سەئۇدى ئەرەبىستان دۆلەت خەۋپسىزلىك كۈچلىرى پادىشاھلىقنىڭ مۇھىم بىر نېفىت مەركىزىنى نىشانلىغان ئىراننىڭ ئىككى دانە ئۇچقۇچىسىز ھاۋا ئاپپاراتىنى پاچاقلاپ تاشلىدى؛ چۈشكەن بومبا پارچىلىرى سەۋەبىدىن كىچىك كۆلەملىك ئوت ئاپىتى يۈز بەردى. راس تانۇرا نېفىت پىششىقلاپ ئىشلەش زاۋۇتى ۋاقىتلىق تاقالدى.
ئاخبارات ۋاسىتىلىرىنىڭ خەۋەرلىرىگە قارىغاندا، دۈشەنبە كۈنى ئىراننىڭ ئۇچقۇچىسىز ھاۋا ئاپپاراتى ھۇجۇمى سەئۇدى ئەرەبىستاننىڭ ئارامكو شىركىتىنىڭ راس تانۇرا نېفىت پىششىقلاپ ئىشلەش ئەسلىھەسىنى نىشانلىغان ۋە ئوت ئاپىتىنى كەلتۈرۈپ چىقارغان. سەئۇدى ئەرەبىستان بولسا ئۇچقۇچىسىز ھاۋا ئاپپاراتلىرىغا تاقابىل تۇرۇلغانلىقىنى جاكارلىغان.
سەئۇدى ئەرەبىستاننىڭ رەسمىي خەۋەر ئاگېنتلىقى SPA نىڭ دۆلەت مۇداپىئە ۋىزارىتى باياناتچىسىنىڭ سۆزلىرىنى مەنبە كۆرسىتىپ ئېلان قىلغان خەۋىرىدە مۇنداق دېيىلدى:
«بۈگۈن ئەتىگەن راس تانۇرا نېفىت پىششىقلاپ ئىشلەش زاۋۇتىغا ھۇجۇم قىلماقچى بولغان ئىككى ئۇچقۇچىسىز ھاۋا ئاپپاراتى بىر تەرەپ قىلىندى ۋە يوقىتىلدى. بۇ جەرياندا چۈشكەن بومبا پارچىلىرى ئوت ئاپىتىنى كەلتۈرۈپ چىقاردى، پۇقرالاردىن ھاياتىدىن ئايرىلغانلارنىڭ بار - يوقلۇقى ھەققىدە مەلۇمات بېرىلمىدى.
بىر تەرەپ قىلىش ھەرىكىتى نەتىجىسىدە بومبا پارچىلىرىنىڭ پۇقرالارغا يېقىن جايلارغا چۈشكەنلىكى ئېنىقلاپ چىقىلدى.»
مەزكۇر ۋەقە ئاممىۋى ئورتاقلىشىش تور بەتلىرىدە كەڭ تارقالغان كۆرۈنۈشلەردىمۇ ئەكس ئەتتى.
رېيتېر ئاگېنتلىقىنىڭ ساھە مەنبەلىرىگە ئاساسەن ئېلان قىلغان خەۋىرىگە قارىغاندا، سەئۇدى ئەرەبىستاننىڭ نېفىت ماگناتى بولغان ئارامكو شىركىتى ئۇچقۇچىسىز ھاۋا ئاپپاراتى ھۇجۇمىدىن كېيىن راس تانۇرا زاۋۇتىنى تاقىغان. مەنبەلەر بۇ قەدەمنىڭ ئالدىنى ئېلىش تەدبىرى سۈپىتىدە تاشلانغانلىقىنى ۋە ۋەزىيەتنىڭ كونترول ئاستىدا ئىكەنلىكىنى بىلدۈرگەن.
سەئۇدى ئەرەبىستاننىڭ شەرقىي قىرغىقىغا ۋە پارىس قولتۇقى بويىغا جايلاشقان راس تانۇرا پادىشاھلىقنىڭ ئاساسلىق نېفىت پىششىقلاپ ئىشلەش ۋە ئېكسپورت مەركەزلىرىدىن بىرى ھېسابلىنىدۇ. كۈنىگە 550 مىڭ ۋارىل نېفىت پىششىقلاپ ئىشلەش ئىقتىدارىغا ئىگە بۇ ئەسلىھە ئوتتۇرا شەرقنىڭ ئەڭ چوڭ زاۋۇتلىرىدىن بىرىدۇر.
سەئۇدى ئەرەبىستاننىڭ يۇقىرى دەرىجىلىك خەۋپسىزلىك تەدبىرلىرى بىلەن قوغدىلىدىغان ئېنېرگىيە ئەسلىھەلىرى ئىلگىرىمۇ نىشانغا ئېلىنغان ئىدى؛ بۇلارنىڭ ئىچىدە ئەڭ گەۋدىلىكى 2019-يىلى سېنتەبىردە ئابقايق ۋە خۇرەيس ئەسلىھەلىرىگە قىلىنغان ئۇچقۇچىسىز ھاۋا ئاپپاراتى ۋە باشقۇرۇلىدىغان بومبا ھۇجۇملىرىدۇر. بۇ ھۇجۇملار پادىشاھلىقنىڭ خام نېفىت ئىشلەپچىقىرىشىنىڭ يېرىمىدىن كۆپرەكىنى ۋاقىتلىق ئىشتىن توختىتىپ، يەر شارى نېفىت بازارلىرىنى قالايمىقانلاشتۇرۇۋەتكەن ئىدى.
ئامېرىكا قوشما ئىشتاتلىرى بىلەن ئىسرائىلىيە شەنبە كۈنى ئىرانغا ھۇجۇم قىلىپ، دىنىي رەھبەر ئەلى خامىنېينىمۇ ئۆز ئىچىگە ئالغان نۇرغۇن ئىرانلىق رەھبەرنى ئۆلتۈردى. تېھران بولسا ئىسرائىلىيەنى ۋە تۈرلۈك پارىس قولتۇقى دۆلەتلىرىدىكى ئامېرىكا مال-مۈلۈكلىرىنى نىشانلىغان بىر يۈرۈش ئۇچقۇچىسىز ھاۋا ئاپپاراتى ۋە باشقۇرۇلىدىغان بومبا ھۇجۇملىرى بىلەن جاۋاب قايتۇردى. ئىران ئېلىپ بارغان ھۇجۇملىرىدا ھازىرغىچە بەھرەين، ئىراق، ئىيوردانىيە، كۇۋەيت، ئومان، قاتار، سەئۇدى ئەرەبىستان ۋە ئەرەب بىرلەشمە خەلىپىلىكىنى نىشانغا ئالدى.
