رۇسىيە پىرېزىدېنتى ئامېرىكانىڭ مۇستەقىللىق كۈنى مۇناسىۋىتى بىلەن پىرېزىدېنت ترامپنى تەبرىكلەپ، مۇناسىۋەتلەرنى كۈچەيتىش چاقىرىقىدا بولدى.
رۇسىيە فېدېراتسىيەسى دۆلەت رەئىسى ولادىمىر پۇتىن، «ئەڭ چوڭ ئىككى يادرو كۈچ» بولۇش سۈپىتى بىلەن رۇسىيە ۋە ئامېرىكاغا دۇنيانىڭ بىخەتەرلىك مەسىلىسىدە ئورتاق بىر مەسئۇلىيەت يۈكلەنگەنلىكىنى ئېيتتى.
كرېمىل سارىيىدىن ئېلان قىلىنغان باياناتقا ئاساسلانغاندا پۇتىن، ئامېرىكا مۇستەقىللىقىنىڭ 250-يىللىقى مۇناسىۋىتى بىلەن شەنبە كۈنى ئامېرىكا پىرېزىدېنتى دونالد ترامپقا ئەۋەتكەن ئۇچۇرىدا، مۇستەقىللىق خىتابنامىسىنىڭ ئىمزالىنىشىنىڭ پەقەت ئامېرىكانىڭ دۇنياغا كېلىشىنىلا ئەمەس، شۇنىڭ بىلەن بىر ۋاقىتتا «دۇنيا تارىخىدىمۇ مۇھىم بىر بۇرۇلۇش نۇقتىسىنى» نامايان قىلىدىغانلىقىنى بىلدۈردى.
رۇسىيەنىڭ «شىمالىي ئامېرىكالىق مۇستەملىكىچى كۈچلەرنىڭ ئەنگلىيە ھۆكۈمرانلىقىغا قارشى ئېلىپ بارغان ئەركىنلىك كۈرىشىنى شەرتسىز قوللىغانلىقىنى» ئىپادىلىگەن پۇتىن، موسكۋا ۋە ۋاشىنگتوننىڭ ھەر ئىككى دۇنيا ئۇرۇشىدىمۇ ئىتتىپاقداش بولغانلىقىنى ئەسلىتىپ ئۆتتى.
پۇتىن ئۆز ئۇچۇرىدا مۇنداق سۆزلەرگە ئورۇن ئاجراتتى: «بىز ئىككى دۇنيا ئۇرۇشىدا ئىتتىپاقداش ئىدۇق، ئىنسانىيەتنى ناتسىزم دەھشىتىدىن بىرلىكتە قۇتقۇزدۇق ۋە يېقىنقى زامان دۇنيا تەرتىپىنىڭ ئاساسىي قۇرۇلۇشىدا ھالقىلىق بىر رول ئوينىدۇق. بۈگۈن خۇددى شۇنىڭدەك رۇسىيە ۋە ئامېرىكا قوشما ئىشتاتلىرى، ئەڭ چوڭ ئىككى يادرو كۈچ بولۇش سۈپىتى بىلەن دۇنياۋى خاراكتېردىكى بىخەتەرلىك ۋە مۇقىملىقنى كاپالەتكە ئىگە قىلىشتا ئالاھىدە بىر مەسئۇلىيەتكە ئىگە.»
موسكۋا بىلەن ۋاشىنگتون ئوتتۇرىسىدا «ئىجابىي، باراۋەر ۋە ئۆزئارا مەنپەئەتكە تايىنىدىغان» مۇناسىۋەتلەرنىڭ قۇرۇلۇشىنىڭ مۇھىملىقىنى تەكىتلىگەن پۇتىن، بۇ قەدەملەرنىڭ ھەم ھەر ئىككى دۆلەتنىڭ، ھەم ئومۇمىي جەھەتتىن خەلقئارا جەمئىيەتنىڭ مەنپەئەتلىرىگە خىزمەت قىلىدىغانلىقىغا ئىشىنىدىغانلىقىنى بىلدۈردى.
