلىغان كىشىنىڭ ئۆزى ئىكەنلىكىنى بىلدۈردى.
ترامپنىڭ بۇ ئۇچۇرى، پېترونىڭ ۋېنېزۇئېلاغا يېقىن كارىب دېڭىزى تەۋەلىكىدە بىر پاراخوتقا قارىتىلغان ئامېرىكا ھۇجۇمىغا مۇناسىۋەتلىك باياناتىدىن كېيىن ئېلان قىلىندى. دۆلەت مۇداپىئە مىنىستىرى پېت ھېگسېت پاراخوتنىڭ كولومبىيەلىك ئىسيانچى گۇرۇپپا «مىللىي ئازادلىق ئارمىيەسى» (ELN) گە تەۋە ئىكەنلىكىنى ئېلان قىلغان ئىدى.
پېترو بولسا بۇ قاراشنى رەت قىلىپ، پاراخوتنىڭ «سانتا مارتادىن كەلگەن بېلىقچىلار» غا تەۋە ئىكەنلىكىنى ۋە «دېڭىزنى سۆيىدىغان، تۇرمۇشىنى شۇ يەردىن قامدايدىغان كامبىغەل بىر ئائىلىگە» تەۋە ئىكەنلىكىنى بىلدۈرگەن.
بۇ باياناتلار، ترامپنىڭ ئاقسارايغا قايتىپ كەلگەندىن بۇيان بوگوتا بىلەن يۈز بەرگەن بىر قاتار توقۇنۇشلارنىڭ ئەڭ يېڭىسى ھېسابلىنىدۇ.
ئىلگىرى ئامېرىكا كولومبىيەنى زەھەرلىك چېكىملىككە قارشى كۈرەش قىلىۋاتقان دۆلەتلەر تىزىملىكىدىن چىقىرىۋەتكەن ۋە سېنتەبىرنىڭ ئاخىرىدا پېترونىڭ نىيۇ-يوركتىكى ب د ت ئومۇمىي كېڭىشى ھەپتىلىكىدە قىلغان سۆزىدىن كېيىن كولومبىيە پرېزىدېنتىنىڭ ۋىزىسىنى بىكار قىلغان ئىدى.
ھېگسېتنىڭ باياناتىغا قارىغاندا، يېقىنقى ھۇجۇملاردا كەم دېگەندە 32 كىشى ئۆلتۈرۈلگەن.
ئامېرىكا، ھەرىكەتلىرىنىڭ زەھەرلىك چېكىملىك ئەتكەسچىلىكىگە قارشى كەسكىن زەربە بەرگەنلىكىنى ئىلگىرى سۈرگەن بولسىمۇ، ئەمما ھۇجۇملاردا ئۆلتۈرۈلگەنلەرنىڭ زەھەرلىك چېكىملىك ئەتكەسچىسى ئىكەنلىكىگە دائىر ھېچقانداق دەلىل كۆرسىتىلمىگەن.
