ئامېرىكا تاشقى ئىشلار مىنىستىرى ماركو رۇبىئو، ئىسرائىلىيەنىڭ قاتاردا ھاماس ئەزالىرىنى نىشانغا ئالغان ھۇجۇمىنىڭ تېل ئاۋىۋ بىلەن ۋاشىنگتون ئوتتۇرىسىدىكى مۇناسىۋەتلەردە ھېچقانداق ئۆزگىرىش پەيدا قىلمايدىغانلىقىنى ئېيتتى.
رۇبىئو، شەنبە كۈنى ئەنگىلىيە ۋە ئىسرائىلىيەگە يولغا چىقىشتىن بۇرۇن مۇخبىرلارغا: «ئېنىقكى، بىز بۇنىڭدىن مەمنۇن بولمىدۇق؛ پىرېزىدېنتمۇ مەمنۇن بولمىدى» دېدى.
ئۇ يەنە: «بۇ ئەھۋال ئىسرائىلىيەلىكلەر بىلەن بولغان مۇناسىۋىتىمىزنىڭ ماھىيىتىنى ئۆزگەرتمەيدۇ، ئەمما بىز بۇ ھەقتە، بولۇپمۇ بۇنىڭ غەززەدە ئۇرۇش توختىتىشقا ئېرىشىش تىرىشچانلىقىغا قانداق تەسىر كۆرسىتىدىغانلىقى ھەققىدە سۆزلىشىشىمىز كېرەك» دېگەن سۆزلەرنى قىلدى.
ئىسرائىلىيە، سەيشەنبە كۈنى دوھادا ھاماس رەھبەرلىرى تۇرۇۋاتقان بىر ئولتۇراق رايوننى نىشانغا ئالدى.
ھۇجۇمدا، ئامېرىكانىڭ غەززەدىكى قىرغىنچىلىقنى ئاخىرلاشتۇرۇش ئۈچۈن تەكلىپ قىلغان يېڭى بىر كېلىشىمنى مۇزاكىرە قىلىۋاتقان بەش ھاماس ئەزاسى ۋە بىر قاتارلىق بىخەتەرلىك خادىمى ھاياتىدىن ئايرىلدى. ئىسرائىلىيە، 2023-يىلى ئۆكتەبىردىن بۇيان غەززەدە 64 مىڭدىن ئارتۇق ئادەمنى ئۆلتۈردى.
قاتار، ئامېرىكا ۋە مىسىر بىلەن بىرلىكتە ئىرقىي قىرغىنچىلىقنى ئاخىرلاشتۇرۇش ئۈچۈن ئېلىپ بېرىلغان سۆھبەتلەردە مۇرەسسەچىلىك رولى ئويناىماقتا.
نېتانياھۇ ھۇجۇمنى ئاقلىدى
ئىسرائىلىيە باش مىنىستىرى بېنيامىن نېتانياھۇ بولسا، قاتاردا ياشاۋاتقان ھاماس رەھبەرلىرىنىڭ ئۆلتۈرۈلۈشىنىڭ بارلىق گۆرۈگە ئېلىنغانلارنى قويۇپ بېرىش ۋە غەززەدىكى قىرغىنچىلىقنى ئاخىرلاشتۇرۇش ئالدىدىكى ئەڭ چوڭ توسالغۇنى يوقىتىدىغانلىقىنى بىلدۈردى.
نېتانياھۇ، X سۇپىسىدا يوللىغان يازمىسىدا: «قاتاردا ياشاۋاتقان ھاماس تېرورچى رەھبەرلىرى غەززەدىكى كىشىلەرگە كۆڭۈل بۆلمەيدۇ. ئۇلار ئۇرۇشنى مەڭگۈلۈككە ئۇزارتىش ئۈچۈن بارلىق ئۇرۇش توختىتىش تىرىشچانلىقىنى توسۇپ كەلدى» دېدى.
ھاماس، دوھا ھۇجۇمىنى ئىسرائىلىيەنىڭ ئۇرۇش توختىتىش سۆھبىتىنى بۇزۇش ئۇرۇنۇشى دەپ ئاتىدى ۋە بۇنىڭ غەززەدىكى ئىرقىي قىرغىنچىلىقنى ئاخىرلاشتۇرۇشقا ئالاقىدار شەرتلىرىنى ئۆزگەرتمەيدىغانلىقىنى تەكىتلىدى.
ئىسرائىلىيەنىڭ دوھاغا قىلغان ھۇجۇمىدىن كېيىن، تېل ئاۋىۋ پەلەستىن، يەمەن، سۈرىيە، لىۋان، ئىران ۋە قاتارنى ئۆز ئىچىگە ئالغان رايوندىكى جەمئىي ئالتە دۆلەتكە ھۇجۇم قىلغان بولدى.
