ئامېرىكا قوشما ئىشتاتلىرى پىرېزىدېنتى دونالد ترامپ كانادا باش مىنىستىرى مارك كارنېيغا قىلغان، يېڭىدىن قۇرۇلغان «تىنچلىق كېڭىشى» گە قاتنىشىش تەكلىپىنى قايتۇرۇۋالدى.
ترامپ ئاممىۋى ئورتاقلىشىش تور بېتى Truth Social سەھىپىسىدە: «بۇ خەتنىڭ تىنچلىق كېڭىشىنىڭ كانادانىڭ قاتنىشىشىغا مۇناسىۋەتلىك سىزگە قىلغان تەكلىپىنى قايتۇرۇۋالغانلىقىنى بىلدۈرۈشىگە رۇخسەت قىلىڭ» دېگەن ئۇچۇرنى ھەمبەھىرلىدى.
كارنېي مۇشۇ ھەپتە ئامېرىكا رەھبەرلىكىدىكى دۇنيا تەرتىپىدە بىر «يوچۇق» بارلىقىغا دائىر سۆزلىرى بىلەن خەلقئارانىڭ دىققىتىنى قوزغىغان ئىدى.
كانادا ھۆكۈمىتى يەنە، ترامپ ئۆزى نام بەرگەن ۋە يەر شارى خاراكتېرلىك توقۇنۇشلارنى ئاخىرلاشتۇرۇشنى نىشان قىلغان بۇ تىنچلىق كېڭىشىگە قاتنىشىش ئۈچۈن ھېچقانداق پۇل تۆلىمەيدىغانلىقىنى بىلدۈرگەن ئىدى.
بۇ ئارىلىقتا ترامپ تۈنۈگۈن رەسمىي تونۇشتۇرغان يېڭى خەلقئارالىق كېڭىشىنىڭ رەئىسلىكىگە ئۆزىنى تەيىنلىدى.
دۇنيا رەھبەرلىرى «تىنچلىق كېڭىشى» نىڭ ئىمزا قويۇش مۇراسىمى ئۈچۈن پەيشەنبە كۈنى شىۋېيتسارىيەنىڭ داۋوس شەھىرىدە، دۇنيا ئىقتىساد مۇنبىرىنىڭ قوشۇمچە پائالىيىتى سۈپىتىدە بىر يەرگە جەم بولدى.
ترامپ مۇراسىم جەريانىدا كېڭەشنىڭ نىزامنامىسىنى ئېلان قىلدى ۋە ئىمزا قويۇشتىن ئىلگىرى نۇتۇق سۆزلىدى.
دەسلەپتە غەززەدە ئۇرۇش توختىتىش ۋە ئىرقىي قىرغىنچىلىقتىن كېيىنكى قايتا قۇرۇش ئىشلىرىنى نازارەت قىلىش ئۈچۈن پىلانلانغان بۇ تەشەببۇس، كېيىنچە ئونلىغان دۆلەت تەكلىپ قىلىنغان كەڭ دائىرىلىك بىر خەلقئارا مۇرەسسەچىلىك ئورگىنىغا ئايلاندى.
تەكلىپنى قوبۇل قىلغان دۆلەتلەر ئارىسىدا تۈركىيە، سەئۇدى ئەرەبىستان، پاكىستان، ئەرەب بىرلەشمە خەلىپىلىكى، بەھرەين، ئىيوردانىيە، قاتار، مىسىر ۋە ۋېنگىرىيە قاتارلىقلار بار.
باشقا قاتناشقۇچى دۆلەتلەر ئارىسىدا ماراكەش، ھىندونېزىيە، كوسوۋو، قازاقىستان، ئۆزبېكىستان، ۋېيتنام، ئارگېنتىنا، ئەرمېنىيە، ئەزەربەيجان ۋە بېلارۇسىيە بار.
ئالدىنقى ھەپتە ئاقساراي غەززەنىڭ ئۆتكۈنچى باسقۇچتىكى باشقۇرۇلۇشى ئۈچۈن قۇرۇلغان دۆلەتلىك كومىتېتنىڭ تەستىقلىشى بىلەن بىرلىكتە «تىنچلىق كېڭىشى» نىڭ قۇرۇلغانلىقىنىمۇ ئېلان قىلغان ئىدى.
