سىنگاپور پەلەستىن دۆلىتىنى «پىرىنسىپ جەھەتتىن ئېتىراپ قىلىش» قا تەييار ئىكەنلىكىنى بىلدۈردى. بۇ دۆلەتنىڭ ۋەكىلىنىڭ سۆزىگە قارىغاندا، بۇ قەدەم پەقەت تىنچلىق مۇساپىسىنى ۋە ئىككى دۆلەتلىك ھەل قىلىش چارىسى نۇقتىئىينەزىرىنى كۈچەيتكەندىلا ئاندىن ئەھمىيەتلىك بولىدىكەن.
سىنگاپور تاشقى ئىشلار مىنىستىرلىقىنىڭ ئاسيا-تىنچ ئوكيان ئىشلىرىغا مەسئۇل مۇئاۋىن مەسلىھەتچىسى كېۋىن چېئوك، سەيشەنبە كۈنى نىيۇ يورکتا ئۆتكۈزۈلگەن بىرلەشكەن دۆلەتلەر تەشكىلاتىنىڭ پەلەستىن مەسىلىسى توغرىسىدىكى يۇقىرى دەرىجىلىكلەر يىغىنىدا بۇ باياناتنى ئېلان قىلدى.
سىنگاپور ۋەكىلى كېۋىن چېئوك باياناتىدا مۇنداق دېدى:
«سىنگاپور بىرلەشكەن دۆلەتلەر تەشكىلاتى خەۋپسىزلىك كېڭىشىنىڭ مۇناسىۋەتلىك قارارلىرىغا ئاساسەن، سۆھبەت ئارقىلىق ھاسىل قىلىنغان ئىككى دۆلەتلىك ھەل قىلىش چارىسى ئاساسىدا پەلەستىنلىكلەرنىڭ ئۆز ۋەتىنىگە ئىگە بولۇش ھوقۇقىنى ئىزچىل قوللاپ كەلدى. بىز بۇ ئۇزۇندىن بۇيان داۋاملىشىپ كېلىۋاتقان توقۇنۇشنى كەڭ كۆلەملىك، ئادىل ۋە ئۇزۇن مۇددەتلىك ھەل قىلىدىغان بىردىنبىر يولنىڭمۇ مۇشۇ ئىكەنلىكىگە چىن دىلىمىزدىن ئىشىنىمىز. بۇ نۇقتىدىن ئېلىپ ئېيتقاندا، بىز پەلەستىن دۆلىتىنى پىرىنسىپ جەھەتتىن ئېتىراپ قىلىشقا تەييارمىز.»
ئۇ يەنە، ئۇزۇن مۇددەتلىك ئۇرۇش توختىتىش ھاسىل قىلىنغاندىن كېيىن سىنگاپورنىڭ غەززەنى قايتا قۇرۇشقا تۆھپە قوشۇشنى خالايدىغانلىقىنى بىلدۈرۈپ مۇنداق دېدى:
«بىز ئىسرائىلىيە ھۆكۈمىتىنى جىددىي ئېھتىياجلىق بولغان ئىنسانپەرۋەرلىك ياردەملىرىنى يەتكۈزۈشكە قويۇلغان بارلىق چەكلىمىلەرنى دەرھال بىكار قىلىشقا چاقىرىمىز. كەلگۈسىدە، غەززەدىن كېلىدىغان بىمارلارنى داۋالاشقا ياردەم بېرىش ئۈچۈن رايونغا بىر داۋالاش ئەترىتى ئەۋەتىشنى ئويلىشىۋاتىمىز. كەلگۈسىدە ئۇزۇن مۇددەتلىك ئۇرۇش توختىتىش كېلىشىمى ھاسىل قىلىنسا، غەززەنى قايتا قۇرۇش مۇساپىسىگە تۆھپە قوشۇشقا تەييارمىز.»
كېۋىن چېئوك ئىسرائىلىيەلىكلەر ۋە پەلەستىنلىكلەرنى سۆھبەت ئۈستىلىگە قايتىشقا چاقىردى.
ئارقا - ئارقىدىن ئېلان قىلىنغان باياناتلار
بۇ باياناتلار، فىرانسىيە پىرېزىدېنتى ئېممانۇئېل ماكرون، ئەنگىلىيە باش ۋەزىرى كېير ستارمېر ۋە كانادا باش مىنىستىرى مارك كارنېينىڭ دۆلەتلىرىنىڭ سېنتەبىر ئېيىدا پەلەستىننى ئېتىراپ قىلىدىغانلىقىنى ئېلان قىلىشىدىن كېيىن ئېلان قىلىندى.
ئۆتكەن ھەپتە ماكرون پارىژنىڭ سېنتەبىر ئېيىدا بىرلەشكەن دۆلەتلەر تەشكىلاتى ئومۇمىي كېڭىشى يىغىنىدا پەلەستىننى ئېتىراپ قىلىدىغانلىقىنى، ئەمما بۇنىڭ بەدىلىگە پەلەستىن دۆلىتىنىڭ قورالسىزلىنىشنى قوبۇل قىلىشى ھەم ئىسرائىلىيەنى تولۇق ئېتىراپ قىلىشى كېرەكلىكىنى ئېيتقان ئىدى.
بۇ ھەپتە ستارمېرمۇ ئوخشاش شەكىلدە بايانات ئېلان قىلىپ، ئەگەر ئىسرائىلىيە غەززەدىكى ئىرقىي قىرغىنچىلىقنى توختاتمىسا، ھۆكۈمىتىنىڭ بىرلەشكەن دۆلەتلەر تەشكىلاتى ئومۇمىي كېڭىشى يىغىنىدا پەلەستىننى ئېتىراپ قىلىدىغانلىقىنى جاكارلىدى.
ئىلگىرى، كانادا باش مىنىستىرى مارك كارنېيمۇ ئوتتاۋانىڭ ئىككى دۆلەتلىك ھەل قىلىش چارىسىغا بولغان ساداقىتىنى سەۋەب كۆرسىتىپ، سېنتەبىردە بىرلەشكەن دۆلەتلەر تەشكىلاتى ئومۇمىي كېڭىشى يىغىنىدا پەلەستىننى ئېتىراپ قىلىدىغانلىقىنى جاكارلىغان ئىدى.
ئىسرائىلىيە بولسا بۇ پىلانلارنىڭ ھەممىسىنى قاتتىق تەنقىد قىلىپ، بۇنىڭ «ھاماسنى مۇكاپاتلاش» ھېسابلىنىدىغانلىقىنى ئىلگىرى سۈردى.
