جەنۇبىي فىلىپپىن دېڭىز تەۋەلىكىدە 7.4 بال يەر تەۋرىدى. فىلىپپىن يەر تەۋرەش ئىدارىسى قالدۇق يەر تەۋرەشنىڭ مۆلچەرلىنىۋاتقانلىقىنى بىلدۈردى.

 فىلىپپىن يەر تەۋرەش ئىدارىسىنىڭ باشلىقى تېرېسىتو باكولكول يەر تەۋرەشتىن كېيىن دېڭىز تاشقىنى ئاگاھلاندۇرۇشىنىڭ بېرىلىدىغانلىقىنى بىلدۈردى. يەر تەۋرەش مىنداناۋ رايونىدىكى ماناي يېزىسىدىن تەخمىنەن 20 كىلومېتىر يىراقلىقتا، شۇ جاي ۋاقتى ئەتىگەن سائەت 9:43 دە يۈز بەردى.

يەر تەۋرەش ئىدارىسى يەر تەۋرەشتىن قىسقا ۋاقىت ئۆتكەندىن كېيىن دېڭىز تاشقىنى ئاگاھلاندۇرۇشى ئېلان قىلدى.

ئالدىمىزدىكى ئىككى سائەت ئىچىدە دۆلەتنىڭ تىنچ ئوكيان قىرغاقلىرىدا بىر مېتىر ئېگىزلىكتىكى دولقۇنلارنىڭ پەيدا بولۇشى مۇمكىنلىكى مۆلچەرلەنمەكتە. بۇ رايونلاردىكى دېڭىز بويى ئاھالىسىگە «دەرھال ئېگىز جايلارغا چىقىش ياكى ئىچكى قۇرۇقلۇققا قاراپ يۆتكىلىش» تەۋسىيە قىلىندى.

ھازىرغا قەدەر ھېچقانداق زىيان ياكى ئۆلۈم – يېتىم خەۋىرى ئېلان قىلىنمىدى.

بۇنىڭدىن 11 كۈن ئىلگىرىمۇ فىلىپپىننىڭ سېبۇ ئارىلىدا  6.9 بال يەر تەۋرەش يۈز بېرىپ ئېغىر تالاپەت كۆرۈلگەن، ئاپەتتە 74 كىشى ھاياتىدىن ئايرىلغان، تەخمىنەن 72 مىڭ ئۆي ۋەيران بولغان ياكى زىيانغا ئۇچرىغان ئىدى.