رۇسىيە مۇداپىئە مىنىستىرلىقى، ئۇكرائىنادىكى ئەشيا ئوبوروت مەركەزلىرىگە، ئامبارلارغا ۋە پورتلارغا ھۇجۇملارنىڭ قىلىنغانلىقىنى، ئۇكرائىنا ئارمىيەسىنىڭ ئېھتىياجى ئۈچۈن ئىشلىتىلىدىغان پاراخوتلارنىڭمۇ ئۇچقۇچىسىز ئايروپىلانلار بىلەن نىشانغا ئېلىنغانلىقىنى بىلدۈردى.
مىنىستىرلىقتىن ئېلان قىلىنغان باياناتتا، كېچىدە ئۇكرائىنانىڭ كىيېۋ ۋە ئودېسسا رايونلىرىدىكى تۈرلۈك نىشانلارنىڭ پاچاقلاپ تاشلانغانلىقى ئۇقتۇرۇلدى.
كىيېۋ رايونىنىڭ شچاستلىۋويې ئولتۇراق رايونىغا جايلاشقان «BDU Logistic» مەركىزىنىڭ نىشانغا ئېلىنغانلىقى خاتىرىلەنگەن باياناتتا، مەركەزنىڭ ئامبارلىرىدا ھەربىي مەقسەتلىك مەھسۇلاتلارنىڭ ساقلانغانلىقى ۋە تارقىتىلغانلىقى بىلدۈردى.
باياناتتا يەنە، بوياركا ئولتۇراق رايونىدىكى ئۇكرائىنانىڭ ھەربىي سانائەت ئەسلىھەلىرىنى تەبىئىي گاز بىلەن تەمىنلەيدىغان تارقىتىش پونكىتىنىڭمۇ نىشان قىلىنغانلىقى ئىپادىلەندى.
ئودېسسا رايونىدا بولسا، ئودېسسا پورتىدا ئۇكرائىنا ئارمىيەسىگە يۈك توشۇيدىغان قۇرۇق يۈك پاراخوتىنىڭ نىشانغا ئېلىنغانلىقىغا ئائىت ئۇچۇر ھەمبەھىرلەندى.
ئىزمائىل پورتىدا ھەربىي مەقسەتلىك يۈكلەرنى چۈشۈرۈش ۋە ساقلاشتا ئىشلىتىلىدىغان پورت ئۇل ئەسلىھەلىرىنىڭ نىشان قىلىنغانلىقى بىلدۈرۈلگەن باياناتتا، ئودېسسا پورتىغا قاراپ ئۇكرائىنا ئارمىيەسى ئۈچۈن يۈك توشۇۋاتقان يەنە بىر قۇرۇق يۈك پاراخوتىنىڭمۇ يۈرۈش جەريانىدا ئۇرۇلغانلىقى قەيت قىلىندى.
بۇنىڭدىن سىرت مىنىستىرلىق، كېچىچە رۇسىيە زېمىنىغا ئەۋەتىلگەن ئۇكرائىناغا تەۋە 244 دانە ئۇچقۇچىسىز ئايروپىلاننى پاچاقلاپ تاشلىغانلىقىنى ئېلان قىلدى.
