غەززە سەھىيە مىنىستىرلىقى بۇ ھەقتە شەنبە كۈنى بايانات ئېلان قىلدى، ئىسرائىلىيەنىڭ نازۇك ئۇرۇش توختىتىشقا خىلاپلىق قىلىشنى داۋاملاشتۇرىۋاتقانلىقى بىلدۈرۈلدى.
غەززە سەھىيە مىنىستىرلىقى، ئىرقىي قىرغىنچىلىق باشلىنىپ ئىككى يىلدىن ئارتۇق ۋاقىت ئۆتكەنلىكىنى ۋە ئىسرائىلىيەنىڭ 70 مىڭدىن ئارتۇق كىشىنى ئۆلتۈرگەنلىكىنى بىلدۈردى.
باياناتتا غەززە سەھىيە مىنىستىرلىقى قىرغىنچىلىقتىكى ئۆلتۈرلگەنلەر سانىنىڭ 70 مىڭ 100 گە يۈكسەلگەنلىكىنى بىلدۈردى.
مىنىستىرلىق بۇ ئۆلۈملەردىن 354 ىنىڭ، ئۇرۇش توختىتىش كېلىشىمى 10- ئۆكتەبىردە ئىجرا قىلىنىشقا باشلىغاندىن بۇيان مەيدانغا كەلگەنلىكىنى ئەسكەرتتى.
مىنىستىرلىق ئۆتكەن 48 سائەتتە غەززەدىكى دوختۇرخانىلارغا ئىككى جەسەت كەلگەنلىكىنى ۋە بۇنىڭدىن بىرىنىڭ خارابىلىك ئاستىدىن چىقىرىلغانلىقىنى بىلدۈردى.
ئۆلگەنلەر سانىدىكى ئېشىشنىڭ، 299 جەسەتكە مۇناسىۋەتلىك سانلىق مەلۇماتلارنىڭ بىر تەرەپ قىلىنىپ ئەمەلدارلار تەرىپىدىن تەستىقلىنىشىدىن كېلىپ چىققانلىقى قەيت قىلىندى.
ئۇرۇش توختىتىشقا قارىماي، قامال ۋە خىلاپلىق قىلىشلار سەۋەبىدىن قورشىۋېلىنغان پەلەستىن رايونى چوڭقۇر بىر ئىنسانپەرۋەرلىك كىرىزىسى ئىچىدە تۇرۇشنى داۋاملاشتۇرماقتا.
ئىنسانپەرۋەرلىك سىنىقى
ئۆلتۈرۈلگەنلەرنىڭ خەۋىرى بىرلەشكەن دۆلەتلەر تەشكىلاتىنىڭ ھەر يىلى 29- نويابىردا خاتىرىلىنىدىغان «پەلەستىن خەلقى بىلەن ھەمكارلىشىش كۈنى» گە توغرا كەلدى.
ب د ت باش كاتىپى ئانتونىيو گۇتېررېس بىر باياناتتا، «بۇ پاجىئە نۇرغۇن جەھەتتىن ئەۋلادلار بويىچە خەلقئارا جەمئىيەتكە يۆنىلىش بەرگەن ئۆلچەملەر ۋە قانۇنلارغا سىناق بولدى» دېدى.
«بۇ قەدەر كۆپ پۇقرانىڭ ئۆلتۈرۈلۈشى، پۈتۈنلەي بىر نوپۇزنىڭ قايتا - قايتا ماكانىدىن ئايرىلىشى ۋە ئىنسانپەرۋەرلىك ياردەملەرنىڭ توسالغۇغا ئۇچرىتىلىشى ھېچقانداق شارائىتتا قوبۇل قىلىنمايدۇ» دەپ قوشۇمچە قىلدى.
ب د ت باش كاتىپى ئانتونىيو گۇتېررېس يەنە، «يېقىنقى ئۇرۇش توختىتىش بىر ئۈمىد نۇرى سۇنماقتا. ئەمدى بارلىق تەرەپلەرنىڭ ئۇنىڭغا تولۇق ھۆرمەت قىلىشى ۋە خەلقئارا قانۇننى قايتا ئورنىتىدىغان ۋە قوغدايدىغان ھەل قىلىش چارىلىرى ئۈچۈن ياخشى نىيەت بىلەن خىزمەت قىلىشى ھاياتىي ئەھمىيەتكە ئىگە» دېدى.
ئىسرائىلىيە، قامال ئاستىدىكى رايوننىڭ چوڭ بىر قىسمىنى خارابىلىككە ئايلاندۇرغان ۋە بارلىق نوپۇزنى ماكانىدىن ئايرىۋەتكەن ئەھۋالدا تۇرماقتا.
