ئامېرىكا پىرېزىدېنتى دونالد ترامپ نۆۋەتتىكى ۋاقىتلىق باجلارنىڭ مۇددىتىنىڭ توشۇشىغا ئەگىشىپ، ئامېرىكا ئىمپورتىنىڭ 99 پىرسەنتىنى ئىگىلەيدىغان 60 نەچچە سودا شېرىكىگە يېڭىدىن قوشۇمچە تاموژنا بېجىنى يولغا قويىدىغانلىقىنى ئېلان قىلدى. جۈمە كۈنى سائەت 00:01 دىن باشلاپ كۈچكە ئىگە بولىدىغان بۇ بەلگىلىمە بويىچە، مەزكۇر دۆلەتلەردىن سېتىۋېلىنغان ماللارغا 10 پىرسەنتتىن 12.5 پىرسەنتكىچە باج يۈرگۈزۈلىدىكەن.
ۋاشىنگتون ھۆكۈمىتى بۇ قارارغا، مەزكۇر دۆلەتلەرنىڭ مەجبۇرىي ئەمگەك ئارقىلىق ئىشلەپچىقىرىلغان ماللارغا قويۇلغان چەكلەشلەرنى يېتەرلىك دەرىجىدە ئىجرا قىلمىغانلىقىنى ئاساسىي سەۋەب قىلىپ كۆرسەتتى.
ئامېرىكا سودا ۋەكىلى جەمىيسون گىرېر (Jamieson Greer) بۇ ھەقتە بايانات ئېلان قىلىپ: «ئامېرىكا تەخمىنەن بىر ئەسىردىن بۇيان مەجبۇرىي ئەمگەك ئارقىلىق ئىشلەپچىقىرىلغان ماللارنىڭ ئىمپورت قىلىنىشىنى چەكلەپ ۋە قاتتىق نازارەت قىلىپ كېلىۋاتىدۇ. سودا شېرىكلىرىمىزنىڭمۇ بۇنىڭغا ئەگىشىدىغان ۋاقتى ئاللىقاچان يېتىپ كەلدى. بۇ قەدەم كىشىلىك ھوقۇق دەپسەندىچىلىكى ۋە سودىغا بۇزغۇنچىلىق قىلىدىغان قىلمىشلارنى تۈزىتىش ئارقىلىق، پۈتكۈل خىزمەتچىلەرنىڭ پاراۋانلىقىنى ئاشۇرىدۇ» دېدى.
ترامپ بۇ قارارىدا 1974-يىللىق «سودا قانۇنى» نىڭ 301-ماددىسىغا ئاساسلانغان بولۇپ، مەزكۇر ماددا پىرېزىدېنتقا «ئادالەتسىز»، «مۇۋاپىق بولمىغان» ياكى «كەمسىتىش خاراكتېرلىك» سودا قىلمىشلىرى بىلەن شۇغۇللانغان دۆلەتلەرگە ئېمبارگو يۈرگۈزۈش ھوقۇقى بېرىدۇ. ترامپ بىرىنچى نۆۋەتلىك پىرېزىدېنتلىق مەزگىلىدە خىتايغا قاراتقان كەڭ كۆلەملىك تاموژنا باجلىرىنىمۇ دەل مۇشۇ ماددىغا ئاساسەن ئىجرا قىلغانىدى.
ئۆتكەن يىلى ئالىي سوت مەھكىمىسى ترامپنىڭ دۇنياۋى تاموژنا بېجىنى ئەمەلدىن قالدۇرغاندىن كېيىن، ھۆكۈمەت 150 كۈنلۈك ۋاقىتلىق باجلارنى ئىشقا كىرىشتۈرگەن بولۇپ، بۇ ۋاقىتلىق مۇددەت جۈمە كۈنى ئاخىرلاشتى.
يەنە بىر تەرەپتىن، نېفىت، تەبىئىي گاز، ئوغۇت قاتارلىق بەزى مەھسۇلاتلار ھەمدە «ئامېرىكا-مېكسىكا-كانادا كېلىشىمى» (USMCA) دائىرىسىدىكى ماللار بۇ يېڭى باجلاردىن كەچۈرۈم قىلىندى.
