ۋاشىنگتون ئىشتاتىدا كۆپلىگەن ئورمان ئوت ئاپەتلىرى ئەتراپنى ۋەيران قىلىپ، يۈزلىگەن بىنالارنى تەلتۆكۈس يوق قىلىشنى داۋاملاشتۇرماقتا. 65 مىڭدىن ئارتۇق كىشى ئۆيلىرىنى تەرك ئېتىشكە مەجبۇر بولدى.

ئامېرىكا قىزىل كرېست جەمئىيىتى دۈشەنبە كۈنى «تەخمىنەن 65 مىڭ كىشىنىڭ كۆچۈشكە مەجبۇر بولغانلىقىنى» ئېلان قىلدى.

تەشكىلات دەسلەپكى باھالاشلارغا ئاساسلانغاندا، يالقۇنلارنىڭ سپوكان رايونىدا 700 دىن ئارتۇق ئۆينى يۇتۇپ كەتكەن.

سپوكان رايونى ساقچى باشلىقى جون نوۋېلس (John Nowels) ئاخبارات ئېلان قىلىش يىغىنىدا، دائىرىلەرنىڭ بىر كىشىنى بىرىنچى دەرىجىلىك ئوت قويۇپ بېرىش جىنايىتى بىلەن ئەيىبلەپ قولغا ئالغانلىقىنى ئېيتتى.

گۇماندارنىڭ رايونغا تەھدىت سېلىۋاتقان بىر قانچە ئوت ئاپىتىنىڭ بىرى بولغان Old Trails ئوت ئاپىتى بىلەن چېتىشلىقى بارلىقى ئىلگىرى سۈرۈلمەكتە.

سپوكان ئورمان ئوت ئاپىتى باشقۇرۇش ئەترىتى، ئەترەتلەرنىڭ ئوت ئۆچۈرۈش لىنىيەسىدە ئىلگىرىلەش ھاسىل قىلىشىغا مۇۋاپىق ھاۋا رايى شارائىتىنىڭ ئىمكانىيەت يارىتىپ بەرگەنلىكىنى بىلدۈردى.

ئورگانلار ئارا ئىدارە سىستېمىسى InciWeb نىڭ سانلىق مەلۇماتلىرى، سپوكان ۋە ستىۋېنس رايونلىرى يېقىنىدىكى ئوت ئاپەتلىرىنىڭ شەنبە كۈنى باشلانغاندىن بېرى 3248 گېكتار ئورمانلىقنى كۆيدۈرۈپ كۈل قىلغانلىقىنى جەملەشتۈردى.

سىنلاھېكىن ئوت ئاپىتى 26-ئىيۇلدا چاقماق سوقۇش سەۋەبىدىن باشلانغاندىن بۇيان 34 مىڭ 398 گېكتار ئورمانلىققا كېڭەيدى.

820 دىن ئارتۇق خادىم ئوت ئاپىتىغا قارشى كۈرەش قىلىۋاتقان بولۇپ، تېخى تولۇق كونتىروللۇق ئاستىغا ئالغىلى بولمىدى.

بۇ ئارىلىقتا، لىۋېنۋورىسنىڭ غەربىي شىمالىدىكى Little Giant ئوت ئاپىتى، ئوكانوگان-ۋېناتچى  دۆلەتلىك ئورمانلىقىدا 20 مىڭ 759 گېكتار ئورمانلىقنى كۈلگە ئايلاندۇردى.