تۈركىيە جۇمھۇرىيىتى جۇمھۇر رەئىسى رەجەپ تاييىپ ئەردوغان تۈركىيەنىڭ پايتەختى ئەنقەرە ساھىبخانلىق قىلغان 36-نۆۋەتلىك ناتو باشلىقلار يىغىنىنىڭ غەلىبىلىك ئاخىرلاشقانلىقىنى ئېلان قىلىپ، پائالىيەتنىڭ مۇۋەپپەقىيەتلىك ئۆتۈشىگە تۆھپە قوشقان ئىشتىراكچىلارغا، تەشكىللىگۈچىلەرگە ۋە پايتەخت ئاھالىلىرىگە تەشەككۈر ئېيتتى.
ئەردوغان پەيشەنبە كۈنى «X» سۇپىسىدا ھەمبەھرىلىگەن ئۇچۇرىدا مۇنداق دېدى: «تۈركىيەنىڭ ساھىبخانلىقىدا ئەنقەرەدە ئۆتكۈزگەن 36-نۆۋەتلىك ناتو دۆلەت ۋە ھۆكۈمەت باشلىقلىرى يىغىنىنى غەلىبىلىك تاماملىدۇق. جۇمھۇر رەئىسلىك مەھكىمىسى كۇللىيەسىدە ئۆتكۈزۈلگەن بۇ باشلىقلار يىغىنىغا ناتوغا ئەزا 32 دۆلەت ۋە ھۆكۈمەت باشلىقىدىن سىرت يەنە 100گە يېقىن مىنىستىر، يۇقىرى دەرىجىلىك دىپلوماتلار، خەلقئارالىق تەشكىلاتلارنىڭ ۋەكىللىرى ۋە تەكلىپلىك مېھمانلار ئىشتىراك قىلدى. باشلىقلار يىغىنى جەريانىدا بىخەتەرلىكنى ئەڭ يۇقىرى سەۋىيەدە كاپالەتلەندۈرۈش بىلەن پۇقرالىرىمىزنىڭ ھوقۇق ۋە ئەركىنلىكىنى قوغداش ئوتتۇرىسىدىكى نازۇك تەڭپۇڭلۇققا ئالاھىدە دىققەت قىلىندى».
ئەردوغاننىڭ بىلدۈرۈشىچە قوللىنىلغان بىخەتەرلىك، قاتناش، ماسلاشتۇرۇش ۋە جەمئىيەت تەرتىپى تەدبىرلىرى رەھبەرلەرنىڭ بىخەتەرلىكى، شەھەر تۇرمۇشىنىڭ نورمال داۋاملىشىشى ۋە خەلقئارا جامائەتچىلىكنى توغرا ئۇچۇر بىلەن تەمىنلەشنى مەقسەت قىلغان ھالدا ئىنتايىن ئىنچىكىلىك بىلەن پىلانلانغان بولۇپ، پۇقرالارنىڭ كۈندىلىك تۇرمۇشىغا دەخلى يەتكۈزمەسلىككە ئالاھىدە ئەھمىيەت بېرىلگەن.
جۇمھۇر رەئىس سۆزىنى داۋاملاشتۇرۇپ مۇنداق دېدى: «جۇمھۇر رەئىسلىك مىللەت كۇتۇپخانىمىز خەلقئارالىق تاراتقۇ مەركىزى سۈپىتىدە خىزمەت قىلدى؛ 1800 كىشىلىك خىزمەت رايونى، 40 سىن تەھرىرلەش ئۆيى ۋە نۇرغۇنلىغان بىۋاسىتە تارقىتىش نۇقتىلىرى مەتبۇئات ئەھلىنىڭ ئىشلىتىشىگە سۇنۇلدى. باشلىقلار يىغىنىنى تارىخىي رېكورت يارىتىپ 2500دىن ئارتۇق مەتبۇئات خادىمى كۆزەتتى؛ تۈركىيە رادىيو-تېلېۋىزىيە ئىدارىسى — ت ر ت نىڭ ماسلاشتۇرۇشىدا 96 كامېرا، 18 نەق مەيدان تارقىتىش ئاپتوموبىلى ۋە 26 ئوخشىمىغان نۇقتىدىن قىلىنغان تارقىتىشلار ئارقىلىق ئەنقەرە باشلىقلار يىغىنى پۈتۈن دۇنياغا يەتكۈزۈلدى».
ئەردوغان يەنە باشلىقلار يىغىنىنىڭ ئەنقەرەنى خەلقئارادا تونۇشتۇرۇشقا زور تۆھپە قوشقانلىقىنى قەيت قىلىپ مۇنداق دېدى: «باشلىقلار يىغىنى جەريانىدا كۆرسەتكەن كەڭ قورساقلىقى ۋە مىسلىسىز مېھماندوستلۇقى ئۈچۈن ئەنقەرەلىك يۇرتداشلىرىمغا چىن قەلبىمدىن تەشەككۈر ئېيتىمەن».
ئامانلىق ساقلاش كۈچلىرى ئالدىنقى ئورۇندا تۇرغان ئاساستا تاراتقۇدىن تېخنىكىلىق خىزمەتلەرگىچە، ساقلىق ساقلاشتىن قاتناشقىچە، كۈتۈۋېلىش (پروتوكول) تىن يېمەك-ئىچمەك ۋە مېھماندارچىلىق مۇلازىمەتلىرىگىچە بولغان نۇرغۇن ساھەلەردە باشلىقلار يىغىنىنىڭ ئوڭۇشلۇق ئۆتكۈزۈلۈشى ئۈچۈن پىداكارلىق بىلەن ۋەزىپە ئۆتىگەن بارلىق كىشىلەرگە مىننەتدارلىقىنى بىلدۈرگەن ئەردوغان شۇنداقلا ناتو باش كاتىپى مارك رۇتتېغىمۇ «باشلىقلار يىغىنىنى تەييارلاش ۋە ئۆتكۈزۈش جەريانىدا كۆرسەتكەن ھەمكارلىقنى ئاساس قىلغان پوزىتسىيەسى ۋە تىرىشچانلىقلىرى» ئۈچۈن تەشەككۈر ئېيتتى.
