ئىران ئامېرىكانىڭ يادرو ئەسلىھەلىرىگە قىلغان ھۇجۇمىنى ئەيىبلەپ، بۇنىڭ خەلقئارا قانۇنغا ئېغىر دەرىجىدە خىلاپلىق قىلىش ئىكەنلىكىنى بىلدۈردى.
تاشقى ئىشلار مىنىستىرى ئابباس ئاراكچى يەكشەنبە كۈنى بايانات بېرىپ، ھۇجۇمنى قاتتىق تەنقىد قىلىش بىلەن بىرگە، ئۇنى «قوبۇل قىلغىلى بولمايدىغان» ۋە «ئېغىر ئاقىۋەتلەرنى كەلتۈرۈپ چىقىرىدىغان» بىر ھەرىكەت دەپ ئاتىدى.
ئاراكچى بىرلەشكەن دۆلەتلەر تەشكىلاتى خەۋپسىزلىك كېڭىشىنىڭ دائىمىي ئەزالىرىدىن بىرى بولغان ئامېرىكانى ب د ت نىزامنامىسى ۋە يادرو قوراللىرىنىڭ كېڭىيىشىنىڭ ئالدىنى ئېلىش شەرتنامىسىگە خىلاپلىق قىلىش بىلەن ئەيىبلىدى.
ئۇ باياناتىدا: «ب د ت نىڭ ھەر بىر ئەزاسى بۇ پەۋقۇلئاددە خەتەرلىك، قانۇنسىز ۋە جىنايى قىلمىش ئالدىدا ھوشيار بولۇشى كېرەك» دېدى.
يەكشەنبە كۈنى سەھەردە ئېلىپ بېرىلغان ھۇجۇم، تەھراننىڭ تىنچلىق خاراكتېرلىك يادرو مەقسەتلىرى ئۈچۈن ئىشلىتىۋاتقان ئەسلىھەلىرىنى نىشانلىدى.
ئاراكچى ب د ت نىزامنامىسىنىڭ قوراللىق ھۇجۇمغا قارشى قانۇنلۇق مۇداپىئە ھوقۇقىنى ئېتىراپ قىلىدىغانلىقىنى تەكىتلەپ، ئىراننىڭ جاۋاب قايتۇرۇش ھوقۇقىنى ساقلاپ قالىدىغانلىقىنى بىلدۈردى.
ئۇ: «ئىران ئۆزىنىڭ ئىگىلىك ھوقۇقى، مەنپەئەتى ۋە خەلقىنى قوغداش ئۈچۈن بارلىق تاللاشلارنى ساقلاپ قالىدۇ» دەپ ئاگاھلاندۇردى.
ھۇجۇمدىن كېيىن ۋاشىنگتون بىلەن تېھران ئوتتۇرىسىدىكى جىددىيچىلىك كەسكىن كۈچىيىپ، ئۇنىڭ رايون مۇقىملىقىغا كۆرسىتىدىغان يوشۇرۇن تەسىرى خەلقئارادا ئەندىشە پەيدا قىلدى.
ئامېرىكانىڭ رولى
ئامېرىكا پىرېزىدېنتى دونالد ترامپ ئامېرىكا قىسىملىرىنىڭ ئىراننىڭ ئۈچ يادرو ئەسلىھەسىگە مۇۋەپپەقىيەتلىك ھۇجۇم قىلغانلىقىنى ئىلگىرى سۈرۈپ، تېخىمۇ كەڭ دائىرىلىك رايون توقۇنۇشى ئېھتىماللىقىغا دائىر ئەندىشىلەرنى كۈچەيتتى.
ترامپ فوردودىكى «ئاساسلىق» ئىران يادرو ئەسلىھەسىگە «بىر قېتىملىق تولۇق بومبا» تاشلانغانلىقىنى ۋە ناتانز بىلەن ئىسفاھاندىكى ئەسلىھەلەرگىمۇ قوشۇمچە ھۇجۇملار قىلىنغانلىقىنى ئېيتتى.
ئۇ يەنە، بارلىق ئامېرىكا ئۇرۇش ئايروپىلانلىرىنىڭ ئىران ھاۋا بوشلۇقىدىن ئايرىلغانلىقىنى ئىلگىرى سۈرۈپ، ئىرانغا ئۆچ ئالماسلىق ھەققىدە تەھدىت سالدى.
