ياۋروپا ئىتتىپاقى رۇسىيەگە قارشى ھازىرغىچە «ئەڭ كۈچلۈك» دەپ قارالغان ئېمبارگو لايىھەلىرىنىڭ بىرىنى ماقۇللىدى. بۇ لايىھە شىمالىي ئېقىم تۇرۇبا لىنىيەسىدىن ئىمپورت قىلىشنى مەنئىي قىلىش ۋە نېفىت ئېكسپورتىغا تېخىمۇ قاتتىق چەكلىمە قويۇشنى ئۆز ئىچىگە ئالىدۇ. بۇ ھەقتىكى بايانات جۈمە كۈنى ياۋروپا ئىتتىپاقىنىڭ تاشقى مۇناسىۋەتلەر ئالىي ۋەكىلى تەرىپىدىن ئېلان قىلىندى.
ئېستونىيە باش مىنىستىرى كايا كاللاس X سەھىپىسىدە ئېلان قىلغان باياناتىدا مۇنداق دېدى:
«بىز مەيدانىمىزدا قەتئىي چىڭ تۇرىمىز. ياۋروپا ئىتتىپاقى رۇسىيەگە قارشى ھازىرغىچە بولغان ئەڭ كۈچلۈك ئېمبارگو لايىھەلىرىنىڭ بىرىنى ماقۇللىدى. شىمالىي ئېقىم تۇرۇبا لىنىيەسىدىن ئىمپورت قىلىش مەنئىي قىلىنىدۇ. نېفىت ئۈچۈن تېخىمۇ تۆۋەن باھا چېكى بېكىتىلىدۇ. بىز رۇسىيەنىڭ ھەربىي سانائىتى، جازالاردىن ئايلىنىپ ئۆتۈشىگە شارائىت يارىتىپ بەرگەن خىتاي بانكىلىرى ۋە ئۇچقۇچىسىز ھاۋا ئاپپاراتلىرىغا ئىشلىتىلىدىغان تېخنىكىلارنىڭ ئېكسپورتىغا قارشى بېسىمنى كۈچەيتىۋاتىمىز.»
كاللاس ياۋروپا ئىتتىپاقىنىڭ رۇسىيەنىڭ «كۆلەڭگە فىلوتى» غا تەۋە يەنە 105 پاراخوتقا ئېمبارگو يۈرگۈزىدىغانلىقىنى ۋە رۇسىيە بانكىلىرىنىڭ خەلقئارا پۇل - مۇئامىلە مەنبەلىرىگە ئېرىشىشىنى چەكلەيدىغانلىقىنى ئەسكەرتىپ، رۇسىيە-ئۇكرائىنا ئۇرۇشىنىڭ موسكۋاغا يۈرگۈزۈلگەن ئېمبارگولارنىڭ ئاساسلىق سەۋەبى ئىكەنلىكىنى، ئېمبارگولار ئارقىلىق «كىرېمىل سارىيىنىڭ ئۇرۇش خامچوتىنى تېخىمۇ قىسىدىغانلىقىنى» بىلدۈردى.
كاللاس يەنە ياۋروپا ئىتتىپاقىنىڭ تۇنجى قېتىم بىر چەت ئەل بايراق تىزىملاش ئورگىنىنى نىشان قىلغانلىقىنى ۋە رۇسىيەگە تەۋە روسنېفت شىركىتىنىڭ ھىندىستاندىكى ئەڭ چوڭ نېفىت ئايرىش زاۋۇتىنىڭمۇ ئېمبارگو يۈرگۈزۈلىدىغانلار تىزىملىكىگە كىرگۈزۈلگەنلىكىنى ئەسكەرتىپ مۇنداق دېدى:
«جازا تەدبىرلىرىمىز ئۇكرائىنالىق بالىلارغا ئىدېئولوگىيەلىك تەسىر كۆرسەتكەنلەرنىمۇ ئۆز ئىچىگە ئالىدۇ.
بىز جازا تەدبىرلىرىنى داۋاملىق كۈچەيتىمىز، شۇنداق قىلغاندا تاجاۋۇزچىلىقنى توختىتىش موسكۋا ئۈچۈن بىردىنبىر تاللاش بولىدۇ.»
