ئىران ئىنقىلاب مۇھاپىزەتچىلىرى قىسمى يېقىن شەرقتىكى «ئۇرۇشنىڭ تەقدىرىنى ئۆزلىرىنىڭ بەلگىلەيدىغانلىقى»نى جاكارلىدى. ئىنقىلاب مۇھاپىزەتچىلىرى قىسمى تەرىپىدىن سەيشەنبە كۈنى ئېلان قىلىنغان باياناتتا: «ئۇرۇشنىڭ ئاخىرىنى بەلگىلەيدىغان تەرەپ بىز. رايوننىڭ تەڭلىمىسى ۋە كەلگۈسىدىكى ئورنى ئەمدى بىزنىڭ قوراللىق كۈچلىرىمىزنىڭ كونتروللۇقىدا؛ ئامېرىكا كۈچلىرى ئۇرۇشنى ئاخىرلاشتۇرالمايدۇ» دېگەن ئىبارىلەرگە ئورۇن بېرىلدى. مەزكۇر بايانات ترامپنىڭ رايوندىكى ئۇرۇشنىڭ پات ئارىدا ئاخىرلىشىشى مۇمكىنلىكى ھەققىدە بەرگەن باھالىرىدىن كېيىن ئوتتۇرىغا چىقتى.

ئىران دۆلەت تاراتقۇلىرى تارقاتقان يەنە بىر ئايرىم باياناتتا، ئىنقىلاب مۇھاپىزەتچىلىرى قىسمى (IRGC) ئامېرىكا قوشما ئىشتاتلىرى ۋە ئىسرائىلىيەنىڭ ھۇجۇملىرى داۋاملاشسا، تېھراننىڭ رايوندىن نېفىت ئېكسپورت قىلىنىشىغا رۇخسەت قىلمايدىغانلىقى ھەققىدە ئاگاھلاندۇردى. ئىنقىلاب مۇھاپىزەتچىلىرى قىسمىنىڭ باياناتچىسى دۆلەتكە قارىتىلغان ھۇجۇملار توختىمىسا، «بىر لىتىر نېفىتنىڭ»مۇ ئېكسپورت قىلىنىشىغا يول قويۇلمايدىغانلىقىنى تەكىتلىدى.

جىددىيچىلىكنى ئەۋج ئالدۇرغان تەھدىتلەر

دونالد ترامپ تېھران ھورمۇز بوغۇزىدىكى نېفىت توشۇش مۇلازىمىتىنى توختىتىشقا ئۇرۇنغان تەقدىردە، ئىرانغا تېخىمۇ قاتتىق جاۋاب قايتۇرىدىغانلىقى بىلەن تەھدىت سالدى. ئۇ بوغۇزدىكى نېفىت ئېقىمىغا توسقۇنلۇق قىلىدىغان ھەر قانداق بىر قەدەم تاشلانسا، ئىراننىڭ «ئۆلۈم، ئوت ۋە غەزەپ»كە دۇچ كېلىدىغانلىقىنى بىلدۈردى. ترامپ ئىراننىڭ نېفىت تىرانسپورتىغا دەخلى يەتكۈزۈش ئۇرۇنۇشىغا قارىتا ئېلىپ بېرىلىدىغان ھۇجۇملارنىڭ «20 ھەسسە كۈچلۈك» بولىدىغانلىقىنى ئېيتىپ ئاگاھلاندۇردى.

يەنە بىر تەرەپتىن، ئىنقىلاب مۇھاپىزەتچىلىرى قىسمى رايوندىكى ئامېرىكاغا تەۋە ئىلغار تېخنىكىلىق 10 دانە رادار سىستېمىسىنى ۋە بىر يۈرۈش قىممەت باھالىق ئۇچقۇچىسىز ھاۋا ئاپپاراتلىرىنى ۋەيران قىلغانلىقىنى ئاشكارىلىدى.

ئىنقىلاب مۇھاپىزەتچىلىرى قىسمى ترامپنى ئىراننىڭ ھەربىي كۈچىنى ئاجىز كۆرسىتىش ئۈچۈن «يالغان دەۋالارنى» قىلىش بىلەن ئەيىبلەپ، ئۇنىڭ جامائەت پىكىرىنى خاتا يۆنىلىشكە باشلاۋاتقانلىقىنى ۋە ئۇرۇشتىن كېلىۋاتقان بېسىمنى يەڭگىللىتىشكە ئۇرۇنۇۋاتقانلىقىنى قەيت قىلدى. باياناتتا يەنە، ئىراننىڭ باشقۇرۇلىدىغان بومبا قويۇپ بېرىش سالمىقىنى تۆۋەنلەتكەنلىكىگە دائىر قاراشلار رەت قىلىنىپ، دۆلەتنىڭ ئۇرۇش بېشى بىر توننىدىن ئاشىدىغان تېخىمۇ كۈچلۈك باشقۇرۇلىدىغان بومبىلارنى ئىشلىتىۋاتقانلىقى تەكىتلەندى.