يەرلىك تاراتقۇلارنىڭ سەيشەنبە كۈنى ئارمىيە دائىرىلىرىنى مەنبە كۆرسىتىپ خەۋەر قىلىشىچە، ئامېرىكا قوشما ئىشتاتلىرى شىمالىي كورېيەنىڭ يادرو ئەسلىھەلىرىگە دائىر ئۇچۇرلارنىڭ جامائەتچىلىككە ئاشكارىلىنىپ كېتىشى بىلەن مۇناسىۋەتلىك كېلىپ چىققان بىر ئىختىلاپتىن كېيىن، جەنۇبىي كورېيە بىلەن سەزگۈر سۈنئىي ھەمراھ ئىستىخباراتلىرىنى ئورتاقلىشىشنى قىسمەن چەكلىگەن.
يونخاپ ئاگېنتلىقىنىڭ خەۋىرىگە قارىغاندا، يۇقىرى دەرىجىلىك بىر ئەمەلدار بەرگەن باياناتىدا، ۋاشىنگتوننىڭ مۇشۇ ئاينىڭ باشلىرىدا شىمالىي كورېيەنىڭ تېخنولوگىيە ئىقتىدارى بىلەن مۇناسىۋەتلىك بەزى ئىستىخبارات ئۇچۇرلىرىغا ئېرىشىشنى چەكلىگەنلىكىنى، بۇ ئۇچۇرلارنىڭ كۆپىنچە يادرو پىروگراممىسىنىڭ بەزى تەرەپلىرىنى ئۆز ئىچىگە ئالىدىغانلىقىنىڭ مۆلچەرلىنىۋاتقانلىقىنى بىلدۈرگەن.
يۇقىرى دەرىجىلىك بىر ئارمىيە ئەمەلدارى: «ئامېرىكا تەرەپنىڭ مۇشۇ ئاينىڭ باشلىرىدىن باشلاپ سۈنئىي ھەمراھلار ئارقىلىق توپلانغان شىمالىي كورېيە ئىستىخباراتلىرىنىڭ بەزى قىسىملىرىنى ئورتاقلىشىشنى چەكلىگەنلىكى راست. (ئورتاقلىشىش چەكلەنگەن ئىستىخبارات) شىمالىي كورېيەنىڭ بەزى تېخنولوگىيە ئۇنسۇرلىرىغا ئائىت ئۇچۇرلار بىلەن مۇناسىۋەتلىك» دېدى.
مەزكۇر ئەمەلدار چەكلەنگەن ئۇچۇرلارغا دائىر تەپسىلىي مەلۇمات بەرمىدى.
بۇ قەدەم جەنۇبىي كورېيە بىرلىككە كەلتۈرۈش ئىشلىرى مىنىستىرى چۇڭ دۇڭيۇڭنىڭ ئالدىنقى ئايدا پارلامېنت يىغىنىدا كۇسوڭ رايونىنى ئۇران قويۇلدۇرۇش ئەسلىھەسى بار جاي دەپ تەرىپلىشىدىن كېيىن تاشلانغان.
چەكلىمىلەرگە قارىماي، دائىرىلەر ئىتتىپاقداشلار ئوتتۇرىسىدىكى ئاساسلىق ئىستىخبارات ھەمكارلىقىنىڭ يەنىلا مۇستەھكەم ئىكەنلىكىنى تەكىتلىدى.
شىمالىي كورېيەنىڭ باشقۇرۇلىدىغان بومبا قويۇپ بېرىشى ۋە ھەربىي ھەرىكەتلىرىنى ئۆز ئىچىگە ئالغان ھالقىلىق خەۋپسىزلىك مەسىلىلىرىدىكى ئۇچۇر ئالماشتۇرۇش ئۈزۈلۈپ قالماي داۋاملاشماقتا، بۇ سېئۇلنىڭ مۇداپىئە تەييارلىقىنىڭ تەسىرگە ئۇچرىماسلىقىغا كاپالەتلىك قىلىدۇ.
چۇڭنىڭ بۇ باياناتى سەزگۈر ئىستىخبارات ئۇچۇرلىرىنىڭ ئاممىۋى سورۇنلاردا تىلغا ئېلىنىشىنىڭ ئاز ئۇچرايدىغان بىر مىسالى بولۇپ قالدى؛ بۇ ئەھۋال، ئۇچۇرلارنىڭ ئامېرىكادىكى ئورتاق مەنبەلەردىن كەلگەنلىكىگە ئىشىنىدىغان ۋاشىنگتوندا ئەندىشە قوزغىدى.
جەنۇبىي كورېيە بىرلىككە كەلتۈرۈش ئىشلىرى مىنىستىرلىقى مەزكۇر باياناتلارنىڭ ئوچۇق مەنبەلەرگە ئاساسلىنىدىغانلىقىنى ئىلگىرى سۈردى.
چۇڭ تالاش - تارتىشتىن كېيىن، ئۆزىنىڭ سۆزلىرىنىڭ مەخپىي ماتېرىياللارنى ئاشكارىلاشنى ئەمەس، بەلكى پيوڭياڭغا قارىتا يۈرگۈزۈلۈۋاتقان سىياسەتلەرگە ئىزاھات بېرىشنى مەقسەت قىلغانلىقىنى ئېيتىپ، پۇشايمان قىلىدىغانلىقىنى بىلدۈردى.
چۇڭ پارلامېنت ئەزالىرىغا شىمالىي كورېيەنىڭ ئىلگىرى يوڭبيون ۋە كاڭسوندا بارلىقى خەۋەر قىلىنغان ئەسلىھەلەردىن باشقا، يەنە غەربىي شىمالدىكى كۇسوڭ رايونىدىمۇ بىر ئۇران قويۇلدۇرۇش مۇئەسسەسەسىنى باشقۇرىدىغانلىقىنى بىلدۈرگەن ئىدى.
