فىرانسىيەدە بەش ئوت ئۆچۈرۈش پونكىتىدىن جىددىي قۇتقۇزۇش ئۈسكۈنىلىرىنىڭ ئوغرىلانغانلىقى ئاشكارىلاندى.
فىرانسىيە دۆلەتلىك تېلېۋىزىيە قانىلى «Franceinfo» نىڭ خەۋىرىگە قارىغاندا، مۇشۇ ئاينىڭ باشلىرىدا رون (Rhone) ۋىلايىتىدىكى تۆت، ئىسېر (Isere) ۋىلايىتىدىكى بىر ئوت ئۆچۈرۈش پونكىتىدا ئوغرىلىق ۋەقەسى يۈز بەرگەن.
مەزكۇر ئوت ئۆچۈرۈش پونكىتلىرىدىن قاتناش ۋەقەسى جەريانىدا ئاپتوموبىللىرىدا قىسىلىپ قالغان پۇقرالارنى قۇتقۇزۇشقا ئىشلىتىلىدىغان بېسىملىق سۇ قۇتقۇزۇش قايچىلىرى ئوغرىلانغان.
مىڭلىغان ياۋرو قىممىتىدىكى بۇ جىددىي قۇتقۇزۇش ئۈسكۈنىلىرى، ئوت ئۆچۈرۈش خادىملىرىنىڭ ۋەزىپە ئۆتەش جەريانىدا پۇقرالارنىڭ ھاياتىنى ساقلاپ قېلىشى ئۈچۈن ناھايىتى زور ئەھمىيەتكە ئىگە. نۆۋەتتە، مەزكۇر ئوغرىلىق ۋەقەلىرىگە مۇناسىۋەتلىك تەكشۈرۈش باشلاندى.
يەنە بىر تەرەپتىن، ۋەزىپىلىرىنى تېخىمۇ ياخشى ئۆتەش ئۈچۈن كۆپ خىل ئىمكانىيەت ۋە خادىم تەلەپ قىلىۋاتقان ئوت ئۆچۈرۈش خادىملىرى، 29-سېنتەبىر كۈنى پايتەخت پارىژدا نامايىش ئۆتكۈزىدۇ.
ئادەتتىن تاشقىرى ئىسسىق ھاۋانىڭ سەلبىي تەسىرىگە ئۇچرىغان فىرانسىيەدە، بۇ يىل يۈز بەرگەن ئورمان ئوت ئاپەتلىرى سەۋەبىدىن 117 مىڭ گېكتارلىق يەر كۈلگە ئايلىنىپ كەتكەن ئىدى.
