تەخمىنەن 200 ئامېرىكا ئەسكىرى غەززەدىكى ئۇرۇش توختىتىشنى نازارەت قىلىش ئۈچۈن ئىسرائىلىيەگە يېتىپ كەلدى.
تەخمىنەن 200 ئەتراپىدىكى ئامېرىكا ئەسكىرى غەززەدە ئۇرۇش توختىتىش كېلىشىمىنىڭ ئىجرا قىلىنىشىغا ياردەم قىلىدۇ، ئەمما غەززەگە كىرمەيدۇ.
ئامېرىكا تاراتقۇلىرىنىڭ خەۋەر قىلىشىچە، ئامېرىكا ئەسكەرلىرى شەنبە (11-ئۆكتەبىر) كۈنى كۆپ دۆلەتلىك ۋەزىپە ئۆتەش ھەربىي قىسمىغا قاتنىشىش ئۈچۈن ئىسرائىلىيەگە يېتىپ كېلىشكە باشلىغان بولۇپ، ئۇلار غەززەدىكى ئۇرۇش توختىتىش كېلىشىمىنىڭ ئىجرا قىلىنىشىنى نازارەت قىلىدىكەن.
ئا ب س (ABC) تېلېۋىزىيەسى ئىككى ئامېرىكا ئەمەلدارىنىڭ سۆزىنى نەقىل كەلتۈرۈپ، تەخمىنەن 200 ئامېرىكا ئەسكىرىنىڭ ئۇرۇش توختىتىش كېلىشىمىنى نازارەت قىلىشقا مەسئۇل ماسلاشتۇرۇش مەركىزىي قۇرۇش ئۈچۈن ئەۋەتىلىدىغانلىقىنى خەۋەر قىلدى.
بۇ ھەربىي قىسىمنىڭ تەمىنلەش، بىخەتەرلىك، قاتناش، پىلانلاش ۋە قۇرۇلۇش قاتارلىق ساھەلەردە خىزمەت قىلىدىغانلىقى ئەسكەرتىلدى.
خەۋەردە كۆرسىتىلىشىچە، ئامېرىكا ئارمىيەسى ئىسرائىلىيەدە تۇرىدىغان بولۇپ، غەززەگە كىرمەيدىكەن. ئۇلارنىڭ ۋەزىپىسى مەركىزىي ئارمىيە قوماندانلىق ئىشتابى (CENTCOM) نىڭ باشلىقى ئادمىرال برادلېي كوپېر (BradleyCooper) نىڭ قوماندانلىقىدا، كۆپ دۆلەتلىك ۋەزىپە ئۆتەش قىسمىغا قاتناشقان رايوندىكى دۆلەتلەرنىڭ ھەربىي قىسىملىرى بىلەن بىرلىكتە خىزمەت قىلىدىكەن.
ترامپنىڭ 20 ماددىلىق پىلانى
بۇ ھەربىي ئورۇنلاشتۇرۇش ئىسرائىلىيە بىلەن ھاماس، ئامېرىكا پىرېزىدېنتى دونالد ترامپنىڭ 29-سېنتەبىر غەززەدىكى ئىرقىي قىرغىنچىلىق ئۇرۇشىنى توختىتىش ئۈچۈن ئوتتۇرىغا قويغان 20 ماددىلىق پىلانىنىڭ بىرىنچى باسقۇچىغا چارشەنبە (8-ئۆكتەبىر) كۈنى قوشۇلغانلىقىنى ئېلان قىلغاندىن كېيىن باشلاندى.
كېلىشىم بويىچە، ھاماس بارلىق ئىسرائىلىيەلىك تۇتقۇنلارنى تەخمىنەن 2000 پەلەستىنلىك مەھبۇسقا ئالماشتۇرىدۇ، ئىسرائىلىيە ئارمىيەسى بولسا غەززەدىن تەدرىجىي چېكىنىدۇ.
ئىككىنچى باسقۇچتا، غەززەدە ھاماس قاتناشمىغان يېڭى باشقۇرۇش مېخانىزمى قۇرۇش، بىرلىشمە پەلەستىنلىكلەر ۋە باشقا مۇسۇلمانلاردىن تەشكىللەنگەن بىرلەشمە بىخەتەرلىك قىسمى قۇرۇش ۋە ئاخىرىدا ھاماسنى قورالسىزلاندۇرۇش مەقسەت قىلىنىدۇ.
2023-يىلى ئۆكتەبىردىن باشلاپ، ئىسرائىلىيەنىڭ ھۇجۇملىرىدا 67 مىڭ 200 ئەتراپىدا پەلەستىنلىك جېنىدىن ئايرىلدى. بۇلارنىڭ كۆپىنچىسى ئاياللار ۋە كىچىك بالىلار. بۇ جەرياندا غەززە ئادەم ياشىغىلى بولمايدىغان ھالغا كەلدى.