ئىسرائىلىيە ئەلى لارىجانىنىڭ ئۆلتۈرۈلگەنلىكىنى ئىلگىرى سۈردى

ئىسرائىلىيە دۆلەت مۇداپىئە مىنىستىرى ئىسرائىل كاتز، كېچىدە ئېلىپ بېرىلغان ھاۋا ھۇجۇملىرىدا ئەلى لارىجانى ۋە باسىج قۇماندانى غولامرېزا سۇلايماننىڭ ئۆلتۈرۈلگەنلىكىنى ئېيتتى، ئەمما ئىران دائىرىلىرى تېخىچە بۇنى دەلىللىمىدى.

ئىسرائىلىيە دۆلەت مۇداپىئە مىنىستىرى ئىسرائىل كاتز سەيشەنبە كۈنى ئىران دۆلەتلىك خەۋپسىزلىك كېڭىشىنىڭ رەئىسى ئەلى لارىجانىنىڭ بىر قېتىملىق ھاۋا ھۇجۇمىدا ئۆلتۈرۈلگەنلىكىنى ئىلگىرى سۈردى.

ئىشخانىسى تەرىپىدىن ئېلان قىلىنغان باياناتتا كاتز، لارىجانى بىلەن باسىج قۇماندانى غولامرېزا سۇلايماننىڭ كېچىدە ئېلىپ بېرىلغان ھۇجۇملاردا «بىر تەرەپ قىلىنغانلىقىنى» قەيت قىلدى.

كاتز مىنىستىرلىقى تەرىپىدىن ئېلان قىلىنغان باياناتىدا: «ھازىرلا باش ئىشتاب باشلىقىدىن ئىران دۆلەتلىك خەۋپسىزلىك كېڭىشىنىڭ باش كاتىپى لارىجانى بىلەن ئىراننىڭ مەركىزىي باستۇرۇش ئاپپاراتى باسىجنىڭ رەئىسى سۇلايماننىڭ تۈنۈگۈن كېچە بىر تەرەپ قىلىنغانلىقى ھەققىدە ئۇچۇرغا ئېرىشتىم» دېدى.

ئىسرائىلىيە ئاخبارات ۋاسىتىلىرى بۇنىڭدىن ئىلگىرى لارىجانىنىڭ ئىران دۆلەتلىك خەۋپسىزلىك كېڭىشىنىڭ رەئىسى سۈپىتىدە، ئىسرائىلىيە تەرىپىدىن ئېلىپ بېرىلغان ھۇجۇملارنىڭ نىشانى بولغانلىقىنى خەۋەر قىلغان ئىدى.

ئىران دائىرىلىرىدىن مەزكۇر دەۋاغا نىسبەتەن دەرھال بىر جاۋاب كەلمىدى. ئەمما ئىسرائىلىيەنىڭ بۇ ئىلگىرى سۈرۈشلىرىدىن كېيىن، ئىران دۆلەت تېلېۋىزىيەسى لارىجانىغا تەۋە ئىكەنلىكى ئىلگىرى سۈرۈلگەن بىر پارچە قوليازما خەتنى ئېلان قىلدى.

لارىجانىنىڭ X سەھىپىسىدىكى ئەڭ ئاخىرقى ئۇچۇرى 17-مارت سەيشەنبە كۈنى شۇ جاي ۋاقتى سائەت 09:40 دە ھەمبەھىرلەنگەن. بۇ ئۇچۇر ئىران دېڭىز فىلوتىدا ھاياتىدىن ئايرىلغانلارنى دەپنە قىلىش مۇراسىمىغا مۇناسىۋەتلىك بىر پارچە قوليازما خاتىرە ئىدى.

ئەگەر ئۇنىڭ ئۆلۈمى دەلىللەنسە، ئۇرۇشنىڭ بىرىنچى كۈنى ئۆلگەن دىنىي رەھبەر ئەلى خامەنېيدىن كېيىن ئۆلتۈرۈلگەن ئەڭ يۇقىرى دەرىجىلىك ئىران ئەمەلدارى بولۇپ قالىدۇ.

ئىلگىرى يادرو سۆھبەتلىرىنى ئېلىپ بارغان مۇرەسسەچى ۋە خامەنېينىڭ يېقىن ئىتتىپاقدىشى بولغان لارىجانى، جۈمە كۈنى تېھراندا ئۆتكۈزۈلگەن قۇدۇس كۈنى پائالىيەتلىرىگە قاتنىشىۋاتقاندا كۆرۈلگەن ئىدى.

شۇ كۈنى كېيىنرەك ئامېرىكا لارىجانىنىمۇ ئۆز ئىچىگە ئالغان ۋە ئىران ئىنقىلابىي مۇھاپىزەتچىلەر قىسمى بىلەن ئالاقىسى بار 10 كىشىلىك تىزىملىك دائىرىسىدە، يۇقىرى دەرىجىلىك ئىران ھەربىي ۋە ئىستىخبارات ئەمەلدارلىرى ھەققىدە ئۇچۇر يەتكۈزگەنلەرگە 10 مىليون دوللارغىچە مۇكاپات بېرىدىغانلىقىنى ئۇقتۇرغان ئىدى.