تۈركىيە جۇمھۇرىيىتى جۇمھۇر رەئىسى رەجەپ تاييىپ ئەردوغان ئىستانبۇل ئايرودۇرۇمىدا ئۆتكۈزۈلگەن 4-نۆۋەتلىك ئۇچۇش يولى ۋە قوشۇمچە سېلىنمىلارنى ئىشقا كىرىشتۈرۈش مۇراسىمىدا سۆز قىلدى.
جۇمھۇر رەئىس ئەردوغان ۋەزىپە ئۆتەشكە باشلىغان 2002-يىلىدىن بۈگۈنگىچە، پائالىيەتچان ئايرودۇرۇم سانىنى 26 دىن 58 گە كۆپەيتكەنلىكلىرىنى ئەسكەرتىپ: «تۈركىيەنى دۇنيادىكى ئەڭ كەڭ ئۇچۇش تورىغا ئىگە دۆلەتلەرنىڭ بىرىگە ئايلاندۇردۇق» دېدى.
پەقەت ئىستانبۇلنىڭ ئۆزىدىلا، 604 مىليارد 400 مىليون لىراسى ئاۋىياتسىيە ساھەسىگە تەۋە بولۇش شەرتى بىلەن، قاتناش ۋە ئۇل ئەسلىھە ساھەسىگە بۈگۈنكى قىممەت بويىچە جەمئىي 2 تىرىليون 120 مىليارد لىرا سېلىنما سېلىنغانلىقىنى ئەسكەرتكەن ئەردوغان مۇنداق دېدى: «2026-يىلىنىڭ دەسلەپكى 8 ئېيىدا، پۈتۈن مەملىكەت بويىچە ئايروپىلان بىلەن سەپەر قىلغان يولۇچىلار سانى 167 مىليون 500 مىڭدىن ئېشىپ، نوپۇسىمىزنىڭ تەخمىنەن ئىككى ھەسسىسىگە يەتتى.»
ئەردوغان سۆزىنى داۋاملاشتۇرۇپ مۇنداق دېدى:
«بىزنىڭ مەقسىتىمىز تۈركىيە جۇمھۇرىيىتىنى يېڭى سېلىنمىلار، تۈرلەر ۋە مۇلازىمەتلەر بىلەن گۈللەندۈرۈشتۇر. ئىشقا كىرىشتۈرۈلىدىغان 4- باسقۇچلۇق ئاساسلىق ئۇچۇش يولى ۋە قوشۇمچە سېلىنمىلار، دۇنيانى بىر-بىرىگە تۇتاشتۇرۇش كۈچى جەھەتتە دۇنيا بويىچە ئالدىنقى قاتاردا تۇرىدىغان ئىستانبۇل ئايرودۇرۇمىمىزغا ئىنتايىن زور تۆھپىلەرنى قوشىدۇ.»
