ھاياتىدىن ئايرىلغان لىۋىيە ھەربىي ۋەكىللەر ئۆمىكى ئۈچۈن ئەنقەرەدە مۇراسىم ئۆتكۈزۈلدى

تۈركىيە شەنبە كۈنى پايتەخت ئەنقەرەدە بىر ئايروپىلان قازاسىدا ھاياتىدىن ئايرىلغان ۋە لىۋىيە ئارمىيەسى باش ئىشتاب باشلىقى گېنېرال مۇھەممەد ئەلى ئەلھاددادنىمۇ ئۆز ئىچىگە ئالغان لىۋىيە ھەربىي ۋەكىللەر ئۆمىكى ئەزالىرىنىڭ جەسەتلىرىنى لىۋىيەگە يولغا سېلىشتىن بۇرۇن بىر مۇراسىم ئۆتكۈزدى.

لىۋىيە ھەربىي ۋەكىللەر ئۆمىكى ئولتۇرغان بىر خۇسۇسىي ئايروپىلان 23-دېكابىر ئەنقەرەدە چۈشۈپ كەتكەن بولۇپ، ۋەكىللەر ئۆمىكىنىڭ بەش ئەزاسى ۋە ئۈچ ئايروپىلان خادىمىنى ئۆز ئىچىگە ئالغان سەككىز كىشىنىڭ ھەممىسى ھاياتىدىن ئايرىلغان ئىدى.

مۇراسىم مۇرتەد ھاۋا ئارمىيەسى بازىسى قۇماندانلىق ئىشتابىدا ئۆتكۈزۈلدى. مۇراسىمغا قاتناشقانلار بىر مىنۇت سۈكۈتتە تۇرۇپ ھۆرمەت بىلدۈردى، ئارقىدىن قۇرئان كەرىم تىلاۋەت قىلىنىپ، ھاياتىدىن ئايرىلغانلار ئۈچۈن دۇئا قىلىندى.

مەرھۇملارنىڭ ئىسىملىرى ئوقۇلغاندىن كېيىن، لىۋىيە ۋەكىللەر ئۆمىكى ئەزالىرىنىڭ جەسەتلىرى بىر ئايروپىلان بىلەن لىۋىيەگە يوللاندى.

مۇراسىمغا تۈركىيە دۆلەت مۇداپىئە مىنىستىرى ياشار گۈلەر، باش ئىشتاب باشلىقى گېنېرال سەلچۇق بايراقتارئوغلۇ، قۇرۇقلۇق ئارمىيە قۇماندانى گېنېرال مەتىن توكەل، دېڭىز ئارمىيە قۇماندانى ئادمىرال ئەرجۈمەنت تاتلىئوغلۇ، لىۋىيەنىڭ ئەنقەرەدە تۇرۇشلۇق باش ئەلچىسى مۇستافا ئەلغەلائىب، لىۋىيە ھەربىي ۋەكىللەر ئۆمىكى ئەزالىرى ۋە مەرھۇملارنىڭ ئائىلە تاۋابىئاتلىرى قاتناشتى.

ھاياتىدىن ئايرىلغانلار ئارىسىدا لىۋىيە باش ئىشتاب باشلىقى گېنېرال مۇھەممەد ئەلى ئەلھادداد، لىۋىيە قۇرۇقلۇق ئارمىيە قۇماندانى لېيتېنانت گېنېرال فۇتۇرى گىرىبەل، لىۋىيە ھەربىي زاۋۇتلار ئىدارىسىنىڭ باشلىقى بىرىگادا گېنېرالى مەھمۇد جۇما ئەلغىتەۋىي، لىۋىيە باش ئىشتاب باشلىقىنىڭ مەسلىھەتچىسى مۇھەممەد ئەسساۋى ۋە فوتوگراف مۇھەممەد ئۆمەر ئەھمەد مەھجۇب قاتارلىقلار بار ئىدى.

تۈركىيە باش ئىشتاب باشلىقى گېنېرال سەلچۇق بايراقتارئوغلۇمۇ لىۋىيە ھەربىي ۋەكىللەر ئۆمىكىنىڭ جەسەتلىرى دۆلىتىگە يولغا سېلىنغاندىن كېيىن، ئۇ يەردە ئۆتكۈزۈلىدىغان ھەربىي مۇراسىمغا قاتنىشىش ئۈچۈن لىۋىيەگە يۈرۈپ كەتتى.