ياۋروپا ئىتتىپاقى كومىتېتىنىڭ مۇئاۋىن رەئىسى، قوشۇمچە تاشقى ئىشلار ۋە خەۋپسىزلىك سىياسىتى ئىشلىرى ئالىي ۋەكىلى كايا كاللاس رۇسىيە-ئۇكرائىنا ئۇرۇشى، ئوتتۇرا شەرق ۋە سۇداندىكى توقۇنۇشلار بىلەن بىرگە، خەلقئارا قائىدىلەرگە مۇناسىۋەتلىك تەرتىپنىڭ بارغانسېرى ئېغىر بېسىمغا دۇچ كېلىۋاتقانلىقىنى بىلدۈردى.
ياۋروپا ئىتتىپاقىنىڭ تاشقى سىياسەت ئىشلىرى مەسئۇلى كاللاس پەيشەنبە كۈنى «خەلقئارا كۆپ تەرەپلىمىلىك ۋە تىنچلىق ئۈچۈن دىپلوماتىيە كۈنى» مۇناسىۋىتى بىلەن ئېلان قىلغان باياناتىدا، خەلقئارا تەرتىپنىڭ بارغانسېرى كۈچىيىۋاتقان بىر بېسىم ئاستىدا قالغانلىقىنى ئەسكەرتتى.
ياۋروپا ئىتتىپاقى تاشقى مۇناسىۋەتلەر ئىشخانىسى تەرىپىدىن پەيشەنبە كۈنى ئېلان قىلىنغان باياناتتا، كايا كاللاسنىڭ «دۇنيا ھالقىلىق بىر بۇرۇلۇش نۇقتىسىدا تۇرۇۋاتىدۇ» دېگەن سۆزلىرى نەقىل كەلتۈرۈلدى.
كاللاس خەلقئارا قانۇننىڭ بۇرمىلىنىۋاتقانلىقىنى، كۆزگە ئىلىنمايۋاتقانلىقىنى ياكى ئوچۇق-ئاشكارا ھالدا دەپسەندە قىلىنىۋاتقانلىقىنى؛ تىنچلىق ۋە خەۋپسىزلىكنى قوغداش مەقسىتىدە قۇرۇلغان ئورگانلارنىڭ بولسا قىيىن ئەھۋالدا قالغانلىقىنى ئىپادىلىدى.
رۇسىيە-ئۇكرائىنا ئۇرۇشى بىلەن ئوتتۇرا شەرق ۋە سۇداندىكى ئۇرۇشلارنى خەلقئارا قائىدىلەرگە مۇناسىۋەتلىك تەرتىپ ئۈستىدىكى بارغانسېرى ئېشىۋاتقان بېسىمغا مىسال قىلىپ كۆرسەتكەن كاللاس: «بىرلەشكەن دۆلەتلەر تەشكىلاتى نىزامنامىسىنىڭ پرىنسىپلىرى بىۋاسىتە ھۇجۇم ئاستىدا» دېدى. ئۇ سۆزلىرىگە ئىلاۋە قىلىپ، بىرلەشكەن دۆلەتلەر تەشكىلاتىنىڭ دۇنياۋى مەنپەئەتلەرگە ۋەكىللىك قىلىش قانۇنىي سالاھىيىتىگە ئىگە بىردىنبىر ئۇنىۋېرسال رامكا ئىكەنلىكىنى، ئەمما پەقەت قانۇنىي سالاھىيەتنىڭلا كۇپايە قىلمايدىغانلىقىنى بىلدۈردى.
كاللاس كۆپ تەرەپلىمىلىكنىڭ كونا بولغانلىقى ئۈچۈن ئەمەس، بەلكى پرىنسىپلىرى قوغدالمىغانلىقى ياكى ئىجرا قىلىنمىغانلىقى ئۈچۈن مەغلۇپ بولغانلىقىنى تەكىتلىدى، ھەمدە ياۋروپا ئىتتىپاقىنىڭ كۆپ تەرەپلىمىلىك سىستېمىنى كۈچەيتىش ئىرادىسىنىڭ قەتئىيلىكىنى، بۇ سىستېمىنىڭ تېخىمۇ ئۈنۈملۈك، ھەممىنى ئۆز ئىچىگە ئالىدىغان ۋە جاۋابكارلىقنى سۈرۈشتۈرگىلى بولىدىغان ھالەتكە كېلىشى كېرەكلىكىنى ئىپادىلىدى.
كاللاس يەنە يەرلىك ئاكتىيورلار، ئاياللار، پۇقرالار جەمئىيىتى ۋە ياشلارنى ئۆز ئىچىگە ئالغان تىنچلىق جەريانلىرى ۋە ۋاسىتىچىلىك تىرىشچانلىقلىرىنىڭ مۇھىملىقىنى تەكىتلىدى.
