بېيجىڭ بىلەن ۋاشىنگتون ئوتتۇرىسىدا بىر-بىرىنى جاسۇسلۇق جىنايىتى بىلەن ئەيىبلەشلەر يۇقىرى پەللىگە چىققان بىر پەيتتە، خىتاي «زۆرۈر بولغان تەدبىرلەرنى» قوللىنىدىغانلىقىنى ئېلان قىلدى.
خىتاي تاشقى ئىشلار مىنىستىرلىقىنىڭ باياناتچىسى لىن جيەن سەيشەنبە كۈنى (6-ماي) دىكى باياناتىدا: «ئامېرىكا خىتايغا يامان غەرەز بىلەن ھۇجۇم قىلىپلا قالماي، يەنە خىتاي دۆلەت خادىملىرىنى ئالداپ، تەسلىم بولۇشقا قىزىقتۇرۇۋاتىدۇ، ھەتتا خىتاي ھۆكۈمەت ئەمەلدارلىرىنى بىۋاسىتە نىشان قىلىۋاتىدۇ» دېدى.
ئالدىنقى ھەپتە ، ئامېرىكا مەركىزىي ئاخبارات ئىدارىسى «خىتاي ئەمەلدارلىرىنى ئامېرىكاغا ياردەم بېرىش» كە ئىلھاملاندۇرۇشنى مەقسەت قىلغان بىر يۈرۈش سىنلارنى تارقاتتى. ئامېرىكا مەركىزىي ئاخبارات ئىدارىسى دېرىكتورى جون راتكىللېف: «سىنلار بىزنىڭ مەركىزىي ئاخبارات ئىدارىسىنىڭ ئىش قىلىش ئۇسۇلىمىزغا ماسلاشقان نۇرغۇن يوللارنىڭ بىرىدۇر» دېدى.
خىتاي سەيشەنبە كۈنى ئېلان قىلغان باياناتىدا، «ئامېرىكا باشقا دۆلەتلەرنىڭ مەخپىيەتلىكىنى ئوغرىلاش، ئىچكى ئىشلىرىغا ئارىلىشىش ۋە سىياسىي كۈچىنى ئاجىزلىتىش ئۈچۈن ھەر خىل پەسكەش ئۇسۇللارنى قوللانماقتا» دېگەن ھەمدە ئامېرىكا مەركىزىي ئاخبارات ئىدارىسى تەرىپىدىن ئىجتىمائىي ئالاقە تورلىرىدا تارقىتىلغان سىنلارنى «ئامېرىكانىڭ بۇ ئۇسۇللارنى قوللانغانلىقىنىڭ يەنە بىر ئىسپاتى» دەپ تەسۋىرلىگەن ئىدى.
باياناتچى لىن يەنە، خىتاينىڭ بۇ سىنلارنى «كۈچلۈك» ئەيىبلىگەنلىكىنى تەكىتلىدى.
جاسۇسلۇق جىنايىتى بىلەن ئەيىبلەشتە بىر – بىرىگە قىلىنىۋاتقان ھۇجۇملار
بىر - بىرىنى جاسۇسلۇق جىنايىتى بىلەن ئەيىبلەشلەر داۋاملىشىۋاتقان بىر مۇھىتتا، ئالدىنقى ئاي خىتاي بىخەتەرلىك خادىملىرى فېۋرالدا خاربىندا ئۆتكۈزۈلگەن ئاسىيا قىشلىق تەنھەرىكەت مۇسابىقىسى جەريانىدا، ئامېرىكانىڭ ئۈچ نەپەر «مەخپىي خادىمى» نىڭ تور ھۇجۇمىغا چېتىلغانلىقىنى ئېلان قىلغان ئىدى.
مارتتا بولسا، خىتاي بىخەتەرلىك مىنىستىرلىقى بىر ئىنژېنېرنىڭ دۆلەت مەخپىيەتلىكىنى ئىسمى ئاشكارىلانمىغان بىر چەت ئەل كۈچىگە يەتكۈزگەنلىكى ئۈچۈن ئۆلۈم جازاسى بېرىلگەنلىكىنى ئېلان قىلغان ئىدى.
خىتاي سەيشەنبە كۈنى ئېلان قىلغان باياناتىدا، خىتاينىڭ زۆرۈر بولغان تەدبىرلەرنى قوللىنىپ، خىتايغا قارشى كۈچلەرنىڭ سىڭىپ كىرىش ۋە بۇزغۇنچىلىق قىلىش ھەرىكەتلىرىنى قەتئىي باستۇرۇپ، دۆلەتنىڭ ئىگىلىك ھوقۇقى، تەرەققىياتى ۋە بىخەتەرلىك مەنپەئەتىنى قەتئىي قوغدايدىغانلىقىنى بىلدۈرگەن ئىدى.
