كاتز بۇ قەدەمنىڭ غەززەدە ھاماسنى تارقىتىۋېتىش ۋە تونېللارنى يوقىتىش ئۈچۈن ئامېرىكا بىلەن ماسلاشقان ھەرىكەت ئىكەنلىكىنى بىلدۈردى.
ئىسرائىلىيە دۆلەت مۇداپىئە مىنىستىرى يىسرائىل كاتز شەنبە كۈنى ئېلان قىلغان باياناتىدا، ئۇرۇش توختىتىش ۋە ئەسىر ئالماشتۇرۇش كېلىشىمىنىڭ بىرىنچى باسقۇچى دائىرىسىدە، ئىسرائىلىيە كونتروللۇقىدىكى غەززەنىڭ بىر قىسمىنى ۋەيران قىلىشنى داۋاملاشتۇرۇش ئۈچۈن ئارمىيەگە بۇيرۇق بەرگەنلىكىنى ئېيتتى.
كاتز X سۇپىسىدىكى يازمىسىدا: «مەن ئىسرائىلىيە ئارمىيەسىگە (IDF) ھازىر بىزنىڭ كونتروللۇقىمىز ئاستىدىكى سېرىق رايوندا ئەسكەرلەر ۋە مەھەللىلەرنى قوغداش بىلەن بىر ۋاقىتتا تونېللارنى ۋەيران قىلىشنى ئالدىنقى ۋەزىپە قىلىپ بېكىتىش توغرىسىدا يوليورۇق بەردىم» دەپ يازدى.
كاتز بۇ قەدەمنىڭ، ئامېرىكا مۇئاۋىنپىرېزىدېنتى، تاشقى ئىشلار ۋە دۆلەت مۇداپىئە مىنىستىرلىرى، پىرېزىدېنت ئەلچىلىرى ۋە مەركىزىي قوماندانلىق ئىشتابى (CENTCOM) قوماندانلىرىنى ئۆز ئىچىگە ئالغان ئامېرىكا ئەمەلدارلىرى بىلەن ئامېرىكا پىرېزىدېنتى دونالد ترامپنىڭ پىلانىنى يولغا قويۇش ۋە «ھاماسنى قورالسىزلاندۇرۇش بىلەن بىرگە، مەسئۇلىيەت رايونىدا قالغان زېمىندىكى بارلىق تېرورلۇق تونېللىرىنى پۈتۈنلەي يوقىتىش ۋە ۋەيران قىلىش» نىڭ زۆرۈرلۈكى توغرىسىدا ئېلىپ بېرىلغان سۆھبەتلەرگە ماس ھالدا ئېلىپ بېرىلغانلىقىنى ئېيتتى.
كاتز يازمىسىدا: «ھاماسنىڭ تونېللىرىنى ۋەيران قىلىش ئارقىلىق غەززەنى ئەسكەرسىزلەشتۈرۈش ۋە ھاماسنى قورالسىزلاندۇرۇش، مېنىڭ قارىشىمچە، غەززەدە غەلىبە قىلىش ئۈچۈن ئەڭ مۇھىم ئىستراتېگىيەلىك نىشان» دېگەن سۆزلەرنى ئىشلەتكەن بولۇپ، ئەڭ جىددىي ئەخلاقىي ۋەزىپىنىڭ بارلىق گۆرۈگە ئېلىنغانلار ۋە ھاياتىدىن ئايرىلغانلارنى ئۆيلىرىگە قايتۇرۇپ كېلىش ئىكەنلىكىنى ۋە «بۇ مۇقەددەس ۋە ھالقىلىق ۋەزىپىنى ئورۇنداش ئۈچۈن ھەممە ئىشنى قىلىدىغانلىقىنى» بىلدۈردى.
كاتز: «غەززەدە ھاماسقا قارشى قەھرىمان ئىسرائىلىيە ئارمىيەسى (IDF) جەڭچىلىرى قولغا كەلتۈرگەن بۈيۈك غەلىبىنى ئەمەلگە ئاشۇرۇش ئۈچۈن ئومۇمىي ئىستراتېگىيەلىك ۋەزىپە، %60 ى يەنىلا ساقلىنىپ قالغان تونېللارنى پۈتۈنلەي ۋەيران قىلىش ۋە ھاماسنى قورالسىزلاندۇرۇش ئارقىلىق غەززەنى ئەسكەرسىزلەشتۈرۈش» دەپ بايانات بەردى.
بىراق، خەلقئارالىق سەھىيە ۋە كىشىلىك ھوقۇق تەشكىلاتلىرى ئىسرائىلىيەنىڭ غەززەدىكى ھەربىي ھۇجۇملىرىنى ئاقلىشىغا كۆپ قېتىم قارشى چىقتى.
دۇنيا سەھىيە تەشكىلاتىنىڭ باياتىدا، ئىسرائىلىيەنىڭ 2023-يىلى 7-ئۆكتەبىردىن بۇيان سىستېمىلىق ھالدا ئونلىغان دوختۇرخانىنى ھۇجۇم نىشانى قىلغانلىقى، كەم دېگەندە 32 دوختۇرخانا ۋە 53 ساقلىقنى ساقلاش مەركىزىگە بۇزغۇنچىلىق ياكى ۋەيران قىلغانلىقى، ھەمدە دۇنيا سەھىيە تەشكىلاتىنىڭ شىفا، ناسىر، ھىندونېزىيە ۋە قۇددۇس دوختۇرخانىلىرىغا قىلىنغان چوڭ ھۇجۇملارنى خاتىرىلىگەنلىكى، بۇ ھۇجۇملاردا تېببىي خادىملار، بىمارلار ۋە ئۇ يەرلەرگە پاناھلانغان ئۆي-ماكانسىز قالغان پۇقرالارنىڭ ھاياتىدىن ئايرىلغانلىقى ئۇقتۇرۇلدى.
دۇنيا سەھىيە تەشكىلاتى ۋە باشقا مۇستەقىل كۆزەتكۈچىلەر، بۇ ھۇجۇملارنىڭ غەززەنىڭ سەھىيە سىستېمىسىنى پالەچ ھالغا چۈشۈرۈپ قويغانلىقىنى دوكلات قىلدى. توكسىز قېلىشى سەۋەبىدىن بالدۇر تۇغۇلغان بوۋاقلار ھاياتىدىن ئايرىلدى، دوختۇرلار تۇتقۇن قىلىندى ۋە دوختۇرخانا بۆلۈملىرى ۋاقىتلىق مېيىتخانىغا ئايلاندۇرۇلدى.
ئىسرائىلىيە بۇ دوختۇرخانىلارنىڭ ھاماس تەرىپىدىن ھەربىي مەقسەتلەردە ئىشلىتىلگەنلىكىنى، دوختۇرخانىلارنى «قوماندانلىق مەركىزى» ۋە تونېل رايونى دەپ تەسۋىرلىگەنلىكىنى ئېيتتى. ئەمما دۇنيا سەھىيە تەشكىلاتى ۋە نۇرغۇن كىشىلىك ھوقۇق گۇرۇپپىلىرىغا ئاساسلانغاندا، بۇ ئەيىبلەشلەرنى قوللايدىغان دەلىل-ئىسپات ئاممىغا ئاشكارىلانغىنى يوق.
ئىسرائىلىيە ئاندا-ساندا تونېللارنىڭ بارلىقىنى ئىلگىرى سۈرگەن ئۇچقۇچىسىز ئايروپىلان كۆرۈنۈشلىرى ياكى دىئاگراممىلارنى ئېلان قىلغان بولسىمۇ، بۇلار مۇستەقىل دەلىل بولالمايدۇ. مۇخبىرلار ۋە خەلقئارالىق كۆزەتكۈچىلەرنىڭ رايونلارغا كىرىش چاقىرىقلىرى كۆپىنچە جاۋابسىز قالدۇرۇلماقتا.
ھاماس بىلەن ئىسرائىلىيە ئوتتۇرىسىدا رايونلۇق ۋە خەلقئارالىق مۇرەسسە ئارقىلىق قولغا كەلگەن باسقۇچلۇق غەززە ئۇرۇش توختىتىش كېلىشىمى 10-ئۆكتەبىر كۈچكە ئىگە بولغان بولسىمۇ، ئىسرائىلىيە ئۇنىڭغا خىلاپلىق قىلىشنى داۋاملاشتۇرماقتا.
بىرىنچى باسقۇچتا ئىسرائىلىيەلىك گۆرۈگە ئېلىنغانلارنى پەلەستىنلىك ئەسىرلەر بىلەن ئالماشتۇرۇش ۋە ئىسرائىلىيەنىڭ قىسمەن چېكىنىشىنى ئۆز ئىچىگە ئالىدۇ. شۇنداقلا غەززەنىڭ قايتا قۇرۇلۇشى ۋە ھاماسسىز يېڭى بىر باشقۇرۇش مېخانىزمىنىڭ قۇرۇلۇشى كۆزدە تۇتۇلىدۇ.
غەززەدىكى پەلەستىن سەھىيە مىنىستىرلىقىنىڭ باياناتىغا ئاساسلانغاندا، 2023-يىلى ئۆكتەبىردىن بۇيان ئىسرائىلىيە ئېلىپ بارغان ئىرقىي قىرغىنچىلىق ئۇرۇشىدا 68 مىڭ 500 دىن ئارتۇق كىشى ئۆلتۈرۈلگەن ۋە 170 مىڭ 300 دىن ئارتۇق كىشىنىڭ يارىلىنىشىغا سەۋەب بولغان.
