تۈركىيە يېشىل تەرەققىيات نىشانلىرى دائىرىسىدە ياۋروپا مەبلەغ سېلىش بانكىسىدىن (AYB) 200 مىليون ياۋرو مەبلەغكە ئېرىشتى.
ئانادولۇ خەۋەر ئاگېنتلىقى مۇخبىرىنىڭ خەزىنە ۋە مالىيە مىنىستىرلىقىدىن ئىگىلىشىچە، تۈركىيەنىڭ مۇۋاپىق شەرتلىك تاشقى مەبلەغ بىلەن تەمىنلەش خىزمەتلىرى ئۈزلۈكسىز داۋاملاشماقتا. بۇ دائىرىدە، ياۋروپا مەبلەغ سېلىش بانكىسى بىلەن تۈركىيە ئوتتۇرىسىدا تۈركىيەنىڭ يېشىل تەرەققىيات نىشانلىرىنى قوللاش مەقسىتىدە خەزىنە قايتۇرۇش كاپالىتى ئاستىدا 200 مىليون ياۋرو قىممىتىدىكى ئىككى ئايرىم مەبلەغ كېلىشىمى ئىمزالاندى.
تۈركىيەنىڭ يەر شارى كىلىمات نىشانلىرى ۋە يېشىل تەرەققىيات تەسەۋۋۇرىغا ئۇيغۇن ھالدا تەمىنلەنگەن بۇ مەبلەغ ئارقىلىق، ئەمەلىي ئىقتىساد ساھەسى ۋە ئېكسپورتچىلارنىڭ قايتا ھاسىل بولىدىغان ئېنېرگىيە، ئېنېرگىيە ئۈنۈمى ھەمدە يېشىل ۋە سىجىل سانائەت ساھەلىرىدىكى مەبلەغ سېلىشلىرىنى قوللاش نىشان قىلىنغان. مەزكۇر قەرزلەر بىلەن بىرگە، بۇ يىل تەمىنلەنگەن مۇۋاپىق شەرتلىك تاشقى مەبلەغ سوممىسى 4.9 مىليارد دوللارغا يەتتى.
«تۈركىيەنى قوللاش كۈنسېرى ئاشماقتا»
خەزىنە ۋە مالىيە مىنىستىرى مەھمەت شىمشەك بۇ مەسىلە ھەققىدە توختىلىپ، ياۋروپا مەبلەغ سېلىش بانكىسى بىلەن ئورنىتىلغان يېقىن ھەمكارلىق نەتىجىسىدە تۈركىيەنىڭ تەرەققىياتنى نىشان قىلغان تۈرلىرىنى قوللاشنىڭ كۈنسېرى ئېشىۋاتقانلىقىنى بىلدۈردى.
مىنىستىر شىمشەك تۈركىيە بىلەن ياۋروپا ئىتتىپاقى (AB) ئوتتۇرىسىدىكى مۇناسىۋەتلەرگە ئىشارەت قىلىپ مۇنداق دېدى:
«دۆلىتىمىزنىڭ ياۋروپا ئىتتىپاقى بىلەن بولغان مۇناسىۋەتلىرىدىكى ئاكتىپ ۋەزىيەتنىڭ ئىجابىي تەسىرى تاشقى مەبلەغ ساھەسىدە ئەمەلىي كۆرۈلۈشكە باشلىدى. بۇ دائىرىدە، ياۋروپا مەبلەغ سېلىش بانكىسى دۆلىتىمىزنىڭ تەرەققىياتتىكى ئالدىنقى نىشانلىرىنى قوللاش مەقسىتىدە، 2023-يىلىدىكى يەر تەۋرەشتىن كېيىنكى قايتا قۇرۇش خىزمەتلىرى ئۈچۈن بېرىلگەن قەرزنى ھېسابقا ئالمىغاندا، 8 يىللىق ئارىلىقتىن كېيىن مۇۋاپىق شەرتلىك مەبلەغ بىلەن تەمىنلەش پۇرسەتلىرىنى قايتىدىن ئىشقا سالدى».
