پاكىستان دائىرىلىرىنىڭ دۈشەنبە كۈنى ئېلان قىلغان باياناتىغا قارىغاندا، پاكىستان دۆلەت خەۋپسىزلىك كۈچلىرى كېچىدە ئېلىپ بېرىلغان تۇيۇقسىز ھۇجۇمدا، ئۆتكەن يىلى دۆلەتنىڭ جەنۇبىدىكى پورت شەھىرى كاراچىدىكى بىر توقۇمىچىلىق زاۋۇتىدا ئىشلەۋاتقان ئىككى خىتاي پۇقراسىنىڭ يارىلىنىشىنى كەلتۈرۈپ چىقارغان ھۇجۇمنى پىلانلىغانلىقى ئىلگىرى سۈرۈلگەن ئۈچ تېررورچىنى ئۆلتۈرگەن.
تېررورىزمغا قارشى كۈرەش ئىدارىسىنىڭ يۇقىرى دەرىجىلىك ئەمەلدارى ئازاد خان، ئۆلتۈرۈلگەن قوراللىق ئۇنسۇرلار ئارىسىدا 2024-يىلى نويابىردىكى ھۇجۇمنىڭ ئاتالمىش پىلانلىغۇچىسىنىڭمۇ بارلىقىنى بىلدۈردى.
ئازاد خان بۇ كىشىنىڭ ئىسمىنىڭ پەقەت زافران ئىكەنلىكىنى، ھەمدە «پاكىستان تالىبانى» دەپ تونۇلغان «تەھرىكى تالىبان پاكىستان» نىڭ ئەزاسى ئىكەنلىكىنى ئېيتتى.
«Dawn» گېزىتىنىڭ خەۋىرىگە قارىغاندا، تېررورىزمغا قارشى كۈرەش ئىدارىسى ۋە ئىستىخبارات ئورگانلىرى مەزكۇر ھەربىي ھەرىكەتنى كاراچىنىڭ مانگوپىر بازىرىدا ئېلىپ بارغان.
خىتاي بېيجىڭنىڭ مىلياردلارچە دوللارلىق «بىر بەلباغ، بىر يول» پىلانى دائىرىسىدە تاشيول، تۆمۈريول ۋە ئېنېرگىيە ئىستانسىلىرىغا ئوخشىغان چوڭ تىپتىكى ئۇل ئەسلىھە قۇرۇلۇشلىرىدا ئىشلەۋاتقان پۇقرالىرىنىڭ بىخەتەرلىكىنى كۈچەيتىش ئۈچۈن پاكىستانغا كۆپ قېتىم بېسىم ئىشلەتكەن.
خىتاي پۇقرالىرى بولۇپمۇ پاكىستان دائىرىلىرى تەرىپىدىن چەكلەنگەن ۋە ئامېرىكا تەرىپىدىن تېررورلۇق تەشكىلاتى دەپ ئېتىراپ قىلىنغان «تەھرىكى تالىبان پاكىستان» ۋە بۆلگۈنچى بېلۇجىستان ئازادلىق ئارمىيەسىگە ئوخشىغان گۇرۇپپىلارنىڭ ھۇجۇملىرىغا ئۇچرىماقتا ئىكەن.
پاكىستان خۇسۇسىي زاۋۇتلاردا ئىشلەيدىغانلارنىمۇ ئۆز ئىچىگە ئالغان خىتاي ئىشچىلىرى ئۈچۈن بىخەتەرلىك تەدبىرلىرىنى كۈچەيتىشكە ۋەدە بەردى.
تىراھ ۋادىسىدىكى ئۆلۈملەر
يەرلىك ھۆكۈمەت ئەمەلدارى فىياز خان ئالدىنقى كۈنى غەربىي شىمالدىكى خەيبەر پاختۇنخۋا ئۆلكىسىگە قاراشلىق تىراھ ۋادىسىدا كەم دېگەندە يەتتە كىشىنىڭ ئۆلگەنلىكىنى جاكارلىدى.
فىياز خان ھەپتە ئاخىرىدىكى مىناميوت ھۇجۇمىدا بىر بالىنىڭ ئۆلتۈرۈلۈشىدىن كېيىن، يۈزلىگەن كىشىنىڭ قوغدىلىش ۋە ئادالەت تەلەپ قىلىپ بىر ھەربىي لاگېر ئالدىغا يىغىلىپ نامايىش ئۆتكۈزگەنلىكىنى ئېيتتى ھەمدە «نامەلۇم قوراللىقلار» نىڭ ئاممىغا ئوق چىقارغانلىقىنى بىلدۈردى.
ئۇ، نامايىشچىلارنىڭ بەزى كىشىلەر ھەربىي لاگېرغا تاش ئاتقاندىن كېيىن، دۆلەت خەۋپسىزلىك كۈچلىرىنىڭ ئوق چىقارغانلىقىنى ئىلگىرى سۈرگەنلىكىنى، ئەمما ساقچىلارنىڭ كىمنىڭ ئۆلۈمنى كەلتۈرۈپ چىقارغانلىقىنى تېخى ئېنىقلىيالمىغانلىقىنى ئەسكەرتتى.
يېقىن ئەتراپتىكى ئېگىزلىكلەردىنمۇ ئوق ئاۋازى ئاڭلانغانلىقىنى ئەسكەرتكەن خان، ساقچىلارنىڭ «تەھرىكى تالىبان پاكىستان» نىڭ خەلق بىلەن ئارمىيە ئوتتۇرىسىدا ئىختىلاپ پەيدا قىلىش مەقسىتىدە بۇ ھۇجۇمنى ئېلىپ بارغانلىقىدىن گۇمانلىنىۋاتقانلىقىنى بىلدۈردى.
ھۆكۈمەت نامايىشچىلارنىڭ ئۆلتۈرۈلۈش قىلمىشىنىڭ تەكشۈرۈلۈشكە باشلانغانلىقىنى جاكارلىدى.
