جۇمھۇر رەئىس رەجەپ تاييىپ ئەردوغان: «رايونىمىز ئوت چەمبىرىكىگە ئايلانغان بىر شارائىتتا، ‹تېررورلۇقتىن خالىي تۈركىيە› تىرىشچانلىقلىرى ھازىرنىڭ ئۆزىدىلا تۈركىيەنىڭ رەقىبلىرىنى چەكلەش رولىنى ئويناپ، تۈركىيەنىڭ كۈچىگە كۈچ قوشتى ۋە رايونىمىزدا يېڭى بىر كەيپىيات ياراتتى» دېدى.
جۇمھۇر رەئىس ئەردوغان تۈركىيە بۈيۈك مىللەت مەجلىسىنىڭ 28-نۆۋەتلىك 5-قانۇن چىقىرىش يىلىنىڭ ئېچىلىشى مۇناسىۋىتى بىلەن مەجلىس ئومۇمىي يىغىنىدا سۆز قىلدى.
«ئوخشىمىغان سىياسىي پارتىيەلەر، بىر-بىرىگە قانچىلىك زىت بولۇشىدىن قەتئىينەزەر، ئوخشىمىغان پىكىرلەر تۈركىيە ۋە تۈرك دېموكراتىيەسىنىڭ بايلىقىدۇر. بىراق ھەربىر سىياسىي پارتىيە تۈركىيەنى ئالدىنقى ئورۇنغا قويۇشى كېرەك، شۇنداق قىلىشقا مەجبۇر» دېگەن ئەردوغان سۆزىنى مۇنداق داۋاملاشتۇردى:
«تۈركىيەنىڭ مىللىي مەنپەئەتى ۋە خەلقىمىزنىڭ ھەربىر ئەزاسىغا مۇناسىۋەتلىك مەسىلىلەردە، سىياسىي كۈچلەر تولۇق ئورتاق تونۇش ئاساسىدا بىر يەرگە كېلەلەيدىغان بولۇشى كېرەك. بىز بۇنى ‹ئىچكى سەپنى مۇستەھكەملەش› دەيمىز. بىز بۇنى ‹بۈيۈك تۈركىيە ئورتاق تونۇشى› دەيمىز. ‹تېررورلۇقتىن خالىي تۈركىيە› مۇساپىمىزنىڭ شۇنىڭ بىلەن بىر ۋاقىتتا بۇ ئىجتىمائىي ئورتاق تونۇشنى، دەل مۇشۇ مىللىي ئورتاق تونۇشنى بەرپا قىلىشنىمۇ نىشان قىلىدىغانلىقىنى ئالاھىدە تەكىتلىمەكچىمەن. رايونىمىز ئوت چەمبىرىكىگە ئايلانغان بىر شارائىتتا، ‹تېررورلۇقتىن خالىي تۈركىيە› تىرىشچانلىقلىرى ھازىرنىڭ ئۆزىدىلا تۈركىيەنىڭ رەقىبلىرىنى چەكلەش رولىنى ئويناپ، تۈركىيەنىڭ كۈچىگە كۈچ قوشتى ۋە رايونىمىزدا يېڭى بىر كەيپىيات ياراتتى.»
