«فىتچ» دەرىجە بېكىتىش ئورگىنى تۈركىيەنىڭ تىجارەت مۇھىتىغا بەرگەن باھاسىنىڭ ياخشىلانغانلىقىنى ۋە پۈتۈن ساھە بويىچە مۇقىم مالىيە ئەھۋالىنىڭ ساقلىنىۋاتقانلىقىنى نەزەردە تۇتۇپ، بىر قانچە چوڭ تۈركىيە بانكىسىنىڭ ئۇزۇن مۇددەتلىك چەت ئەل پۇلى بويىچە تارقاتقۇچىنىڭ دېفولت (قەرز قايتۇرالماسلىق) دەرىجىسىنى يۇقىرى كۆتۈردى.

ئورگان زىرائەت بانكىسى، ۋاقىفبانك ۋە تۈركىيە سانائەت تەرەققىيات بانكىسى (TSKB) نىڭ ئۇزۇن مۇددەتلىك چەت ئەل پۇلى دەرىجىسىنى «B+» تىن «BB-» گە، يەككە تۇرۇش ئىقتىدارى دەرىجىسىنى بولسا «b+» تىن «bb-» گە يۈكسەلدۈردى.

بۇ بانكىلارنىڭ ئۇزۇن مۇددەتلىك يەرلىك پۇل دەرىجىسى «BB-» دەپ مۇقىملاشتۇرۇلغان بولۇپ، دۆلەتلىك دەرىجىسى «AA(tur)» سەۋىيەسىدە قالدۇرۇلدى. بارلىق بانكىلارنىڭ ئىستىقبالى «مۇقىم» دەپ بېكىتىلدى.

ئەرەب تۈرك بانكىسى (ATB) نىڭمۇ دەرىجىسى يۈكسەلدۈرۈلگەن بولۇپ، ئۇنىڭ ئۇزۇن مۇددەتلىك تارقاتقۇچىنىڭ دېفولت دەرىجىسى «B» دىن «B+» غا، يەككە تۇرۇش ئىقتىدارى دەرىجىسى «b» دىن «b+» غا، دۆلەتلىك ئۇزۇن مۇددەتلىك دەرىجىسى بولسا «A-(tur)» دىن «A(tur)» غا ئۆستۈرۈلدى. ئۇنىڭ ئىستىقبالىمۇ ئوخشاشلا «مۇقىم» دەپ بېكىتىلدى.

ئورگان مۇنداق دېدى: «بۇ يۈكسەلدۈرۈشلەر، ‹فىتچ›نىڭ يېقىندا تۈركىيە بانكىلىرىنىڭ تىجارەت مۇھىتى دەرىجىسىنى <b+/مۇسبەت> تىن <bb-/مۇقىم> غا ئۆزگەرتىشىدە ئىپادىلەنگىنىدەك، تۈركىيەنىڭ تىجارەت مۇھىتىغا قاراتقان باھاسىنىڭ ياخشىلانغانلىقىنى كۆرسىتىپ بېرىدۇ. شۇنداقلا ياخشىلىنىۋاتقان تىجارەت شارائىتى ئاستىدا بانكىلارنىڭ ساقلاپ كېلىۋاتقان مۇقىم تىجارەت ۋە مالىيە ئەھۋالىمۇ نەزەرگە ئېلىندى».

«فىتچ» نىڭ بىلدۈرۈشىچە، زىرائەت بانكىسى، ۋاقىفبانك ۋە تۈركىيە سانائەت تەرەققىيات بانكىسىنىڭ ھۆكۈمەت قوللاش دەرىجىسىنىڭ «b+» تىن «bb-» گە يۈكسەلدۈرۈلۈشى، تاشقى پېرېۋوت زاپىسىنىڭ ياخشىلىنىشىغا ئەگىشىپ، ھۆكۈمەت دائىرىلىرىنىڭ بانكىچىلىق ساھەسىنى قوللاش ئىقتىدارىنىڭ كۈچەيگەنلىكىنى ئەكس ئەتتۈرىدىكەن.

ئورگان ئايرىم باياناتىدا، خەلق بانكىسى، ئەملاك قاتىلىم بانكىسى ۋە ۋاقىف قاتىلىم بانكىسىنىڭمۇ دەرىجىسىنىڭ يۈكسەلدۈرۈلگەنلىكىنى ئېلان قىلدى. بۇ بانكىلارنىڭ ئۇزۇن مۇددەتلىك چەت ئەل پۇلى تارقاتقۇچىنىڭ دېفولت دەرىجىسى «B+» تىن «BB-» گە ئۆستۈرۈلۈپ، ئىستىقبالى «مۇقىم» دەپ بېكىتىلدى.

بۇ بانكىلارنىڭ ھۆكۈمەت قوللاش دەرىجىسىمۇ ئوخشاش شەكىلدە «b+» تىن «bb-» گە يۈكسەلدۈرۈلدى.

ئىناۋەت دەرىجىسىنى بېكىتىش ئورگىنى يەنە تۈركىيە ئىش بانكىسى، ئاقبانك ۋە ياپى كرېدى بانكىسىنىڭ ھۆكۈمەت قوللاش دەرىجىسىنىڭ «b-» دىن «b» غا يۈكسەلدۈرۈلگەنلىكىنى بىلدۈردى.